ខេត្តស្វាយរៀង ៖ នាពេលកន្លងមកការសម្តែងប៉ាហ៊ី ឬសៀករហស្សកម្មឃោសនាលក់ថ្នាំ នៅតាមជនបទ ឬទីតំបន់ ផ្សេងៗ ជាទីពេញនិយមទស្សនាកម្សាន្តរបស់មហាជន ហើយក្រុមសម្តែងក៏ទទួលបានចំណូលកាក់កបដែរ ។ ពេលពួកគេសម្តែង ម្តងៗ មហាជនទស្សនាកម្សាន្តផង និងទិញថ្នាំទៅតាមតម្រូវការរបស់ខ្លួនផង ។ នេះជារឿងពីមុន តែបច្ចុប្បន្នក្រុមប៉ាហ៊ី បោះបង់អាជីពស្ទើរអស់ទៅហើយ ឯនៅសល់ខ្លះប្រឈមការលំបាកខ្លាំង ។
ជាក់ស្តែងក្រុមប៉ាហ៊ី របស់លោកឆាយ គីមហួ ដែលទៅសម្តែងនៅខេត្តស្វាយរៀង បានរៀបរាប់ឲ្យដឹងថា «ពួកខ្ញុំនៅភ្នំពេញ ជាក្រុមលេងល្អ លក់ថ្នាំពូកែ ហើយតែងតែទៅលេងនៅតាមបណ្តាភូមិស្រុកនានា មានការពេញនិយមទស្សនាណាស់កាលពីមុន ប៉ុន្តែសព្វថ្ងៃនេះនៅតាមតំបន់ជនបទលែងសូវមានអ្នកនិយមមើល ឬទិញថ្នាំទៀតហើយ ។ ដូច្នេះក្រុមប៉ាហ៊ីរបស់ខ្ញុំមានការព្រួយបារម្ភនឹងការបាត់បង់អាជីពនេះ»។
នៅពេលក្រុមប៉ាហ៊ី របស់លោកឆាយ គីមហួ សម្តែងលក់ថ្នាំនៅភូមិត្បែង ឃុំពោធិរាជ ស្រុកស្វាយជ្រំ ខេត្តស្វាយរៀង កាលពីពេល ថ្មីៗកន្លងមក អ្នកទស្សនាមួយចំនួននិយាយស្រដៀងគ្នាថា បច្ចុប្បន្នពេលមនុស្សឈឺពឹងលើពេទ្យ ព្រោះពេទ្យមានជំនាញ មានទីតាំងត្រឹមត្រូវ ថ្នាំមានការទទួលស្គាល់ពីក្រសួងសុខាភិបាលត្រឹមត្រូវ និងថ្នាំមានប្រសិទ្ធភាព ដូច្នេះមិនសូវមានជំនឿលើថ្នាំប៉ាហ៊ីទេ ។
«មានពេលខ្លះពេទ្យព្យាបាលជម្ងឺមិនជាផង ចុះប៉ាហ៊ី ត្រឹមដើរលក់ថ្នាំ ហើយថ្នាំគ្មានការទទួលស្គាល់ពីស្ថាបន័ណាផង ហើយគ្មានឧបករណ៍ពិនិត្យរោគវិនិច្ឆ័យផង តើធ្វើមេ៉ចឲ្យជឿទុកចិត្តបាន ម្យ៉ាងវិញទៀតខ្លះទិញម្តងពីរដងហើយ យកមកចោលទទេ អស់តែលុយ ។ ដល់ប៉ាហ៊ីមកលេង លើកក្រោយៗទៀត បានត្រឹមតែឈរមើលការសម្តែង ហើយសើច ទុកដូចជាសិល្បៈកំប្លែង គ្រាន់មើលសើចសប្បាយប៉ុណ្ណោះ តែលែងទិញថ្នាំប៉ាហ៊ីទៀតហើយ »។ អ្នកទស្សនាម្នាក់និយាយបែបនេះ ។
ទាក់ទិនការបាត់ការពេញនិយមទស្សនាប៉ាហ៊ី មានមតិមួយចំនួនលើកឡើងថា ម្យ៉ាងមកពីគេមិនចង់ទិញថ្នាំដែលប៉ាហ៊ីឃោសនាលក់បែបភូតភរថាត្រូវស្ទើរ១០០មុខ ម្យ៉ាងសម្តែងក្បាច់ ដដែលៗ គ្មានអ្វីប្លែក ដូច្នេះនរណាចង់មើលទៀត !»។
ជាក់ស្តែងពេលក្រុមប៉ាហី សម្តែងនៅខេត្តស្វាយរៀងនោះ លេងបណ្តើរ លក់ថ្នាំចិនសែបណ្តើរ ហើយធានាថា ព្យាបាលជំងឺបានច្រើនមុខ ដូចជាឈឺក្រពះ រួយជង្គង់ វិលមុខ ធ្វើការឆាប់អស់កម្លាំង ចំពោះស្ត្រីមានធ្លាក់ស ឫសដូងច្រមុះ ឫសដូងបាត លើសឈាម …។ ក្រៅពីនេះមានថ្នាំព្យាបាលឈឺធ្មេញ និងស្រែងរមាស់ជាដើម ។ ទោះជាយ៉ាងណាក្តីនៅមានអ្នកខ្លះថាកបនឹងថ្នាំបុរាណរបស់ប៉ាហ៊ី ហើយគ្រាន់នឹងទស្សនាកម្សាន្តមិនអស់ប្រាក់ដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ