កំពូលតារាសម្តែងស្រីរបស់ប្រទេសចិនដ៏ល្បីឈ្មោះនាង ហ្វាន់ ពីងពីង (Fan Bingbing) បានប្រកាសនៅលើទំព័រ Weibo របស់នាងថា នាងលែងភ្ជាប់ទំនាក់ទំនងជាមួយមិត្តប្រុសរបស់នាងឈ្មោះ លី…
កំពូលតារាសម្តែងស្រីរបស់ប្រទេសចិនដ៏ល្បីឈ្មោះនាង ហ្វាន់ ពីងពីង (Fan Bingbing) បានប្រកាសនៅលើទំព័រ Weibo របស់នាងថា នាងលែងភ្ជាប់ទំនាក់ទំនងជាមួយមិត្តប្រុសរបស់នាងឈ្មោះ លី ឈិន (Li Chen) ទៀតហើយ ។
នាង ហ្វាន់ ពីងពីង បានធ្វើការប្រកាសដូច្នេះ កាលពីនៅម៉ោងប្រហែល៨យប់ថ្ងៃទី២៧ ខែមិថុនាកន្លងមកដែលមានខ្លឹមសារថា ៖ «យើងជួបប្រទះបទពិសោធជាច្រើនប្រភេទក្នុងជីវិតរបស់យើង ។ ភាពកក់ក្ដៅ និងស្នេហាដែលយើងផ្តល់ឱ្យគ្នាទៅវិញទៅមកប្រែទៅជាកម្លាំងដែលមានជារៀងរហូត ។ អរគុណសម្រាប់ការលះបង់ ការគាំទ្រ និងស្នេហាដែលអ្នកបានផ្តល់ដល់ខ្ញុំ ហើយខ្ញុំអរគុណចំពោះក្តីបារម្ភ និងក្ដីស្រឡាញ់ដែលអ្នកនឹងផ្តល់ឱ្យខ្ញុំនាពេលអនាគត» ។ «យើងលែងមានទៀតហើយ ប៉ុន្តែយើងនៅតែជាយើង» ។
ការប្រកាសរបស់ ហ្វាន់ ពីងពីង បែបនេះមានទំហំធំធេងខ្លាំងណាស់ ដែលធ្វើឱ្យមានអ្នក Like ចំនួន៦៦.០០០ អ្នក Comment ចំនួន១៨០.០០០ និងអ្នកShare ចំនួន ៩០.០០០ ក្នុងរយៈពេលត្រឹមតែពីរម៉ោងប៉ុណ្ណោះ ។ អ្នកនិយមលេងអ៊ីនធឺណេតមួយចំនួនបានរាយការណ៍ថា គេហទំព័រ Weibo បានរងនូវការគាំង Server មិនអាចគ្រប់គ្រងចរាចរណ៍បាន។
សូមបញ្ជាក់ផងដែរថា ហ្វាន់ ពីងពីង និងលោកលី ឈិន បានជួបគ្នាជាលើកដំបូងនៅក្នុងរឿងភាគចិន «អធិរាជនៃប្រទេសចិន» (The Empress of China) ។ អ្នកទាំងពីរបានចាប់ផ្តើមស្នេហានៅឆ្នាំ២០១៥ និងបានភ្ជាប់ពាក្យក្នុងកំឡុងពេលខួបកំណើតអាយុ៣៦ឆ្នាំរបស់នាងពីរឆ្នាំក្រោយមក ។
មិនយូរប៉ុន្មានបន្ទាប់ពីការប្រកាសអំពីការបែកបាក់នេះ បានរីករាលដាលនៅក្នុងបណ្តាញសង្គមលោក លី ក៏បានចែករំលែកការប្រកាសនេះ ហើយបានបន្ថែមសារមួយរបស់លោកដែលមានខ្លឹមសារថា ៖ «ពីមិត្តភក្តិ ទៅគូស្នេហ៍ ហើយបន្ទាប់មកត្រលប់ទៅមិត្តភក្ដិវិញ ។ អារម្មណ៍អាចផ្លាស់ប្តូរ ប៉ុន្តែអារម្មណ៍បរិសុទ្ធរវាងអ្នក និងខ្ញុំនឹងមិនផ្លាស់ប្ដូរទេ ។ ទំនុកចិត្ត និងការគាំទ្រដែលយើងមានសម្រាប់គ្នាទៅវិញទៅមកនឹងមានជារៀងរហូត» ។ «យើងលែងមានទៀតហើយ ប៉ុន្តែយើងនៅតែជាយើង»៕
ចែករំលែកព័តមាននេះ