ខេត្តកណ្ដាល ៖ តាមសេចក្តីរាយការណ៍បឋមបានឲ្យដឹងថា មានករណីជនបរទេសម្នាក់យកសាំងដុតខ្លួនឯង ដែលហេតុការណ៍នេះបានកើតឡើងនៅវេលាម៉ោង០៧និង៣០នាទីព្រឹក ថ្ងៃទី២៩ ខែមិថុនានេះ នៅចំណុចផ្លូវជាតិលេខ៦ ភូមិលើ ឃុំព្រែក អញ្ចាញ ស្រុកមុខកំពូល ខេត្តកណ្ដាល ។
ជនរងគ្រោះឈ្មោះ AUDOIN YANN ភេទប្រុស អាយុ២៩ឆ្នាំ ជនជាតិបារាំង កាន់លិខិតឆ្លងដែនលេខ: 13A1294 66 ចុះថ្ងៃទី 12 .03.2013 ផុតសុពលភាព11.03.2023 ។ ទិដ្ឋាការលេខ: T1900035017 ចូលតាមច្រកទ្វារអន្តរជាតិ។
ចំពោះវត្ថុតាងចាប់យកមាន១ដបទឹកសុទ្ធជ័រ ពណ៌សបួនជ្រុងអង្កន់ៗ ពណ៌ក្រហម ចំណុះ ៥០០មីលីលីត ចំនួន០១ ។ ២-លិខិតឆ្លងដែនរបស់ជនរងគ្រោះចំនួន០១ក្បាល ។ ៣-កម្ទេចអំបែង និងក្បាលដែកកេះ ពណ៌ស្វាយមួយចំនួន ។
មុនពេលកើតហេតុ នៅថ្ងៃកើតហេតុខាងលើជនរងគ្រោះបានដើរតាមផ្លូវជាតិលេខ៦ ពីជើងទៅត្បូង លុះមកដល់កន្លែងកើតហេតុជនរងគ្រោះបានដើរចូលទៅយកដបសាំងនៅមុខផ្ទះលក់ចំណីសត្វរបស់ឈ្មោះ ភារម្យ ដោយគ្មានមូលហេតុ ហើយបានធ្វើសកម្មភាពយកសាំងចាក់លើក្បាលដុតខ្លួនឯង បណ្តាលឲ្យមានរបួស និងរលាកពេញខ្លួន នៅពេលនោះមានប្រជាពលរដ្ឋបាននាំគ្នាជួយពន្លត់សាំងពីជនរងគ្រោះ រួចខណៈនោះជនរងគ្រោះក៏ដើរតាមបណ្ដោយផ្លូវទៅទិសខាងត្បូងបន្តទៀត។
លុះដើរមកដល់ចំណុចមុខរោងចក្រស៊ិចផ្លើសនៅវេលាម៉ោង០៨និង០០នាទីព្រឹក ស្ថិតនៅភូមិ កណ្ដាល ឃុំព្រែកអញ្ចាញ ក៏មានប្រជាពលរដ្ឋបានទូរស័ព្ទរាយការណ៍ជូនកម្លាំងប៉ុស្តិ៍ព្រែកអញ្ចាញនៅពេលនោះកម្លាំងប៉ុស្តិ៍បានចុះទៅដល់ ហើយបានហៅរថយន្ដពេទ្យដឹកជនរងគ្រោះយកទៅព្យាបាលរបួសនៅមន្ទីរពេទ្យស្រុកមុខកំពូល តែដោយរបួសជនរងគ្រោះមានសភាពធ្ងន់ធ្ងរពេក ពេទ្យស្រុកមុខកំពូលបានបញ្ជូនជនរងគ្រោះទៅព្យាបាលនៅមន្ទីរពេទ្យកាលម៉ែត្ររាជធានីភ្នំពេញតែម្ដង ។
យោងតាមការស្រាវជ្រាវរបស់នគរបាលយុត្តិធម៌ឃើញថា នៅថ្ងៃកើតហេតុឈ្មោះ អ៊ឹម ស្រីភាស់ កំពុងតែលក់ដូរនៅមុខផ្ទះជាប់ផ្លូវជាតិលេខ៦ ស្ថិតក្នុងភូមិលើ ឃុំព្រែកអញ្ចាញ ក្នុងនោះមានលក់សាំង និងចំណីសត្វ នៅពេលនោះជនបរទេសម្នាក់ (មិនស្គាល់សញ្ជាតិ) មិនដឹងថាដើរមកពីខាងណាទេ បានដើរចូលមកយកដបសាំងចំណុះកន្លះលីត្រចាក់ស្រោចលើខ្លួន រួចក៏ដើរមកទិសខាងជើងឆៀងខាងកើតចម្ងាយ០២ម៉ែត្រពីចិញ្ចឹមផ្លូវជាតិ រួចក៏គូសដែកកេះដុតខ្លួនឯង បណ្ដាលឲ្យមានអណ្តាតភ្លើងឆេះសន្ធោសន្ធៅនៅលើខ្លួន ភ្លាមនោះឈ្មោះ ថុល ចន្ថា ជាងជួសជុលរថយន្តបានស្ទុះទៅយកទឹក០១ ធុងមកចាក់លើជនរងគ្រោះ បណ្តាលឲ្យភ្លើងរលត់ពីក្បាលដល់ចង្កេះ ហើយនៅឆេះបន្តទៀតពីចង្កេះទៅចុងជើង ហើយជនរងគ្រោះក៏រត់មកមុខផ្ទះអ៊ឹម ស្រីភាស់ វិញដោយដេកននៀលលើដី ដើម្បីឲ្យភ្លើងរលត់ ប៉ុន្តែភ្លើងនៅតែឆេះហើយជនរងគ្រោះបានទៅកន្លែងរ៉ូប៊ីណេទឹកបើកបង្ហូរទឹកខ្លួនឯងដេកផ្អៀងផ្អងក្រោមទឹកទើបរលត់ភ្លើង រួចហើយជនរងគ្រោះក៏ងើបដើរចេញដោយដោះអាវដែលមានស្នាមភើ្លងឆេះចេញពីខ្លួនរួចក៏ដើរទៅទិសខាងត្បូងទាំងមានស្នាមរបួសរលាកពេញខ្លួនពេលដើរដល់ផ្លូវបេតុជាប់របងផ្ទះឈ្មោះ ស៊ា ជនរងគ្រោះបានស្រាតខោចោលនៅតែខ្លួនទទេ (គ្មានខោខ្លី) រួចបន្តដំណើរទៅមុខទៀតដោយបន្សល់ទុកនូវដបសាំង និងលិខិតឆ្លងដែននៅកន្លែងកើតហេតុ ។
លុះដើរទៅដល់ចំណុចមុខផ្ទះឈ្មោះហេង លីតា(ហ្វាម៉ាស៊ី) នៅវេលាម៉ោង០៨និង៣០នាទី ជនរងគ្រោះបានដួលនៅមុខផ្ទះលក់ថ្នាំនោះ ហើយប្រជាពលរដ្ឋក៏បានចោមរោមមើលជា ច្រើន ក្នុងនោះជនរងគ្រោះបាននិយាយជា ភាសាអង់គ្លេសថា ៖ Help Me (ជួយផង) រួចឈ្មោះហេងលីតាម្ចាស់ផ្ទះលក់ថ្នាំ ហ្វាម៉ាស៊ី បានមកមើលឃើញជនរងគ្រោះមានរបួសឆេះរលាកពេញខ្លួន និងក្បាលផ្នែកខាងក្រោយបែកហូរឈាម ហើយឈ្មោះ ហេង លីតា បានជួយរុំរបួសក្បាល ដើម្បីជួយឃាត់ឈាមឲ្យជនរងគ្រោះ (សង្គ្រោះបឋម) ទន្ទឹមពេលនោះសមត្ថកិច្ចនគរបាលប៉ុស្តិ៍បានទៅដល់ និងបានហៅរថយន្តពេទ្យស្រុកឲ្យមកដឹកជនរងគ្រោះ ដោយមុនពេលឡានពេទ្យមកដល់ជនរងគ្រោះបានងើបដើរបន្តទៅមុខទៀតបានប្រហែល០៥ម៉ែត្រក៏ដួលទៀតពេលនោះ ឈ្មោះម៉ៅ រ៉ា ប្រជាការពារបានមកជួយគ្រាជនរងគ្រោះដើរដល់ចំណុចមុខរោងចក្រខាងលើបានយកខោស្លៀកឲ្យជនរងគ្រោះបន្ទាប់មកឡានពេទ្យក៏មកដល់ដោយឃើញសភាពជនរងគ្រោះមានរបួសធ្ងន់ធ្ងរក៏បានដឹកជនរងគ្រោះទៅមន្ទីរពេទ្យកាល់ម៉ែត ភ្នំពេញតែម្តង ៕ កែសម្រួលដោយ ៖ សុឃាក់
ចែករំលែកព័តមាននេះ