ខេត្តកំពង់ស្ពឺ ៖ មន្ត្រីកងរាជអាវុធហត្ថមួយរូប និងជាមេបញ្ជាការរងកងរាជអាវុធហត្ថស្រុកផងនោះ ត្រូវបានមហាជនដាក់ងារថា «ជាស្តេចក្រាញ់» បន្ទាប់ពីមន្ត្រីរូបនេះបានប្រើអំណាចដែលខ្លួនមានបំពានទៅលើរាជការសាធារណៈក្នុងពេលបំពេញភារកិច្ច។ ការប្រើអំណាចរំលោភ សមត្ថកិច្ច និងរដ្ឋបាលស្រុកនេះ គឺបន្ទាប់ពីមួយក្រុមបានធ្វើសកម្មភាពស្ទាក់រំដោះរថយន្តដឹកដីមួយគ្រឿងតាមផ្លូវពីសមត្ថកិច្ចនគរបាល បន្ទាប់ពីគណៈបញ្ជាការឯកភាពស្រុកឃាត់ ហើយបានបញ្ជូនទៅកាន់មន្ទីរសាធារណការ និងដឹកជញ្ជូនខេត្តកំពង់ស្ពឺ ដើម្បីមានវិធានការតាមផ្លូវច្បាប់។
ប្រភពពីមន្ត្រីនគរបាលស្រុកភ្នំស្រួចមួយរូបបានឱ្យដឹងថា ដោយមានការលើកឡើងក្នុងវេទិកាសាធារណៈអំពីការចាក់ដីលុបអូររបស់រដ្ឋពីសំណាក់លោកម៉ែន ភីរីណា ដែលជាមន្ត្រីកងរាជអាវុធហត្ថខេត្ត និងជាមេបញ្ជាការស្រុកភ្នំស្រួចផងនោះ ទើបកាលពីថ្លៃទី២៧ ខែមិថុនា ឆ្នាំ២០១៩ លោកអភិបាលស្រុកដឹកនាំកម្លាំងចុះទៅឃាត់រថយន្តដឹកដីរបស់លោកម៉ែន ភីរីណា បានមួយគ្រឿងមករក្សាទុកត្រៀមបញ្ជូនទៅជំនាញមន្ទីរសាធារណការខេត្ត ចាត់ការតាមនីតិវិធី ។
ប្រភពបន្តថា ក្រោយពេលឃាត់បានមួយថ្ងៃ មត្ថកិច្ចបានកសាងឯកសារ ដើម្បីបញ្ជូនទៅជំនាញសាធារណការ លុះសមត្ថកិច្ចនគរបាល និងមន្ត្រីស្រុក ធ្វើដំណើរនាំរថយន្តដល់ចំណុចវត្តគ្រួស ឃុំកាហែង ស្រុកសំរោងទង ត្រូវបានមនុស្សមួយក្រុមជិះរថយន្ត២គ្រឿងមកស្ទាក់រំដោះយករថយន្តបែននោះទៅបាត់។
ប្រភពដដែលបានបន្តថា រថយន្តបែនដឹកដីរបស់លោកម៉ែន ភីរីណា ដែលមានតួនាទីជាមេបញ្ជាការរងប៉េអឹមស្រុកភ្នំស្រួច ដែលធ្វើសកម្មភាពចាក់អាចម៌ដី និលុបទាំងប្រឡាយរបស់រដ្ឋជិតស្ពានថ្មក្នុងឃុំមហាសាំង ស្រុកភ្នំស្រួចខុសច្បាប់ ទើបគណៈបញ្ជាការឯកភាពចុះឃាត់ និងបញ្ជូនបន្តទៅឲ្យមន្ទីរសាធារណការខេត្ត ចាត់ការតាមនីតិវិធី ប៉ុន្តែត្រូវបក្ខពួកលោកមេបញ្ជាការរងប៉េអឹម ស្ទាក់រំដោះយកទៅបាត់។
ដោយឡែកមន្ត្រីនគរបាលស្រុកភ្នំស្រួចមួយរូបបានបង្ហើបក្នុងលក្ខខណ្ឌមិនចេញឈ្មោះថា «នៅថ្ងៃទី២៩ ខែមិថុនា ឆ្នាំ២០១៩ មានមនុស្សមួយក្រុមដែលគេស្គាល់ថា ជាបក្ខពួកកូនចៅរបស់លោកមេបញ្ជាការរងប៉េអឹមស្រុកភ្នំស្រួច បាននាំគ្នាស្ទាក់រំដោះយករថយន្តបែនដឹកដីមួយគ្រឿងដែលគណៈបញ្ជាការឯកភាពស្រុក ឃាត់ទុក រួចបញ្ជូនទៅមន្ទីរជំនាញចាត់ការបន្ត ពេលបញ្ជូនផុតពីស្រុកបន្តិច»។
ចំណែកលោក ហន ពិសិដ្ឋ អភិបាលស្រុកភ្នំស្រួចបានប្រាបឲ្យដឹងថា «ក្រោយពីមានលើកឡើងក្នុងវេទិកាសាធារណៈ ក្រុមការងារថ្នាក់ជាតិ គឺគេលើកចំណុច «ដីអូរនៅភូមិព្រៃស្តុក ឃុំមហាសាំង ស្រុកភ្នំស្រួច» នេះតែម្តង។ ខ្ញុំបានដឹកនាំកម្លាំងឃាត់បានរថយន្តដឹកដីមួយគ្រឿងក្រោយពេលបញ្ជូនដល់ចំណុចវត្តគ្រួស ត្រូវមនុស្សក្រុមតូចស្ទាក់យករថយន្ត ហើយគេចបាត់»។
អភិបាលស្រុកភ្នំស្រួចបញ្ជាក់ថា «ករណីលោក ម៉ែន ភីរីណា មេបញ្ជាការរងកងរាជអាវុធហត្ថស្រុកភ្នំស្រួច ចាក់ដីនេះ គឺអត់ច្បាប់ទាំងអស់។ ទោះឃាត់ក៏នៅបំពានចាក់ដែរ»។ តាមការបង្ហើបពីមន្ត្រីសាលាស្រុកមួយរូប គឺ «ករណីនេះ ក៏មានការអន្តរាគមន៍ និងមានអំណាចដោះលែងរថយន្ដដែរ តែខាងស្រុកមិនឯកភាព»។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ៕ (កែសម្រួលដោយ ៖ បុប្ផា)
ចែករំលែកព័តមាននេះ