រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យ បានចុះទីបង្ក្រាបទីតាំងអុីនធើណេតមួយកន្លែងយីហោ«CH Net» ដែលបានសុំច្បាប់ថា បើកអាជីវកម្ម (សេវាអុីនធើណេតវិស័យព័ត៌មាន) ប៉ុន្តែក្រោយពីទទួលបានការអនុញ្ញាតពីសាលារាជធានីភ្នំពេញ បែរជាដំណើរការល្បែងហ្គេមបាញ់ត្រីស៊េរីទំនើបៗទៅវិញ។
ករណីនេះ បានបង្កឲ្យអ្នកភូមិទាស់ចិត្តខឹងសម្បារលួចប្រាប់ដល់អាជ្ញធរខណ្ឌខាងលើចុះទៅធ្វើការស្រាវជ្រាវរហូតឈានដល់ការចុះបង្ក្រាបដោយរឹបអូសយកសម្ភារៈពាក់ព័ន្ធនិងការបម្រើឲ្យល្បែងហ្គេមទាំងអស់ផងដែរ។ក្នុងនោះរួមមាន កុំព្យូទ័រចំនួន២៧គ្រឿង កៅអីចំនួន២៩ និងដៃហ្គេមបាញ់ត្រីចំនួន៧គ្រឿងនាំយកទៅរក្សាទុកនៅសាលាខណ្ឌពោធិ៍សែនជ័យ។
ប្រតិបត្តិការនោះ បានធ្វើឡើងកាលពីវេលាម៉ោង៦និង៥៥នាទីយប់ថ្ងៃ២៨ មីនា ហើយទីតាំងអុីនធើណេតយីហោ«CH Net» នោះស្ថិតនៅទល់មុខអាកាសយានដ្ឋានអន្តរជាតិភ្នំពេញនៅក្នុងភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នពេញ ។
អាជ្ញាធរបានឲ្យដឹងថា តាមការស្រាវជ្រាវទីតាំងខាងលើទើបតែដំណើរការបានរយៈពេលជាង១០ថ្ងៃប៉ុណ្ណោះដោយសុំច្បាប់អាជីវកម្មផ្សេង លុះដល់ពេលដំណើរការផ្សឹងទៅវិញខុសទៅនិងគោលការការណ៍អនុញ្ញាតិច្បាប់ បន្ទាប់ពីស៊ើបដឹងបែបនេះទើបចុះបង្ក្រាបតែម្ដង។
ចំណែកម្ចាស់ទីតាំងខាងលើ គឺជាជនជាតិចិន ប៉ុន្តែនៅក្នុងវិញ្ញាបនបត្រអនុញ្ញាតអាជីវកម្មមានឈ្មោះហ៊ុន គឹមជាតិ ភេទប្រុស អាយុ៣៩ឆ្នាំ ហើយមិនត្រូវបានឃាត់ខ្លួនទេ ព្រោះពេលកម្លាំងចុះទៅដល់មិនបានឃើញម្ចាស់រូបនេះ ស្ថិតនៅក្នុងទីតាំងរបស់ខ្លួននោះឡើយ មានតែបុរសអ្នកមើលការខុសត្រូវទីតាំងម្នាក់ឈ្មោះព្រំ ណារាជ្យ ប៉ុណ្ណោះ។ (សម្រួលដោយ៖ ស្រីណា)
ចែករំលែកព័តមាននេះ