រាជធានីភ្នំពេញ ៖ អាជីវករប្រមាណ១០០នាក់ តំណាងឱ្យអាជីវករ៤០០នាក់ នៅផ្សារព្រែកព្នៅ ខណ្ឌសែនសុខ រាជធានីភ្នំពេញ នៅព្រឹកថ្ងៃទី៧ មីនា ឆ្នាំ២០១១ បាននាំគ្នាមកឈរនៅមុខសាលាឧទ្ធរណ៍ក្នុងគោលបំណងសំណូមពរឱ្យចៅក្រមម្នាក់នៃសាលាឧទ្ធរណ៍ជួយតំកល់ដីកាសម្រេចរក្សាការពាររបស់សាលាដំបូងរាជធានីភ្នំពេញ ។
អាជីវករផ្សារព្រែកព្នៅខាងលើ បាននិយាយស្រដៀងៗគ្នាប្រាប់អ្នកកាសែតថា ពួកគាត់មានការធូរស្រាលចំពោះជីវភាពខ្លះៗដែរ ក្រោយពីពួកគាត់បានមកលក់ដូរនៅផ្សារព្រែកព្នៅនេះ ។ ពួកគាត់បញ្ជាក់ថា ពីមុនពួកគាត់លក់ដូរនៅខាងក្នុងដីឡូត៍ ឬមុខដីឡូត៍ដែលមានទីតាំងជាប់ផ្សារនេះ ត្រូវបង់លុយឱ្យគេ១ថ្ងៃពី១ម៉ឺនរៀលទៅ២ម៉ឺនរៀល ប៉ុន្តែពេលពួកគាត់មកលក់ដូរនៅផ្សារព្រែកព្នៅ គឺ១ថ្ងៃបង់តែ៨០០រៀលប៉ុណ្ណោះ ជាហេតុធ្វើឱ្យជីវភាពពួកគាត់បានធូរស្រាលខ្លះដែរ។
ក្រុមអាជីវករទាំងនោះបានបន្តថា ការដែលពួកគាត់មកឈរនៅមុខសាលាឧទ្ធរណ៍នេះគឺដើម្បីសំណូមពរដល់ចៅក្រមមួយរូបដែលកាន់សំណុំរឿងនេះ ឱ្យជួយប្រកាសតម្កល់ដីការក្សាការពាររបស់សាលាដំបូងរាជធានីភ្នំពេញ ដែលបានអនុញ្ញាតឱ្យគណៈកម្មការផ្សារព្រែកព្នៅ ធ្វើរបងខណ្ឌដីរវាងផ្សាររដ្ឋជាមួយដីឡូត៍មួយកន្លែងដែលនៅក្បែរនោះ ។ ពួកគាត់បានបន្តទៀតថា ការដែលពួកគាត់ប្រមូលគ្នាឡើងមកឈរនៅមុខសាលាឧទ្ធរណ៍ នេះគឺស្របពេលដែលចៅក្រមនៃសាលាឧទ្ធរណ៍បើកសវនាការចំពោះដីកាសម្រេចរក្សាការពាររបស់សាលាដំបូងរាជធានីភ្នំពេញ ដោយយោងតាមពាក្យបណ្តឹងពីភាគីម្ចាស់ដីឡូត៍ដែលបានប្តឹងមកនោះ។
ទោះបីជាយ៉ាងណា សវនាការរបស់សាលាឧទ្ធរណ៍ជុំវិញដីកាសម្រេចរក្សាការពាររបស់សាលាដំបូងរាជធានីភ្នំពេញ គឺ មិនទាន់ប្រកាសជាលទ្ធផលខាងណាឈ្នះខាងណាចាញ់នោះឡើយ ដោយលើកពេលប្រកាសនៅថ្ងៃទី៩ មីនា ខាងមុខនេះវិញ ។ គួរបញ្ជាក់ថា កាលពីថ្ងៃទី២២ មករា ឆ្នាំ២០១១ កម្លាំងអាជ្ញាធរខណ្ឌសែនសុខ បានចុះអនុវត្តដីកាសម្រេចរក្សាការពាររបស់សាលាដំបូងរាជធានីភ្នំពេញ ដោយអនុញ្ញាតឱ្យគណៈកម្មការផ្សារព្រែកព្នៅ ធ្វើរបងថ្មខណ្ឌដីផ្សារ និងដីឯកជន ។ ពេលនោះម្ចាស់ដីឯកជនបានប្តឹងតវ៉ាមកសាលាឧទ្ធរណ៍ដើម្បីប្រឆាំងនឹងការធ្វើរបងនេះ។ ទោះបីជាយ៉ាងណា អាជីវករផ្សារព្រែកព្នៅបានអះអាងថា បើសាលាឧទ្ធរណ៍កាត់ក្តីឱ្យរុះរបងនេះចេញ ពួកគាត់មិនអនុញ្ញាតជាដាច់ខាត ដោយហ៊ានចេញមុខប្រឆាំងរហូតអស់ជីវិតថែមទៀត ៕
ចែករំលែកព័តមាននេះ