មនុស្សជាច្រើនត្រូវបានចងដោយទស្សនៈ និងគំនិតរបស់អ្នកនៅជុំវិញខ្លួន។ ឧទាហរណ៍ដូចជាអ្នកដែលកើតក្នុងគ្រួសារក្រីក្រអាចនឹងគិតថា ខ្លួនប្រហែលជាមិនមានសមត្ថភាពក្នុងការធ្វើឲ្យជីវភាពខ្លួនកាន់តែប្រសើរឡើងដូចមនុស្សមកពីគ្រួសារធូរធារឡើយ ។ វាជារឿងធម្មតាដែលមនុស្សជាច្រើនធ្លាក់ក្នុងអន្ទាក់នេះ ព្រោះទស្សនៈដែលយើងមានលើអ្វីមួយប៉ះពាល់ដល់សកម្មភាពរបស់យើងដែរ ។
ប្រសិនបើអ្នកចង់ផ្លាស់ប្តូរស្ថានការហិរញ្ញវត្ថុរបស់អ្នកឲ្យកាន់តែប្រសើរឡើង អ្នកគួរតែជៀសវាងទស្សនៈលុយខាងក្រោមដែលឃុំឃាំងមនុស្សជាច្រើន ៖
១. លុយកាន់តែច្រើនបញ្ហាកាន់តែច្រើន
វា គឺជាគំនិតទូទៅមួយដែលអ្នកមិនមានទ្រព្យសម្បត្តិចូលចិត្តប្រើប្រាស់ ដើម្បីលួងលោមខ្លួនឯងពីស្ថានការដែលខ្លួនកំពុងតែមាន ។ អ្នកដែលមានលុយច្រើន គឺជាមនុស្សដែលមានសមត្ថភាពគ្រប់គ្រងកាន់តែខ្ពស់ និងមានជម្រើសកាន់តែច្រើនទៀតសម្រាប់ជីវិត ។ លុយកាន់តែច្រើនមិនប្រាកដថា នាំឲ្យមានបញ្ហាច្រើនទេ គ្រាន់តែបញ្ហាថ្មីៗប៉ុណ្ណោះ ។
២. ត្រូវការលុយ ដើម្បីរកលុយ
មនុស្សសាមញ្ញមានទ្រព្យសម្បត្តិស្តុកស្តម្ភ ព្រោះពួកគេមានភាពក្លាហានក្នុងការលក់គំនិតរបស់ពួកគេ ។ គំនិតត្រូវការលុយ ដើម្បីរកលុយនេះមិនតែងតែត្រឹមត្រូវទេ ។ នៅពេលដែលអ្នកចាប់ផ្តើមដំបូង អ្វីដែលអ្នកត្រូវមាន គឺភាពក្លាហាន និងការខិតខំប្រឹងប្រែងក្នុងការរកលុយ ។ ការគិតថាអ្នកត្រូវការលុយជាមុនសិនអាចរារាំងអ្នកក្នុងការស្វែងរកដំណោះស្រាយ និងបញ្ចេញគំនិតច្នៃប្រឌិតក្នុងការប្រកបអាជីវកម្មផ្សេងៗ ។
៣. លុយជាប្រភពនៃរឿងមិនល្អ
គំនិតនេះត្រូវបាននិយាយតៗគ្នាចេញពីឃ្លាស្រលាញ់លុយ គឺជាប្រភពនៃរឿងមិនល្អ ។ មនុស្សជាច្រើនបានយល់ច្រឡំ និងគិតថា លុយ គឺជារឿងអាក្រក់ទៅវិញ ។ ការមានទ្រព្យសម្បត្តិច្រើនមិនមែនជារឿងមិនល្អទេ ។ លោក Bill Gates ធ្លាប់បាននិយាយថា ប្រសិនបើអ្នកកើតមកក្នុងគ្រួសារក្រីក្រ វាមិនមែនជាកំហុសអ្នកទេ ប៉ុន្តែវាជាកំហុសអ្នកប្រសិនបើអ្នកបន្តរស់នៅដោយក្រីក្រ ។ ប្រហែលជារឿងដែលអាក្រក់ គឺការអសមត្ថភាពក្នុងការផ្គត់ផ្គង់ដល់គ្រួសារ ពង្រីកអាជីវកម្ម និងសម្រេចគោលដៅក្នុងជីវិតវិញទេ ៕ កែសម្រួលដោយ ៖ សុឃាក់
ចែករំលែកព័តមាននេះ