ពុកអើយចិត្តដាច់ម៉្លេះ! ហ៊ានលើកដៃសម្លា.ប់កូនតូចទើបជាង១ខួប
ខេត្តសៀមរាប ៖ តាមប្រភពពីលោកវសេនីយ៍ឯក មិន ចន្ថា អធិការដ្ឋាននគរបាលស្រុកប្រាសាទបាគង បានប្រាប់នៅវេលាម៉ោង៤និង១០នាទីរសៀលថ្ងៃទី២៨ ខែមិថុនា ឆ្នាំ២០១៩ ឱ្យដឹងថា…
ខេត្តសៀមរាប ៖ តាមប្រភពពីលោកវសេនីយ៍ឯក មិន ចន្ថា អធិការដ្ឋាននគរបាលស្រុកប្រាសាទបាគង បានប្រាប់នៅវេលាម៉ោង៤និង១០នាទីរសៀលថ្ងៃទី២៨ ខែមិថុនា ឆ្នាំ២០១៩ ឱ្យដឹងថា មានករណីហិង្សាក្នុងគ្រួសារមួយបានកើតឡើងដោយសារប្តីឈ្លោះគ្នាជាមួយប្រពន្ធ ហើយបុរសជាប្តីហ៊ានលើកដៃចាប់កូនប្រុសតូចបោកផ្ទប់ទៅនឹងសសរផ្ទះបាយ បណ្ដាលឱ្យសន្លប់បាត់ស្មារតី ក្រោយមកក៏បានស្លាប់ពេលបញ្ជូនដល់មន្ទីរពេទ្យ ដែលហេតុការណ៍នេះបង្កឱ្យមានការភ្ញាក់ផ្អើលដល់ប្រជាពលរដ្ឋរស់នៅជិតខាង បន្ទាប់មកជនសង្ស័យជាឪពុកបានរត់គេចខ្លួនបាត់ទាំងយប់។
ហេតុការណ៍គួរឱ្យរន្ធត់ខាងលើនេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី២៧ ខែមិថុនា ឆ្នាំ២០១៩ ស្ថិតនៅភូមិតាប្រាក់ ឃុំមានជ័យ ស្រុកប្រាសាទបាគង ខេត្តសៀមរាប។
លោកវរសេនីយ៍ឯក មិន ចន្ថា អធិការនគរបាលស្រុកប្រាសាទបាគង បានឱ្យដឹងថា កុមារារងគ្រោះដែលស្លាប់ឈ្មោះ ផាង ផល្លា អាយុ១ខួប២ខែ និងមានម្តាយឈ្មោះ សោម សុខម អាយុ២៨ឆ្នាំ ។ ចំណែកជនសង្ស័យជាឪពុកឈ្មោះ ផ្លាយ វិភាត់ អាយុ៣១ឆ្នាំ។ អ្នកទាំង៣រស់នៅភូមិតាប្រាក់ ឃុំមានជ័យ ស្រុកប្រាសាទបាគង្គ ខេត្តសៀមរាប ។
លោក អធិការនគរបាលស្រុកប្រាសាទបាគងបានបន្តថា ក្រោយពេលកើតហេតុ កម្លាំងជំនាញរបស់អធិការនគរបាលស្រុកប្រាសាទបាគងបានចុះមកដល់កន្លែងកើតហេតុ រួចធ្វើការសាកសួរម្តាយក្មេងប្រុសរងគ្រោះបានប្រាប់សមត្ថកិច្ចនៅវេលាម៉ោង៧និង២០នាទីយប់ថ្ងៃទី២៧ មិថុនា ឱ្យដឹងថា មុនពេលកើតហេតុ ជនសង្ស័យជាប្តីបានឈ្លោះប្រកែកគ្នាជាមួយគាត់រឿងទិញបន្លែមិនល្អយកមកធ្វើម្ហូប ពេលនោះពួកគាត់ក៏បានឈ្លោះគ្នាមួយសន្ទុះ លុះក្រោយមកពេលគាត់ដើរទៅយកទឹក ស្រាប់តែជនសង្ស័យជាប្តីក៏បានចាប់លើកកូនយកទៅបោកផ្ទប់នឹងសសរផ្ទះបាយ បណ្តាលឱ្យកូនប្រុសសន្លប់ស្តូកស្តឹងមិនដឹងខ្លួន ហើយជនសង្ស័យជាប្តីថែមទាំងយកកាំបិតរកកាប់កូនទៀតផង ។ បន្ទាប់ពីធ្វើសកម្មភាពរួច ជនសង្ស័យជាប្តីបានរត់គេចខ្លួនបាត់ភ្លាមៗតែម្តង ។
ក្រោយពេលកើតហេតុ ម្តាយបានបញ្ជូនកូនតូចទៅសង្គ្រោះដែរ តែដោយសារស្ថានភាពធ្ងន់ធ្ងរពេក ក្មេងប្រុសរងគ្រោះក៏បានស្លាប់ពេលទៅដល់មន្ទីរពេទ្យ ។
បច្ចុប្បន្ន សមត្ថកិច្ចនគរបាលស្រុកប្រាសាទបាគងកំពុងធ្វើការស្រាវជ្រាវស្វែងរកចាប់ខ្លួនជនសង្ស័យជាឪពុកខាងលើ ដើម្បីយកមកកសាងសំណុំរឿងចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ