ពួកអ្នកវិទ្យាសាស្ត្រអាមេរិកបាននិយាយថា ខ្លួនបានរកឃើញមូលហេតុដែលការផឹកកាហ្វេផ្តល់ផលអវិជ្ជមានដល់ស្ត្រីដែលចង់បានកូន ។ ពួកគេបានរកឃើញថា កាហ្វេអីុនដែលមាននៅក្នុងកាហ្វេបានធ្វើឱ្យអន់ថយការចរាចរពងពីអូវែទៅស្បូន ។ ការសិក្សាលើកមុនៗក៏បានបង្ហាញថា ការផឹកកាហ្វេច្រើននឹងធ្វើឱ្យប៉ះពាល់ដល់ការផ្តល់កំណើតរបស់មនុស្សស្រី ។
ការស្រាវជ្រាវថ្មីចុងក្រោយលើស្ត្រីប្រមាណ៩០០០នាក់ ចុះផ្សាយក្នុងព្រឹត្តិប័ត្រBritish Journal of Pharmacology បានរកឃើញថា ស្ត្រីដែលផឹកកាហ្វេច្រើនជាង៤ពែងក្នុង១ថ្ងៃបាត់បង់ឱកាសមានគភ៌ដល់ទៅ១/៤។ ទោះជាយ៉ាងណា មូលហេតុពិតប្រាកដក្នុងទំនាក់ទំនងគ្នានេះនៅតែជាអាថ៌កំបាំងនៅឡើយ ។ ប៉ុន្តែ បើតាមការធ្វើពិសោធថ្មីៗបំផុតទៅលើសត្វកណ្តុរបានបង្ហាញថា សារធាតុកាហ្វេអីុនបានរារាំងដំណើរខ្ជឹបរបស់បំពង់ដៃស្បូន(Fallopian tubes)ដែលមានតួនាទីនាំយកពងទៅស្បូន ។
អ្នកដឹកនាំការស្រាវជ្រាវ មកពីសាកលវិទ្យាល័យនេវ៉ាដា សហរដ្ឋអាមេរិកបាននិយាយថា៖ «ការរកឃើញលើកនេះបានផ្តល់នូវការពន្យល់ដែលប្រកបដោយក្តីបារម្ភមួយដោយបានបញ្ជាក់មូលហេតុដែលថា បណ្តាស្ត្រីមានសារធាតុកាហ្វអីុនខ្ពស់នៅក្នុងខ្លួន ជារឿយៗត្រូវការរយៈពេលយូរក្នុងការមានគភ៌បើប្រៀបធៀបទៅនិងបណ្តាស្ត្រីដែលមិនមានសារធាតុកាហ្វេអីុននៅក្នុងខ្លួន ៕
ចែករំលែកព័តមាននេះ