រាជធានីភ្នំពេញ៖ រហូតមកដល់ពេលនេះតារាកំប្លែងនាយចេក នៅតែមិនមានឱកាសបានចូលលេងកំប្លែងនៅក្នុងក្រុមនាយកុយ ជាថ្មីវិញទេ ។ នាយចេក បានសម្តែងក្តីអស់សង្ឃឹម ដ្បិតនៅមិនទាន់មានសញ្ញាវិជ្ជមានណាមួយ ក្នុងការបានចូលរួមសម្តែងវិញ ក្នុងពេលដែលលោកកំពុងមានភាពត្រដាបត្រដួលនៅលើផ្នែកជីវភាពផងនោះ…
រាជធានីភ្នំពេញ៖ រហូតមកដល់ពេលនេះតារាកំប្លែងនាយចេក នៅតែមិនមានឱកាសបានចូលលេងកំប្លែងនៅក្នុងក្រុមនាយកុយ ជាថ្មីវិញទេ ។ នាយចេក បានសម្តែងក្តីអស់សង្ឃឹម ដ្បិតនៅមិនទាន់មានសញ្ញាវិជ្ជមានណាមួយ ក្នុងការបានចូលរួមសម្តែងវិញ ក្នុងពេលដែលលោកកំពុងមានភាពត្រដាបត្រដួលនៅលើផ្នែកជីវភាពផងនោះ ។
ក្នុងវ័យ៦៣ឆ្នាំលោកឈុំ ប៊ុនឈឿន ហៅនាយចេក បានអះអាងប្រាប់កោះសន្តិភាពកាលពីពេល ថ្មីៗកន្លងមកតាមសារអេឡិចត្រូនិកថា ក្រោយពេលដែលកម្មវិធីកំប្លែងបានចាប់ដំណើរការឡើងវិញ លោកតែងតែព្យាយាមទាក់ទងសុំនាយកុយ និងនាយកយ ពីបំណងចង់ចូលលេងកំប្លែងក្នុងក្រុមវិញដែរ ប៉ុន្តែរហូតមកដល់ពេលនេះនៅមិនទាន់បានទទួលដំណឹងអ្វីនៅឡើយទេ ។ លោកក៏មិនហ៊ានទាក់ទងទៅមេក្រុមញឹកញាប់ទៀតដែរ ព្រោះខ្លាចចិត្ត ។
នាយចេកថា «អត់ដែលឮគេហៅលេងទៀតទេ ខ្ញុំក៏មិនដឹងហេតុអីដែរតាំងពីខ្ញុំចេញពីពេទ្យមក ខ្ញុំបានតេទៅសួរកូនគាត់(នាយកយ កូនរបស់នាយកុយ)ដែរថាខ្ញុំជាហើយ ហៅខ្ញុំលេងផង ហើយនាយកយ បានត្រឹមឆ្លើយ«បាទ»រហូត ។ កាលពីអំឡុងពេលដែលនាយ សានម៉ៅ សម្តែងបាន មិនទាន់ឈឺនោះ នាយក៏តែងតែជំរុញឲ្យនាយកុយ ហៅលោកទៅសម្តែងឡើងវិញដែរ ប៉ុន្តែនាយកុយ បាននិយាយថា បើហៅគ្នាច្រើនពេកបានលុយពីណាចែក »។
ក្នុងស្ថានភាពបែបនេះ នាយចេកថាចំពោះក្រុមកំប្លែងណាមួយដែលខ្វះតួ ហើយហៅនាយទៅចូលរួមសម្តែងគឺនាយរីករាយទទួលយកដោយមិនប្រកាន់ឡើយ ។ បច្ចុប្បន្នទោះបីអាក់ខានលេងកំប្លែងនៅក្រុមនាយកុយ តែនាយឲ្យដឹងថា នាយក៏មានឱកាសបានសម្តែងកាត់សក់មង្គលការ ខ្លះៗដែរ។ ក្រៅពីនេះរាល់ថ្ងៃចន្ទ នាយបានសម្ដែងនៅផ្សារាត្រី ។
ក្រៅពីអាជីពសិល្បៈ នាយចេក បានប្រកបរបរលក់ភេសជ្ជៈតាមផ្លូវជាតិលេខ២ ជិតរង្វង់មូលកួរស្រូវ ចំណែកថ្ងៃសៅរ៍ និងអាទិត្យទៅជួយលក់ផ្លែឈើកូននៅគិរីរម្យ ។ របរលក់ភេសជ្ជៈនេះ នាយចេកថាចំណេញតិច ប៉ុន្តែនាយបានកម្រៃខ្លះពីការជួយលក់ផ្លែឈើកូនគ្រាន់ដោះស្រាយជីវភាព ។
ប្រាក់សោធននិវត្តន៍ និងកម្រៃពីការលក់ដូរបនាយចេក បានលៃលកពីការបង់សងធនាគារ យកទៅទិញសម្ភារសំណង់ខ្លះសម្រាប់ជួសជុលផ្ទះដែលមានសភាពទ្រុឌទ្រោម បណ្តើរៗហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ