ក្រុមអ្នកស្រាវជ្រាវមកពីសាកលវិទ្យាល័យTexas Christian University សហរដ្ឋអាមេរិកបានរកឃើញថា ការទទួលទានអាហារដោយទំពារមួយៗអាចជួយកាត់បន្ថយនូវការស្រេកឃ្លាន ។ ការពិសោធលើអ្នកស្ម័គ្រចិត្តដែលមានទម្ងន់ខ្លួនធម្មតានិងធាត់ខ្លាំងបង្ហាញថា ល្បឿននៃការទទួលទានគឺបានប៉ះពាល់លើកាឡូរីដែលត្រូវបានប្រើអំឡុងពេលបាយ ដោយអ្នកមានទម្ងន់ខ្លួនធម្មតាប្រើអស់៨៨គីឡូកាឡូរី ខណៈអ្នកធាត់ប្រើអស់៥៨គីឡូកាឡូរី ។
លោកសាស្ត្រាចារ្យ Meena Shahអ្នកដឹកការសិក្សាបានថ្លែងថា ៖«បន្ថយល្បឿននៃការទទួលទាននាំឱ្យការប្រើប្រាស់ថាមពលថយចុះយ៉ាងច្រើនសម្រាប់បុគ្គលមានទម្ងន់ខ្លួនធម្មតា ប៉ុន្តែសម្រាប់បុគ្គលធាត់ខ្លាំងវិញគឺមានការថយចុះតិចជាង »។
ដោយឡែកអ្នកវិទ្យាសាស្ត្រនៅសាកលវិទ្យាល័យ Harbin Medical Universityប្រទេសចិនបានលើកឡើងថា ការទំពាអាហារឱ្យបានយូរអាចជួយឱ្យចុះទម្ងន់ ។ ការសិក្សាពិសោធលើអ្នកស្ម័គ្រចិត្តជាបុរសពេញកម្លាំង៣០នាក់ចំនួន២លើក(អ្នកធាត់ដុះពោះ១៤នាក់ អ្នកមានរាងកាយសមល្មម១៦នាក់)បានរកឃើញថា អ្នកដែលទំពាអាហារពេញៗមាត់ក្នុង១លើកៗឱ្យបាន៤០ដងអាចបរិភោគអាហារបានតិចជាង១២ភាគរយធៀបទៅនឹងអ្នកដែលទំពា១៥ដងក្នុង១លើកៗ ។
លទ្ធផលខាងលើឱ្យគេសន្និដ្ឋានថា ការទំពាអាហារដោយប្រើពេលយូរ អាចទប់ស្កាត់បាននូវការទទួលទានលើសកំណត់ដោយបានផ្តល់ពេលវេលាបន្ថែមទៀតសម្រាប់ខួរក្បាលក្នុងការទទួលសញ្ញាពីក្រពះ។ ម្យ៉ាងទៀត វាក៏បានធ្វើឱ្យចុះទាបនូវកម្រិតអ័រម៉ូនបញ្ជាការឃ្លាន-ghrelin-ដែលកំពុងចរាចរនៅក្នុងប្រព័ន្ធរំលាយអាហារផងដែរ ។
នៅក្នុងរបាយការណ៍រៀបរាប់ពីការរកឃើញរបស់ខ្លួនដែលបានចុះផ្សាយនៅក្នុងព្រឹត្តិប័ត្រAm-erican Journal of Clinical Nutritionក្រុមអ្នកស្រាវជ្រាវបាននិយាយថា ការទំពាអាហារយឺតៗជាវិធីដ៏ងាយស្រួលមួយនិងមានប្រសិទ្ធភាពដើម្បីកម្ចាត់ចោលបញ្ហាឡើងទម្ងន់ ។ ពួកគេបន្តថា៖«លទ្ធផលនៃការស្រាវជ្រាវលើកនេះចង្អុលបង្ហាញថា ការទទួលទានប្រញាប់ប្រញាល់ទទួលទានចាក់ច្រាសផ្តល់ផលប៉ះពាល់យ៉ាងខ្លាំងលើទម្ងន់ខ្លួន» ៕
ចែករំលែកព័តមាននេះ