រាជធានីភ្នំពេញ ៖ កាលពីសប្ដាហ៍ទី១ការប្រកួតប្រដាល់វគ្គជម្រុះឈានទៅដណ្ដើមខ្សែក្រវាត់កម្ពុជាគុនខ្មែរ កីឡាករកម្ពុជាចំនួន២រូបគឺអេលីត សាន់ មកពីក្លិបឆ្មាសសែនសុខគុនខ្មែរ និងកីឡាករឡូញ វ៉ាន់ឌី មកពីក្លិបពន្លឺវិបុលរិទ្ធី សុទ្ធតែចាញ់ក្រោមកណ្ដាប់ដៃកីឡាករថៃ ។
ដោយឡែកសម្រាប់ការប្រកួតនៅថ្ងៃសៅរ៍ទី២៩ មិថុនា នេះ តើកីឡាករកម្ពុជា សេន កុសល មកពីក្លិបមោងឬស្សីគុនខ្មែរខេត្តបាត់ដំបង និងម៉ឺន មេឃា មកពីក្លិបក្រសួងសេដ្ឋកិច្ច និងហិរញ្ញវត្ថុ អាចស្ដារមុខមាត់កីឡាករកម្ពុជាបានវិញឬអត់ សេន កុសល ជាកីឡាករជើងចាស់មួយរូបដែលមានបទពិសោធន៍ប្រកួតនៅលើសង្វៀនជាយូរឆ្នាំមកហើយ ។
មិនតែប៉ុណ្ណោះប្រវត្តិប្រកួតនៅលើសង្វៀនរបស់គេក៏មិនជាអន់ប៉ុន្មានដែរគឺមានរហូតដល់ទៅ៦១ដង ឈ្នះ៣៩ដង ស្មើ៥ដង ចាញ់១៧ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១០ដង ។ ចំណែកកីឡាករថៃភិតដាំ ស៊ីតចាថង ដែលជាគូប្រកួតរបស់គេវិញធ្លាប់ឡើងសង្វៀនប្រកួតបានរហូតដល់ទៅ៩៣ដង ឈ្នះ៦៦ដងស្មើ៥ដង ចាញ់២២ដង ។ តាមរយៈប្រវត្តិប្រកួត កីឡាករសេន កុសល ប្រហែលជាយ៉ាប់បន្តិចហើយ មិនតែប៉ុណ្ណោះភាគរយនៃការយកឈ្នះកីឡាករថៃមានតិចបំផុត។
ម៉ឺន មេឃា ដែលត្រូវជួបប្រកួតជាមួយកីឡាករថៃ យ៉តនិយម ភុំផាន់មួង ក៏ពិបាកសង្ឃឹមណាស់ដែរដោយសារប្រវត្តិប្រកួតខុសគ្នាឆ្ងាយពេក ។ ម៉ឺន មេឃា គ្រាន់តែជាអ្នកប្រដាល់ជើងថ្មីមួយរូបដែលមានបទពិសោធន៍ប្រកួតនៅលើសង្វៀនតិចតួចបំផុត ដោយធ្លាប់ប្រកួតបានត្រឹមតែ៣៨ដង ឈ្នះ៣៤ដង ចាញ់៤ដង និងធ្លាប់ផ្ដួលគូប្រកួតឱ្យសន្លប់បាន១២ដង។ចំណែកកីឡាករថៃមានប្រវត្តិប្រកួត៧៧ដង ឈ្នះ៦០ដង ចាញ់១២ដង ស្មើ៥ដង និងផ្ដួលគូប្រកួតឱ្យសន្លប់១៥ដង។
រីឯគូប្រកួតមិត្តភាពវិញមាន នី សុភី មកពីក្លិបសាលវ័ន្តកីឡា ប្រកួតជាមួយកីឡាករថៃ ភីតឧប៊ុន សស៊ីតឆសេប៊ុនថាំ ក្នុងប្រភេទទម្ងន់៦៩គីឡូក្រាម ខណៈអេលីត កែវឡុង មកពីក្លិបឆ្មាសសែនសុខគុនខ្មែរ ប្រកួតជាមួយ ពុទ្ធ ម៉ាណូ មកពីក្លិបពុទ្ធសេរីវង្សពោធិសែនជ័យ ៕ (កែសម្រួលដោយ ៖ បុប្ផា)
ចែករំលែកព័តមាននេះ