ខេត្តកំពង់ស្ពឺ ៖ ទំនងជាដឹងថា អ្នកលេងអាប៉ោងជាមួយខ្លួនដឹងពីការលេងប្រើល្បិចបង្កប់តេឡេនោះ បុរសចំណាស់ជាមេបាញ់អាប៉ោង បានវេចលុយរត់គេចពីកន្លែងលេងរហូតដល់ដួលស្លាប់នៅតាមផ្លូវ ។
ការស្លាប់របស់បុរសជាមេអាប៉ោងនេះ ធ្វើឱ្យអាជ្ញាធរ២ឃុំរុញដាក់គ្នា ចំណែកសមត្ថកិច្ចស្រុកថ្ពង ហាក់ បីដូចជាព្រងើយកន្តើយ ខណៈសមត្ថកិច្ចស្រុកឧដុង្គ ដេកយាមសពតាំងពីយប់ ។ ការប្រទះឃើញសពបុរសជាមេអាប៉ោងរូបនេះ គឺកាលពីយប់ថ្ងៃទី២៦ ខែមិថុនា នៅទួលតានក ក្នុងភូមិស្រែអណ្តូង ឃុំទ័ពមាន ស្រុកថ្ពង ។
ជនរងគ្រោះឈ្មោះ ឈៀង ហុី អាយុ៥០ឆ្នាំ មានទីលំនៅក្នុងភូមិស្លា សង្កាត់សុពណ៌ទេព ក្រុងច្បារមន ។
្រភពព័ត៌មានឱ្យដឹងថា មុនពេលកើតហេតុបុរសជាមេបាញ់អាប៉ោងរូបនេះ បានណាត់គ្នាទៅលេងនៅចម្ការស្វាយមួយកន្លែងក្នុងឃុំទ័ពមាន ។ ក្នុងពេលលេង បុរសនេះឈ្នះលុយជាច្រើនធ្វើឱ្យអ្នកលេងផ្សេងទៀត កើតការសង្ស័យក៏យកមេអាប៉ោងពិនិត្យទើបដឹងថា មេអាប៉ោងដែលបុរសនោះបាញ់ គឺជាមេអា ប៉ោងប្រើតេឡេបញ្ជាឱ្យចេញគ្រាប់ណាចេញគ្រាប់នោះ ។
ប្រភពព័ត៌មានបន្តថា ក្រោយពេលបែកការណ៍បុរសរូបនេះ ទំនងជាខ្លាចអ្នកលេងអាប៉ោងជាមួយប្រើហិង្សាមកលើខ្លួន ក៏រត់គេចពីកន្លែងលេង ក៏ដូចជាគេចពីក្រុមអ្នកលេងរហូតទៅដល់ចំណុចខាងលើ ដែលជាប់ព្រំប្រទល់ឃុំជម្ពូព្រឹក្ស ស្រុកឧដុង្គ ក៏ដួលស្លាប់តែម្តង ។
ក្រោយពេលជនរងគ្រោះស្លាប់ ប្រជាពលរដ្ឋក៏រាយការណ៍ទៅសមត្ថកិច្ចឱ្យមកពិនិត្យ តែបែរជាឃើញសមត្ថកិច្ចខាងស្រុកឧដុង្គចុះមកទៅវិញ ។ ដោយសារតែយប់ងងឹតផង សមត្ថកិច្ចបានត្រឹមដេកការពារកន្លែងកើតហេតុ រហូតដល់ព្រឹកថ្ងៃទី២៧ ខែមិថុនា ទើបសមត្ថកិច្ចជំនាញចុះមកពិនិត្យ ដោយមានអាជ្ញាធរឃំុទ័ពមាន និងឃុំជម្ពូព្រឹក្សមកចូលរួមផង ។
ប្រភពពីមន្ត្រីនគរបាលមួយរូបបានបង្ហើបថា ខាងអាជ្ញាធរឃុំទ័ពមាន ហាក់បីដូចជាមិនចង់ទទួលស្គាល់ថា ហេតុការណ៍នេះកើតឡើងក្នុងដែនរដ្ឋបាលរបស់ខ្លួនទេ ដោយរុញទៅឱ្យខាងឃុំជម្ពូព្រឹក្ស ជាអ្នកទទួលទៅវិញ ។
ចំពោះករណីនេះ ខាងឃុំជម្ពូព្រឹក្សមិនជំទាស់ទេ បើសិនជាចំណុចកើតហេតុរកឃើញថា ស្ថិតក្នុងដែនរដ្ឋបាលរបស់ឃុំជម្ពូព្រឹក តែក្នុងផែនទីគឺស្ថិតក្នុងឃុំទ័ពមាន ។ មានការលើកឡើងថា បើចង់ឱ្យខាងឃុំជម្ពូ ព្រឹក្ស ស្រុកឧដុង្គ ទទួលនិងធ្វើរបាយការណ៍ទាល់តែរាល់ការចុះហត្ថលេខាទិញ-លក់ដីប្រគល់មកឱ្យខាងជម្ពូព្រឹក្សជាអ្នកចុះហត្ថលេខា ។
បើទោះជាបែបនេះក្តី សមត្ថកិច្ចខាងស្រុកឧដុង្គ មិនបានរួញរាក្នុងភារកិច្ចនោះទេ បើទោះជាខាងស្រុកថ្ពងហាក់ព្រងើយកន្តើយក្តី ។ ក្រោយពីពិនិត្យរួចរាល់ សពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ (សម្រួលដោយ៖ ស្រីណា)
ចែករំលែកព័តមាននេះ