រាជធានីភ្នំពេញ ៖ ថ្ងៃនេះកម្ពុជារៀបចំការប្រកួតកីឡាហែលទឹកជ្រើសរើសជើងឯកយុវជនអាស៊ីអាគ្នេហ៍លើកទី៤៣ ។ យោងតាមបណ្តាញសង្គមរបស់សម្តេច តេជោ បានឲ្យដឹងថា ថ្ងៃទី២៨ មិថុនានេះ សហព័ន្ធខ្មែរកីឡាហែលទឹក (Khmer Swimming Federation) សូមអញ្ជើញបងប្អូនប្រជាពលរដ្ឋ សិស្សានុសិស្ស និងសាធារណជនទាំងអស់ចូលរួមទស្សនាអោយបានច្រើនកុះករនៅក្នុងកម្មវិធីប្រកួតកីឡាហែលទឹក«ជ្រើសរើសជើងឯកយុវជនអាស៊ីអាគ្នេយ៍» លើកទី៤៣ ឆ្នាំ២០១៩ ដែលមានរយៈពេល៣ថ្ងៃ ចាប់ពីថ្ងៃទី២៨-៣០ ខែមិថុនា ចាប់ពីម៉ោង ៧និង៣០នាទីព្រឹក នៅពហុកីឡដ្ឋានមរតកតេជោ ដែលមានទីតាំងទល់មុខវិមានឈ្នះ-ឈ្នះ រាជធានីភ្នំពេញ ។
ប្រភពបានបន្តថា ការប្រកួតកីឡាហែលទឹកនេះ គឺមានការចូលរួមពីកីឡាករ កីឡាការិនី ជាតិ និងអន្តរជាតិចំនួន៤០៦ រូប មកពី១០ប្រទេស ក្នុងនោះកម្ពុជាមានចំនួន ២០រូប និងបរទេសមានចំនួន ៣៨៦រូប ។ ជាមួយគ្នានោះដែរសម្តេចតេជោក៏បានសូមអញ្ជើញបងប្អូនប្រជាពលរដ្ឋ យុវជនសិស្សានុសិស្ស និងសាធារណជនទាំងអស់ចូលរួមទស្សឲ្យបានច្រើនកុះករ ដើម្បីគាំទ្រ និងផ្តល់កម្លាំងចិត្តដល់កីឡាករ កីឡាការិនីកម្ពុជាវ័យក្មេង និងបានចូលរួមលើកស្ទួយវិស័យកីឡាឲ្យកាន់តែរីកចម្រើនខ្លាំងក្លាឡើង ៕ កែសម្រួលដោយ ៖ សុឃាក់
ចែករំលែកព័តមាននេះ