ខេត្តបាត់ដំបង ៖ តាមសេចក្តីរាយការណ៍បឋមបានឲ្យដឹងថា បុរសម្នាក់បានរងរបួសជើងម្ខាងយ៉ាងធ្ងន់ធ្ងរ ដោយសារដើរជាន់គ្រាប់មីន ពេលកំពុងកាប់ព្រៃក្នុងចម្ការ កាលពីវេលាម៉ោង៣រសៀល ថ្ងៃទី២៧ មិថុនានេះ នៅខាងមុខបន្ទាយយោធាមួយកន្លែង ដែលស្ថិតនៅភូមិភ្នំរ៉ៃ ឃុំតាតោក ស្រុកសំឡូត។
សេចក្តីរាយការណ៍បានបន្ត សមត្ថកិច្ចបានឲ្យដឹងថា ជនរងគ្រោះឈ្មោះ ញ៉ែម ធឿន អាយុ៤៧ឆ្នាំ រស់នៅភូមិភ្នំរ៉ៃ ឃុំតាតោក ស្រុកសំឡូត ។ បុរសនេះរងបួសជើងម្ខាង ដោយសារដើរជាន់គ្រាប់មីនដែលកប់នៅក្នុងដី ដែលសេសសល់ពីសម័យសង្គ្រាម ខណៈពេលគាត់កំពុងកាប់ព្រៃក្នុងចម្ការ ។ សមត្ថកិច្ចបានបញ្ជាក់ថា បើពិនិត្យលើស្ថានភាពរបួស ជនរងគ្រោះអាចនឹងត្រូវពិការជើងម្ខាង ព្រោះគ្រាប់មីនដែលផ្ទុះនោះ ជាប្រភេទមីនស្គរ ដែលមានកម្លាំងខ្លាំង ។
មន្ត្រីយោធាម្នាក់និយាយថា ចំណុចគ្រោះថ្នាក់នោះ នៅក្បែរបន្ទាយយោធា ហើយនៅព្រៃច្រើនមិនសូវមានមនុស្សចូលរុករានព្រៃនោះទេ ដោយសារតែខ្លាចគ្រាប់មីន ។ ប៉ុន្តែនៅថ្ងៃកើតហេតុនោះជនរងគ្រោះបានចូលកាប់ព្រៃ ស្រាប់តែជាន់មីនផ្ទុះរងរបួសតែម្ដង ។ មន្ត្រីដដែលបានបញ្ជាក់ថា គ្រាប់មីននោះកប់ក្នុងដីដែលសេសសល់ពីសម័យសង្គ្រាម តែមិនទាន់មានអង្គភាពកំចាត់មីនណាចូលបោសសំអាតនៅឡើយទេ ទើបនៅសេសសល់រហូតមកដល់ពេលនេះ ។
ទោះយ៉ាងណា បើតាមសមត្ថកិច្ចបានប្រាប់ថា បន្ទាប់ពីគ្រោះថ្នាក់បានកើតឡើងជនរងគ្រោះត្រូវបានបញ្ជូនទៅកាន់មន្ទីរពេទ្យភ្លាមៗ ដើម្បីសង្គ្រោះតែទំនងអាចនឹងត្រូវពីការជើងម្ខាង ព្រោះរបួសធ្ងន់ធ្ងរពេក ៕ កែសម្រួលដោយ ៖ សុឃាក់
ចែករំលែកព័តមាននេះ