ខេត្តកំពង់ឆ្នាំង ៖ ស្ត្រីឈ្មោះលី ម៉ារី អាយុ៥៥ឆ្នាំ ជាប្រជាពលរដ្ឋខ្មែរ-ឥស្លាម និងជាស្ត្រីមេម៉ាយក្រីក្រ
ម្នាក់ រស់នៅភូមិច្រករមៀត ឃុំឈូកស ស្រុកកំពង់ត្រឡាច ដោយមានការគាំទ្រពីប្រជាពលរដ្ឋនៅក្នុងភូមិជាង២០០នាក់ផង កាលពីព្រឹកថ្ងៃទី២៦ មិថុនា បានអំពាវនាវស្នើសុំដល់លោករដ្ឋមន្ត្រីក្រសួងយុត្តិធម៌ និងសម្ដេចតេជោ ហ៊ុន សែន មេត្តាជួយផ្ដល់យុត្តិធម៌ជូនគាត់ ខណៈដែលប្រជាពលរដ្ឋខ្មែរ-ឥស្លាមជាអ្នកមាន១ គ្រួសារនៅជាប់ព្រំផ្ទះគ្នា និងត្រូវជាបងប្អូនជីដូនមួយគ្នាផង បានលួចធ្វើប្លង់ដីលំនៅឋានយកធ្វើកម្មសិទ្ធិរំលោភយកដីរបស់គាត់ ដែលបានកាន់កាប់គ្រប់គ្រង និងរស់នៅតាំងពីឆ្នាំ 1979 រហូតមក។
ទាក់ទងនឹងរឿងរ៉ាវខាងលើនេះស្ត្រីរងគ្រោះជាចុងចម្លើយបានរៀបរាប់ឲ្យដឹងថា ក្រោយឆ្នាំ 1979 គាត់ចំនួន៣គ្រួសារបានមករស់នៅលើដីនេះដែលមានទំហំទទឹង5ម៉ែត្រ បណ្តោយ25ម៉ែត្រ ស្រាប់តែនៅឆ្នាំ 1992 ឈ្មោះលី ហាំម៉ាត់ ជាដើមបណ្តឹង ដែលរស់នៅជាប់នឹងព្រំដីរបស់គាត់ បានលួចវាស់ដីធ្វើប្លង់ដី កម្មសិទ្ធិ ហើយបានប្ដឹងគាត់នៅតុលាការសាលាដំបូងខេត្ត រហូតដល់តុលាការកំពូល ដោយតុលាការកាត់អោយគាត់ លី ម៉ារី ចាញ់ក្តី និងឲ្យរើរុះផ្ទះចេញពីលំនៅឋានពីដីរបស់គាត់ ដើម្បីប្រគល់ដីគាត់អោយឈ្មោះ លី ហាំម៉ាត់ យ៉ាងអយុត្តិធម៍ ។
ជាមួយគ្នានេះ លោក យូ សុះ ជាហាគឹមទួនរង នៃ ព្រះវិហារឥស្លាមភូមិច្រករមៀត ដែលនៅជាប់នឹងដីលំ នៅដ្ឋានរបស់គាត់ខាងលើនេះ ក៏បានបញ្ជាក់ឲ្យដឹងថា៖ តាំងពីដើមរៀងមកគឺគាត់ និងប្រជាពលរដ្ឋឥស្លា ម សុទ្ធតែបានដឹងឮថា ឈ្មោះ លី ម៉ារី នេះពិតជាបានសង់ផ្ទះរស់នៅលើដីនេះតាំងពីឆ្នាំ១៩៧៩រហូតមក ពុំដែលមានទំនាស់អ្វីឡើយ ។
លោកបញ្ជាក់ថា កាលលើកមុន ខាងសប្បុរសជន អាមេរិក គេចង់ពង្រីកផ្លូវជុំវិញ ព្រះវិហារ ហើយប៉ះពាល់ដល់ដីឈ្មោះ លី ម៉ារី ប៉ុន្តែក្រោយមកសប្បុរសជនបានផ្អាកវិញ គឺលោកជាអ្នកប្រគល់ផ្ទាល់ អោយដីនោះ ទៅឈ្មោះ លី ម៉ារី វិញ ព្រោះជាដីម្ចាស់ដើមគេ ។ ចំពោះការប្ដឹងទាមទារយកដីរបស់ ស្ត្រីមេម៉ាយឈ្មោះ លី ម៉ារី នេះពីសំណាក់លោក លី ហាំម៉ាត់ គឺពិតជាអយុត្តិធម៌ខ្លាំងណាស់ ដោយសារ គេជាអ្នកមានលុយទើបឈ្នះក្តីមួយនេះ ។
ដូច្នេះ ក្នុងរឿងដ៏អយុត្តិធម៌ខាងលើនេះ ប្រជាពលរដ្ឋ អាជ្ញាធរ និងស្ត្រីរងគ្រោះ គោរពស្នើសុំក្រុមប្រឹក្សាអង្គចៅក្រម ក្រសួងយុត្តិធម៌ ពិសេសសម្តចតេជោ ហ៊ុនសែន មេត្តាជួយសើរើស្រាវជ្រាវសំណុំរៀងនេះអោយដល់មូលដ្ឋាន និងស្នើសុំជុំនុំជំរះរឿងក្តីនេះឡើងវិញ ដោយយុត្តិធម៌ជូនប្រជាពលរដ្ឋក្រីក្រជាជនរងគ្រោះផង ។
ដោយឡែក ភាគីដើមបណ្តឹង លោក លី ហាំម៉ាត់ វិញនៅព្រឹកថ្ងៃទី 26 ខែមិថុនានេះ បានបញ្ជាក់ឲ្យ ក្រុ មអ្នកយកព័ត៌មានយើងដឹងថា ៖ លោកបានកាន់កាប់ដីនេះទំហំក្បាលដី 25 ម៉ែត្រ ចាប់ពីជើងដល់ត្បូង ទល់ និងវិហារឥស្លាម ដោយគ្មាននរណារស់នៅទេ គឺតាំងពីអំឡុងដើមឆ្នាំ 1979 នឹងបានធ្វើប្លង់កម្មសិទ្ធស្របច្បាប់នៅក្នុងឆ្នាំ1992ទៀតផង ។
ចំពោះ ឈ្មោះ លី ម៉ារី ទើបតែមកសង់ផ្ទះ រស់នៅលោកដីកម្មសិទ្ធរបស់គាត់នេះ ក្នុងអំឡុងឆ្នាំ 1996 តែប៉ុណ្ណោះ ។ ហើយរឿងនេះតុលាការគ្រប់ថ្នាក់បានកាត់អោយលោកឈ្នះក្តីហើយ ដូចនេះ លោកសំណូមពរ ដល់អាជ្ញាធរ និងតុលា ការជួយពន្លឿន ការអនុវត្តន៍សាលដីការតុលាការកំពូល ដើម្បីយកដីទំនាស់ខាងលើនេះ ជូនគាត់កាប់កាន់ដោយស្របច្បាប់វិញផង ។
ជុំវិញបញ្ហាទំនាស់ដីធ្លីនេះ យើងមិនអាចថា៖ ខាងណាខុស ខាងណាត្រូវនោះទេ ប៉ុន្តែប្រជាពលរដ្ឋ នៅក្នុងភូមិច្រករមៀត ចំនួន265នាក់បានផ្ដិតមេដៃគាំទ្រ ស្ត្រីមេម៉ាយ លី ម៉ារី ជាមួយគ្នានេះអតីតមេឃុំ និងអនុភូមិចាស់ បានធ្វើលិខិតទទួលស្គាល់ថា ស្ត្រី លី ម៉ារី ពិតជាបានរស់នៅលើដីនេះតាំងពីឆ្នាំ១៩៧៩មែន ៕ (សម្រួលដោយ៖ ស្រីណា)
ចែករំលែកព័តមាននេះ