ខេត្តប៉ៃលិន ៖ រឿងរ៉ាវគ្រាប់មីន មិនមែនជារឿងលេងសើចទេ ព្រោះវាគ្រោះថ្នាក់ឆក់យកជីវិតប្រជាពលរដ្ឋស្លូតត្រង់បានគ្រប់ពេលវេលា ។ យ៉ាងណាមិញ កន្លងមកធ្លាប់តែមានករណីប្រទះគ្រាប់មីន ឬគ្រាប់មិនទាន់ផ្ទុះកប់ក្នុងដី ឬក៏ត្រូវគេរើសយកទុកកន្លែងខ្ទមអ្នកតា និងតំបន់ទីទួលផ្សេងៗ ។
តែនៅខេត្តប៉ៃលិន កាលពី ថ្ងៃទី២៥ ខែមិថុនា ២០១៩នេះ! ស្រាប់តែមានករណីនាំគ្រាប់មីនដល់ផ្ទះតែម្តង ។ នេះបើយោងតាមលោក ហេង រតនា ប្រធានមជ្ឈមណ្ឌលជាតិកម្ចាត់មីនកម្ពុជា (CMAC) ។
ប្រភពដដែលបានស្រង់សម្តីស្ត្រីម្ចាស់ផ្ទះថា « ពូស៊ីម៉ាក់ខ្ញុំទិញតែដីទេ ខ្ញុំមិនទិញគ្រាប់មីនទេព្រោះខ្ញុំដឹងថាខុសច្បាប់!» ។ ជាការឆ្លើយតបក្នុងន័យប្រៀបធៀបលេងសើចតិចតួចនោះ មន្ត្រីស៊ីម៉ាក់បានសាកសួរទៅម្ចាស់ផ្ទះនោះថា តើគាត់បានទិញដីកន្លែងណា មានប្លង់ទេ ខ្ញុំឆែកមើលផែនទីសិនក្រែងប៉ះចំលើចំការមីន!
ស្ត្រីម្ចាស់ផ្ទះបានបញ្ជាក់ថា «មិនមែនអ៊ីចឹងទេពូស៊ីម៉ាក! ខ្ញុំទិញដីមួយឡានចាក់បំពេញដីក្នុងផ្ទះហ្នឹងណា តែមានគ្រាប់មីននៅពេលកាយដីឡាននោះមកចាក់ផ្ទះ! មកពូស៊ីម៉ាក់ឯង មកមើលគ្រាប់មីនជាក់ស្តែងហ្នមក ស្រួលយល់គ្នា!» ។ មន្ត្រីស៊ីម៉ាក់បានឆ្លើយតបថានេះគឺពិតជា សំណាងមួយក្នុងតែ១ម៉ឺនគ្រោះថ្នាក់! ពេលនោះ ស្ត្រីម្ចាស់ផ្ទះក៏តបថា « ខ្ញុំសំណាងអ៊ឺចឹងកាយជិតត្រូវគ្រាប់មីន! ហើយថ្ងៃស្អែកនឹងនាំសមាជិកគ្រួសារទាំងអស់ទៅស្រោចទឹកឱយបាន៧វត្ត!» ។
មិនមែនលែងសើចទេ នេះគឺជារឿងពិតដែលម្ចាស់ផ្ទះមួយកន្លែងទិញដីចាក់បំពេញនៅដីលំនៅឋានបែរជាដឹកទាំងដី ដឹកទាំងគ្រាប់មីនមកជាមួយមួយគ្រាប់ផងដែរ ៕កែសម្រួលដោយ ៖ សុឃាក់
ចែករំលែកព័តមាននេះ