រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៦ ខែមិថុនា បានលើកយកសំណុំរឿងក្លែងហត្ថលេខាសម្ដេចនាយករដ្ឋមន្ត្រី ឆបោកអតីតរដ្ឋមន្ត្រីក្រសួងវប្បធម៌លើទឹកប្រាក់ចំនួន២៥ ម៉ឺនដុល្លារអាមេរិក បើកសវនាការជំនុំជម្រះទោស ។…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៦ ខែមិថុនា បានលើកយកសំណុំរឿងក្លែងហត្ថលេខាសម្ដេចនាយករដ្ឋមន្ត្រី ឆបោកអតីតរដ្ឋមន្ត្រីក្រសួងវប្បធម៌លើទឹកប្រាក់ចំនួន២៥ ម៉ឺនដុល្លារអាមេរិក បើកសវនាការជំនុំជម្រះទោស ។
ជនជាប់ចោទមានឈ្មោះ ឯម អេង ភេទប្រុស អាយុ៥២ឆ្នាំ ជាប់ចោទពីបទក្លែងលិខិតសាធារណៈ និងប្រើប្រាស់លិខិតសាធារណៈក្លែង តាមមាត្រា៦២៦ នៃក្រមព្រហ្មទណ្ឌ ប្រព្រឹត្តកាលពីថ្ងៃទី២៧ ខែធ្នូ ឆ្នាំ២០១៧ នៅរាជធានីភ្នំពេញ ។
គួរបញ្ជាក់ថា អង្គហេតុនៃរឿងក្ដីនេះ បានកើតឡើងនៅថ្ងៃទី២៧ ខែធ្នូ ឆ្នាំ២០១៧ ដើមចមផ្ដើមចេញពីព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ អតីតរដ្ឋមន្ត្រីក្រសួងវប្បធម៌ ដែលបានចូលនិវត្តទៅហើយនោះ លោកចង់បានដី និងផ្ទះមួយកន្លែងនៅក្បែរព្រះបរមរាជវាំង សម្រាប់រស់នៅផ្ទាល់ខ្លួន តែមិនដឹងធ្វើដូចម្ដេច ដើម្បីសុំការយល់ព្រមពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា។ លុះក្រោយមកព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ បានជួបទំនាក់ទំនងជាមួយឈ្មោះ ឯម អេង (ជនជាប់ចោទ) ពេលនោះជនជាប់ចោទក៏បានធានាស្វែងរកលិខិត និងហត្ថលេខាបញ្ជាក់ពីសម្ដេចតេជោ ដើម្បីរកដីសមរម្យមួយកន្លែងនោះ ប៉ុន្តែត្រូវចំណាយលុយកាក់អស់ប្រមាណ២៥ម៉ឺន ដុល្លារអាមេរិក ។
គួរបញ្ជាកបន្តថា បន្ទាប់មកព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ ក៏បានយល់ព្រមប្រគល់ប្រាក់ចំនួន២៥ម៉ឺនដុល្លារឲ្យទៅជនជាប់ចោទ(ឯម អេង) ដើម្បីធ្វើកិច្ចការនោះ ។ ក្រោយមកជនជាប់ចោទ ក៏បានយកលិខិតស្នើសុំដែលមានហត្ថលេខាបញ្ជាក់របស់សម្ដេចតេជោ ហ៊ុន សែន ទៅប្រគល់ឲ្យព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ ប៉ុន្តែជាលិខិតនោះអាជ្ញាធរមិនទទួលស្គាល់ទេ ព្រោះជាលិខិត និងហត្ថលេខាក្លែងក្លាយ ។
ដោយពិនិត្យឃើញថា ឯកសារដែលជនជាប់ចោទប្រគល់ឲ្យនោះជាឯកសារក្លែងក្លាយ ព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ ក៏បានដាក់ពាក្យបណ្ដឹងទៅកាន់ក្រសួងមហាផ្ទៃ ដើម្បីឲ្យសមត្ថកិច្ចនគរបាលព្រហ្មទណ្ឌបើកការស៊ើបអង្កេត និងស្រាវជ្រាវរកឃើញការពិត ។
ចុងក្រោយលិខិតនោះ គឺជាលិខិតដែលចុះហត្ថលេខាក្លែងក្លាយមែន ដូច្នោះហើយសមត្ថកិច្ចបាន ចាប់ខ្លួនជនជាប់ចោទឈ្មោះ ឯម អេង បញ្ជូនទៅសាលាដំបូងរាជធានីភ្នំពេញ ទើបមានការឃុំខ្លួនជនជាប់ចោទចាប់ពីពេលនោះមក ។
ទោះយ៉ាងណាសាលក្រម និងសម្រេចទោសលើជនជាប់ចោទក្លែងឯកសារ និងហត្ថលេខាក្លែងរបស់នាយករដ្ឋមន្ត្រី ពីបទ ឆបោអតីតរដ្ឋមន្ត្រីក្រសួងវប្បធម៌នេះ នៅថ្ងៃទី៤ ខែកក្កដា ដើមខែខាងមុខនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ