រាជធានីភ្នំពេញ ៖ មានការភ្ញាក់ផ្អើលមួយនៅចំណុចភ្លើងស្តុបរោងភាពយន្តលុច្សកែងមហាវិថីព្រះនរោត្តម និងផ្លូវលេខ១៥៤ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ កាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី៣ មីនា ខណៈពេលរថយន្តឡិចស៊ីស ស៊េរី RX300 ពណ៌ស្ករ ពាក់ស្លាកលេខភ្នំពេញ 2H-3678 បានបុកម៉ូតូមួយគ្រឿង ជាប់ក្រោមរថយន្តអូសជិតមួយរយម៉ែត្របែកផ្កាភ្លើងពេញថ្នល់ ទើបឈប់នាំគ្នារត់ចោលរថយន្ត ។
ប្រភពពីមន្ត្រីប៉ូលិសបានឱ្យដឹងថា មុនពេលកើតហេតុ មានម៉ូតូមួយគ្រឿងម៉ាកសេ១២៥ ពណ៌ខ្មៅ ជិះគ្នាបីនាក់ក្នុងនោះមានស្រ្តីម្នាក់ផងបើកតាមបណ្តោយផ្លូវលេខ១៥៤ ឆ្ពោះទៅទិសខាងលិច លុះដល់កែងមហាវិថីព្រះនរោត្តម ម្តុំភ្លើងស្តុបរោងភាពយន្តលុច្ស ក៏បត់ឆ្វេង ។ ស្របពេលនោះរថយន្តម៉ាកឡិចស៊ីសស៊េរី RX300 ពណ៌ស្ករ ពាក់ស្លាកលេខភ្នំពេញ 2H-3678 ដែលកំពុងបើកបរលើកំណាត់មហាវិថីព្រះនរោត្តមទៅទិសខាងត្បូងក្នុងល្បឿនលឿន មកដល់ភ្លើងស្តុបរោងភាពយន្តលុច្សបើកវ៉ារថយន្តមួយទៀត ក៏ជ្រុលបុកម៉ូតូពេញទំហឹងបណ្តាលឱ្យអ្នកជិះម៉ូតូប៉ើងទាំងបីនាក់ ចេញពីម៉ូតូដេកដួលរដូករណែលលើថ្នល់ ខ្លះបាក់ដៃ ខ្លះបាក់ជើង ។ រីឯរថយន្តខំព្យាយាមបើករត់ទាំងជាប់ម៉ូតូពីក្រោមពោះបែកផ្កាភ្លើងពេញថ្នល់បង្កឱ្យមានការភ្ញាក់ផ្អើល លុះដល់មុខអង្គភាពប្រឆាំងអំពើពុករលួយ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ ទើបឈប់រថយន្តនាំគ្នារត់គេចខ្លួនបាត់អស់។
មន្រ្តីនគរបាលប៉ុស្តិ៍រដ្ឋបាលផ្សារថ្មីទី៣បានឱ្យដឹងថា ភាគីម៉ូតូមានគ្នាបីនាក់ ក្នុងនោះមានស្រ្តីមា្នក់ផង ពួកគេសុទ្ធតែរងរបួសធ្ងន់អ្នកខ្លះបាក់ដៃ អ្នកខ្លះបាក់ជើង រីឯម៉ូតូខូចខាតស្ទើរទាំងស្រុង។ ចំណែករថយន្តផ្ទុះពោងការពារទាំងពីរ និងខូចរថយន្តផ្នែកខាងមុខ។ ជនរងគ្រោះបីនាក់ ក្នុងនោះមានស្រ្តីម្នាក់កំពុងព្យាបាលនៅមន្ទីរពេទ្យកាល់ម៉ែត ៕
ចែករំលែកព័តមាននេះ