ខេត្តកំពង់ឆ្នាំង ៖ ក្រោយពេលក្រុមជួយសង្គ្រោះព្យាយាមរុករកក្នុងគំនរអគារ៧ជាន់ដែលបាក់នៅខេត្តព្រះសីហនុ ហើយប្រទះឃើញសពជនរងគ្រោះក្រោយគេចំនួន២នាក់ កាលពីល្ងាចថ្ងៃទី២៤ ខែមិថុនា ត្រូវបានក្រុមការងារដឹកសពជនរងគ្រោះទាំង២នាក់មកដល់លំនៅដ្ឋានហើយកាលពីនៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៥ ខែមិថុនា ឆ្នាំ២០១៩ ស្ថិតក្នុងភូមិទ័ពត្បែងឃុំពង្រ ស្រុករលាប្អៀរ ខេត្តកំពង់ឆ្នាំង ។
ក្រុមគ្រួសារជនរងគ្រោះដែលកំពុងទន្ទឹងរង់ចាំទទួលសពយកមកធ្វើបុណ្យបានឲ្យដឹងថា សពជនរងគ្រោះម្នាក់ឈ្មោះ ប៊ុន ម៉ៅ ភេទប្រុស អាយុ៥២ឆ្នាំ មានប្រពន្ធឈ្មោះ ម៉ៅ ចិន អាយុ៥០ ឆ្នាំ មានកូន៣នាក់ ក្នុងបន្ទុក ។ ចំណែកសពជនរងគ្រោះម្នាក់ទៀតឈ្មោះ គឹម សុខហៀង ភេទប្រុស អាយុ២៩ឆ្នាំ មានប្រពន្ធឈ្មោះគៀង ហៀង អាយុ២៩ឆ្នាំ កំពុងមានផ្ទៃពោះ៨ខែ និងមានកូនម្នាក់ អាយុ៦ឆ្នាំ ។ ក្រុមគ្រួសារនៃសពជនរងគ្រោះទាំង២នាក់ខាងលើ មានទីលំនៅក្នុងភូមិឃុំជាមួយគ្នា។
កាលពីព្រឹកថ្ងៃទី២៥ ខែមិថុនានេះដែរ គេសង្កេតឃើញ លោក ប៊ុន ចាន់វណ្ណៈ រដ្ឋលេខាធិការក្រសួងអភិវឌ្ឍន៍ជនបទ តំណាងរបស់លោកបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ រួមនិងអភិបាលស្រុក ប្រធានក្រុមប្រឹក្សា ស្រុករលាប្អៀរ លោកមេឃុំ និងមន្ត្រីរាជការក៏បានចុះសាកសួរសុខទុក្ខដល់ក្រុមគ្រួសារនៃសពជនរងគ្រោះទាំង២នាក់នេះផងដែរ ។ ជាមួយគ្នានេះ លោកប៊ុន ចាន់វណ្ណៈ ក៍បានប្រគល់ជូនថវិការរបស់លោកបណ្ឌិត អ៊ុក រ៉ាប៊ុន ដោយក្នុងមួយគ្រួសារទទួលបានចំនួន១លានរៀល សម្រាប់ចាត់ចែងធ្វើបុណ្យសពតាមប្រពៃណី ។
ក្នុងឱកាសនោះដែរ ស្ត្រីឈ្មោះ គឹម សុខហៀង ត្រូវជាបងស្រីរបស់ក្រុមគ្រួសារនៃសពជនរងគ្រោះបានថ្លែងអំណរគុណយ៉ាងជ្រាលជ្រៅដល់ក្រុមការងារ ដែលបានរុករករហូតឃើញសពជនរងគ្រោះ ដែលត្រូវជាប្តី ជាឪពុក និងដឹកយកមកដល់លំនៅដ្ឋានប្រគល់ជូនក្រុមគ្រសារដើម្បីរៀបចំធ្វើបុណ្យតាមប្រពៃណី។ ជាមួយគ្នានេះ ក៍សូមថ្លែងអំណរគុណដល់សម្តេចតេជោ ហ៊ុន សែន និងសម្តេចកិត្តិព្រិទ្ឋបណ្ឌិត ប៊ុន រ៉ានី ហ៊ុន សែន ដែលបានយកចិត្តទុកដាក់ជួយសង្គ្រោះ និងផ្តល់ថវិកាដល់ជនរងគ្រោះទាំងអស់ សូមសម្តេចទាំងពីរជួបតែពុទ្ធពរទាំង៤ប្រការ គឺអាយុវណ្ណៈ សុខៈ និងពលៈ កុំបីឃ្លៀងឃ្លាតឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ