ខេត្តកណ្ដាល ៖ ព្រះគ្រូសូត្រស្ដាំមួយអង្គក្រោយពេលឆាន់បបរព្រឹករួច ព្រះអង្គបានចូលទៅសឹងនៅក្នុងបន្ទប់លើសាលាឆាន់ ហើយក៏ស្រាប់តែមិនឃើញតើនឡើង(មិនឃើញភ្ញាក់ពីដេក) និងមិនឃើញចេញមកក្រៅបន្ទប់ដូចសព្វមួយដងសោះ ហើយដោយមានការងឿងឆ្ងល់ ព្រះចៅអធិការក៏បានទៅគោះទ្វារ និងស្រែកហៅ ប៉ុន្តែមិនបានឮព្រះអង្គឆ្លើយតបឡើយ ក៏ធ្វើឲ្យមានការសង្ស័យយ៉ាងខ្លាំង ទើបព្រះចៅអធិការឲ្យព្រះសង្ឃផ្សេងទៀតគាស់បង្អួចចូលទៅមើល ស្រាប់តែឃើញព្រះគ្រូសូត្រស្តាំសុគតបាត់ទៅហើយ ទើបបង្កឲ្យមានការភ្ញាក់ផ្អើលយ៉ាងខ្លាំងតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង៦ល្ងាចថ្ងៃទី២៥ ខែមិថុនា ឆ្នាំ២០១៩ នៅក្នុងបន្ទប់លើសាលាឆាន់ វត្តឆក់ឈើនាង ស្ថិតនៅក្នុងភូមិឆក់ឈើនាង ឃុំឆក់ឈើនាង ស្រុកអង្គស្នួល ខេត្តកណ្តាល។
ព្រះគ្រូសូត្រស្ដាំដែលសុគតនោះព្រះនាម ផុន មាន ព្រះជន្ម៧០វស្សា គង់នៅវត្តឆក់ឈើនាង ហើយមុនសាងផ្នួស ព្រះអង្គមានប្រពន្ធ និងកូនប្រុសស្រី២នាក់ ។
តាមប្រភពពីព្រះចៅអធិការវត្តខាងលើព្រះនាម ហំ ចន្ទ័វលក្ខ័ ព្រះជន្ម២៦វស្សា បានមានសង្ឃដីកាថា ព្រះគ្រូសូត្រស្ដាំអង្គនេះមានអាពាធប្រចាំព្រះកាយច្រើនមុខដូចជា រលាក ទងសួត ឫសដូងច្រមុះ និងជម្ងឺផ្សេងទៀតអស់រយៈពេលជាច្រើនឆ្នាំមកហើយ និងព្យាបាលមិនជាសោះ។
ព្រះចៅអធិការវត្តមានសង្ឃដីកាបន្តថាកាលពីថ្ងៃទី២០ ខែមិថុនា ជំងឺរបស់ព្រះគ្រូសូត្រស្តាំបានចាប់ផ្ដើមធ្វើទុក្ខឡើងវិញ ធ្វើឲ្យព្រះអង្គមិនស្រួលព្រះកាយឡើយ រហូតដល់វេលាព្រឹកថ្ងៃកើតហេតុ ក្រោយពីឆាន់បបររួច ព្រះគ្រូសូត្រស្តាំក៏បានចូលទៅសឹងក្នុងបន្ទប់លើសាលាឆាន់ដែលជាបន្ទប់របស់ព្រះអង្គ ។ បន្ទាប់មកក៏ស្រាប់តែបាត់ព្រះគ្រូសូត្រស្តាំរហូតដល់វេលាល្ងាចថ្ងៃដដែល មិនឃើញតើនឡើង(អត់ភ្ញាក់ពីដេក) និងមិនឃើញចេញមកក្រៅបន្ទប់ឡើយ ខណៈនោះព្រះចៅអធិការក៏បានទៅគោះទ្វារបន្ទប់ដោយផ្ទាល់ តែទ្វារបន្ទប់ជាប់គន្លឹះពីខាងក្នុង ហើយព្រះចៅអធិការក៏បានស្រែកហៅជាច្រើនដងទៀតដែរ ប៉ុន្តែមិនឮឆ្លើយសោះ ពេលនោះដោយមានការងឿងឆ្ងល់ ព្រះចៅអធិការបានឲ្យព្រះសង្ឃផ្សេងទៀតគាស់បង្អួច និងកាត់ចំរឹងដែកចូលទៅមើល ក៏ឃើញព្រះគ្រូសូត្រស្ដាំសុគតបាត់ទៅហើយ ទើបរាយការណ៍ជូននគរបាលប៉ុស្តិ៍ឆក់ឈើនាងឲ្យចុះមកពិនិត្យ ។
តាមប្រភពពីគរបាលបានប្រាប់ឲ្យដឹងថា ក្រោយពេលទទួលបានព័ត៌មានខាងលើនេះភ្លាម កម្លាំងនគរបាលប៉ុស្តិ៍ឆក់ឈើនាងបានរាយការណ៍បន្តទៅកាន់នគរបាលស្រុកអង្គស្នួលដើម្បីចុះទៅពិនិត្យជាក់ស្ដែង ក្នុងនោះក៏មានចូលរួមពីលោកគ្រូពេទ្យ និងមន្ត្រីក្រុមប្រឹក្សាឃុំឆក់ឈើនាង លោកមេភូមិ ព្រមទាំងកូនៗនិងសាច់ញាតិរបស់ព្រះសពផងដែរ ។ ពេលកម្លាំងជំនាញបានធ្វើការពិនិត្យ និងធ្វើកោសល្យវិច័យបានរកឃើញថា ព្រះគ្រូសូត្រស្តាំពិតជាសុគតដោយសារអាពាធប្រចាំព្រះកាយប្រាកដមែន ៕ (កែសម្រួលដោយ ៖ ធីតា)
ចែករំលែកព័តមាននេះ