រថយន្តអគ្គិសនីដំបូងគេបង្អស់របស់ក្រុមហ៊ុន Ford គឺជារថយន្តយកម៉ូដតាមរថយន្ត Mustang។ ដូចនេះ Ford បានឱ្យតំរុយថា រថយន្តអគ្គិសនី Mustang អាចនឹងមានជាលក្ខណៈផ្លូវការនៅថ្ងៃណាមួយ។ ក្រុមហ៊ុនទើបតែនឹងបើកដំណើរការហៅថា Charge Cars បានផលិតរថយន្តនេះឡើង ដែលជារថយន្ត Prototype ប៉ុណ្ណោះ។ គេនឹងដាក់បង្ហាញវានៅខែក្រោយខាងមុខនេះ នៅក្នុងកម្មវិធីបង្ហាញរថយន្ត Goodwood Festival។
អ្នកដែលស្រឡាញ់រថយន្ត Mustang មិនគួរមានការព្រួយបារម្ភថា ក្រុមហ៊ុន Charge Cars ធ្វើឱ្យបាត់បង់លក្ខណៈដើមរបស់រថយន្តនេះអី ព្រោះតែគេបានទិញច្បាប់មកត្រឹមត្រូវ ហើយក៏បានរក្សារាងដូចដើមសម្រាប់រថយន្ត Mustang ស៊េរីពីមុន។ គេបានជំនួសម៉ាស៊ីនសាំង V8 ជាមួយនឹងម៉ូទ័រអគ្គិសនី ដែលអាចផលិតថាមពលបានដល់ទៅ ៥៣៦សេះ និង កម្លាំងបង្វិល ៨៨៥ lb-ft of torque។ អាគុយរបស់វា គឺជាប្រភេទអាគុយកម្លាំង៦៤គីឡូវ៉ាត់ម៉ោង។
ជាមួយនឹងការរៀបចំនេះ ក្រុមហ៊ុន Charge Cars អះអាងថារថយន្ត Mustang អគ្គិសនី អាចមានល្បឿនពី០ទៅ៦២ mph ដោយប្រើប្រាស់ពេលត្រឹមតែ ៣.៩៩វិនាទីប៉ុណ្ណោះ ហើយអាចបើកបានល្បឿនកប់ត្រឹម១៤៩ mph ដែលស្មើនឹង ២៤០ kmh។ វាពិតជាលឿនជាងរថយន្ត Mustang ជំនាន់ដំបូងទៅទៀត។ សម្រាប់ចម្ងាយបើកបររាល់ការសាកថ្មម្តងវិញ គឺបាន៣២១គីឡូម៉ែត្រ។
បើប្រៀបធៀបទៅនឹងរថយន្ត Mustang ដើមរថយន្តអគ្គិសនីថ្មីមើលទៅកាន់តែខ្លាំងក្លា ដោយសារតែគម្រប់ម៉ាស៊ីនខាងមុខវា មានលក្ខណៈកាចខ្លាំង ជាមួយនឹងច្រមុះរន្ធខ្យល់ធំៗ។ ខណៈដែលរូបរាងខាងក្រៅនៅរក្សាបានដូចរថយន្ត Mustang ពីមុន ខាងក្នុងនៃរថយន្តគឺមានលក្ខណៈទំនើបយ៉ាងខ្លាំង។ វាមានអេក្រង់យ៉ាងធំដូចទៅនឹងរថយន្ត Tesla ដែរ ដែលអាចឱ្យអ្នកបើកបរបញ្ជាបានច្រើនកន្លែង ហើយក្រុមហ៊ុនរថយន្ត Charge Cars នឹងផលិតរថយន្តនេះត្រឹមតែ៤៩៩គ្រឿងប៉ុណ្ណោះ ៕
ប្រភព ៖ Carbuzz , កែសម្រួលដោយ ៖ សំណាង
ចែករំលែកព័តមាននេះ