រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានឲ្យដឹងថា ថវិកាជាង២លានដុល្លារអាមេរិកនឹងផ្តល់ជូនដល់ក្រុមគ្រួសារដែលរងគ្រោះនៃការរលំបាក់អគារ៧ជាន់ នៅព្រះសីហនុ ។ យោងតាមសង្គមហ្វេសប៊ុកសម្តេចតេជោ បានឲ្យដឹងនៅមុននេះយ៉ាងដូច្នេះថា ៖«បងប្អូនជនរួមជាតិជាទីគោរពស្រឡាញ់! ក្នុងហេតុការណ៍បាក់អគារកម្ពស់៧ជាន់នៅខេត្តព្រះសីហនុដែលធ្វើឲ្យប្រជាជនជាទីស្រឡាញ់របស់យើងស្លាប់២៨នាក់ របួស២៦នាក់ ក្រៅពីព្រះរាជអំណោយរបស់ព្រះមហាក្សត្រ និងសម្តេចម៉ែជាទីគោរពសក្ការ និងជំនួយឧបត្ថម្ភរបស់ព្រឹទ្ធសភា រាជរដ្ឋាភិបាល កាកបាទក្រហមកម្ពជា» ។
សម្តេចបានសរសេរទៀតថា ខ្លួនខ្ញុំបានអំពាវនាវសុំសប្បុរសជនជួយឧបត្ថម្ភបន្ថែមដែលមកដល់ម៉ោង១២ថ្ងៃទី២៥មិថុនានេះ ទទួលទឹកប្រាក់គិតជាដុល្លារចំនួន 2,198,400 ដុល្លារអាមេរិក ។ ថវិកានេះត្រូវបានឧបត្ថម្ភជូនអ្នករបួសក្នុងម្នាក់១ម៉ឺនដុល្លារសម្រាប់២៤នាក់ ឯ២នាក់ទៀត ដែលស្ថិតក្រោមគំនររលំបាក់បែកប្រមាណជិត៦០ម៉ោងដែលនៅរស់រានមានជីវិតដោយសារការជួយសង្គ្រោះត្រូវបានឧបត្ថម្ភក្នុងម្នាក់ចំនួន៣ម៉ឺនដុល្លារ ។ សរុបអ្នករបួសចំណាយអស់៣០ម៉ឺនដុល្លារ ។ ថវិកានៅសល់ 1,898,400 ដុល្លារត្រូវបែងចែកស្មើៗគ្នាសម្រាប់អ្នកស្លាប់ចំនួន២៨នាក់ដែលក្នុងមួយនាក់ទទួលចំនួន 67,800 ដុល្លារនេះមិនគិតពីថវិការាជរដ្ឋាភិបាល១ម៉ឺនដុល្លារដែលជូនដល់គ្រួសារអ្នកស្លាប់មួយចំនួនក្រោយ១ថ្ងៃនៃថ្ងៃកើតហេតុផងទេ ។
សម្តេចក៏បានឲ្យដឹងទៀតថា លោកសេង ទៀង នាយករងខុទ្ទកាល័យរបស់សម្តេចនឹងរៀបចំជូនក្រុមគ្រួសារសពតាមរយៈធនាគារ ដើម្បីធានាសុវត្ថិភាពសម្រាប់ក្រុមគ្រួសារសព ។ ជាមួយគ្នានោះដែរសម្តេចអរគុណចំពោះសប្បុសជនទាំងអស់ដែលបានជួយជាថវិកាសម្រាប់ជនរងគ្រោះទាំងអ្នកស្លាប់ទាំងអ្នករបួស ដោយមិនគិតពីនិន្នាការនយោបាយ ។ ជាថ្មីម្តងទៀតសូមអរគុណ និងកោតសរសើរចំពោះកម្លាំងដែលបានចូលរួមជួយរុករក និងជួយសង្គ្រោះដែលបានបង្ហាញនូវការទទួលខុសត្រូវផ្តល់នូវក្តីអាណិតស្រឡាញ់ចំពោះជនរងគ្រោះក្នុងឋានៈជាជនរួមឈាមដូចគ្នា ។
សម្តេចក៏សូមអរគុណផងដែរដល់កម្មករ និងអ្នកបច្ចេកទេសចិនដែលបានចូលរួមក្នុងកិច្ចការនេះតាំងពីការចាប់ផ្តើមរហូតដល់ការងារត្រូវបានបញ្ចប់ ។ សម្តេចក៏បានពាក្យស្លោកយ៉ាងដូច្នេះថា« ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក» ៕ កែសម្រួលដោយ ៖ សុឃាក់
ចែករំលែកព័តមាននេះ