រាជធានីភ្នំពេញ ៖ អង្គភាពប្រឆាំងអំពើពុករលួយ(ACU) កាលពីព្រឹកថ្ងៃទី២៤ ខែមិថុនា បានបញ្ជូនមនុស្សចំនួន៦នាក់ទៅកាន់សាលាដំបូងរាជធានីភ្នំពេញ ពាក់ព័ន្ធនឹងករណីក្លែងបន្លំឯកសារសាធារណៈ និងរុករានទន្ទ្រានកាន់កាប់ដីរបស់រដ្ឋ ប្រព្រឹត្តនៅក្នុងមូលដ្ឋានកោះរ៉ុង ខេត្តព្រះសីហនុ ។ មនុស្សទាំង៦នាក់ដែលត្រូវបានបញ្ជូនទៅសាលាដំបូងនោះមាន ៖
១-ឧកញ៉ា សុខ ប៊ុន អគ្គនាយកក្រុមហ៊ុនសុខ ប៊ុន
២-ឈ្មោះ អ៊ួង និត ប្រធានក្រុមប្រឹក្សាសង្កាត់កោះរ៉ុង
៣-ឈ្មោះ សេង ហួលាង ចៅសង្កាត់កោះរ៉ុង
៤-ឈ្មោះ ហែម សាឡេះ សមាជិកក្រុម ប្រឹក្សាសង្កាត់កោះរ៉ុង
៥-ឈ្មោះ កែវ សោម ចៅសង្កាត់រងទី២ សង្កាត់កោះរ៉ុង និង៦-ឈ្មោះ កែវ ពៅ មេភូមិព្រែកស្វាយ សង្កាត់កោះរ៉ុង ។
សមត្ថកិច្ចអង្គភាពប្រឆាំងអំពើពុករលួយ បាននាំខ្លួនអ្នកទាំង៦នាក់ តាមរថយន្តទំនើប៥ទៅ៦គ្រឿង ដែលអមការពារដោយកម្លាំងឯកសណ្ឋានឈុត ACU ចូលទៅសាលាដំបូងរាជធានីភ្នំពេញយ៉ាងស្ងៀមស្ងាត់ ។ តាមសេចក្តីរាយការណ៍ព័ត៌មាននៅសាលាដំបូងរាជធានីភ្នំពេញឲ្យដឹងថា អ្នកទាំង៦នាក់បានក្លែងឯកសារសាធារណៈ និងបទរុករានទន្ទ្រានកាន់កាប់ដីសាធារណៈ ដែលសំណុំរឿងនេះ ស្ថិតនៅដៃលោក គុជ គឹម
ឡុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញធ្វើការសាកសួរ ។
អយ្យការបានបើកការស៊ើបសួរ និងដាក់ឲ្យស្ថិតក្រោមការត្រួតពិនិត្យ៖ ១-ឈ្មោះ អ៊ួង និត ភេទប្រុស អាយុ៥០ឆ្នាំ ពីបទបំផ្លាញដោយចេតនា និងគៃបំបាត់ដោយទុច្ចរិត វិតិក្រម ក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែង ប្រព្រឹត្តនៅសង្កាត់កោះរ៉ុង ក្រុងព្រះ សីហនុ ខេត្តព្រះសីហនុ កាលពីអំឡុងឆ្នាំ២០១៦ ដល់ឆ្នាំ២០១៩ តាមបញ្ញតិ្តមាត្រា៦០១ មាត្រា៥៩២ មាត្រា៥៩៣ មាត្រា៦២៩ និងមាត្រា៦៣០ នៃក្រមព្រហ្មទណ្ឌ ។ ២-ឈ្មោះ សេង ហូលាង ភេទប្រុស អាយុ៤៨ឆ្នាំ ៣-ឈ្មោះ ហែម សាឡេះ ភេទប្រុស អាយុ៥៣ឆ្នាំ ៤-ឈ្មោះ កែវ សោម ភេទប្រុស អាយុ៥១ឆ្នាំ៥-ឈ្មោះ កែវ ពៅ ភេទប្រុស អាយុ៦១ឆ្នាំ ។
៤នាក់នេះពីបទបំផ្លាញដោយចេតនា និងគៃបំបាត់ដោយទុច្ចរិត ក្លែងបន្លំឯកសារសាធារណៈនិងប្រើប្រាស់ឯកសារសាធារណៈក្លែង ប្រព្រឹត្តនៅសង្កាត់កោះរ៉ុង ក្រុងព្រះសីហនុ ខេត្តព្រះសីហនុ ក្នុងអំឡុងឆ្នាំ២០១៦ ដល់ឆ្នាំ២០១៩ តាមបញ្ញតិ្តមាត្រា៦០១ មាត្រា៥៩២ មាត្រា៥៩៣ មាត្រា៦២៩ និងមាត្រា៦៣០ នៃក្រមព្រហ្មទណ្ឌ ៦-ចោទប្រកាន់ឈ្មោះ សុខ ប៊ុន ភេទប្រុស អាយុ៤១ឆ្នាំ ពីបទក្លែងបន្លំឯកសាធារណៈ និងប្រើប្រាស់ឯកសារសាធារណៈក្លែង ប្រព្រឹត្តនៅសង្កាត់កោះរ៉ុង ក្រុងព្រះសីហនុ ខេត្តព្រះសីហនុ ក្នុងអំឡុងឆ្នាំ២០១៦ ដល់ឆ្នាំ២០១៩ តាមបញ្ញតិ្តមាត្រា៦០១ មាត្រា៥៩២ មាត្រា៥៩៣ មាត្រា ៦២៩ និងមាត្រា៦៣០ នៃក្រមព្រហ្មទណ្ឌនិងបានចាត់ទៅចៅក្រម ។ ជនសង្ស័យត្រូវបានឃុំខ្លួនដាក់ពន្ធនាគារជាបណ្តោះអាសន្ន ។
ប្រភពព័ត៌មានបន្តថា កាលពីពេលថ្មីៗកន្លងមកនេះ មានប្រជាពលរដ្ឋចំនួន៤២គ្រួសារ រស់នៅក្នុងសង្កាត់កោះរុ៉ង ក្រុងកោះរ៉ុង ខេត្តព្រះសីហនុ បានប្តឹងចោទប្រកាន់ក្រុមហ៊ុន សុខ ប៊ុន និងអាជ្ញាធរក្រុងកោះរ៉ុង ថាបានឃុបឃិតគ្នាលួចវាស់វាងដីធ្លីនៅចំណុចពយតាផេង ពយអាពត និងថ្មជញ្ជាំង ក្នុងភូមិព្រែកស្វាយ សង្កាត់កោះរុ៉ង ដែលពួកគាត់គ្រប់គ្រងនិងអាស្រ័យផលយូរឆ្នាំមកហើយ ។ ជម្លោះដីធ្លីដ៏រុាំរ៉ៃបានអូសបន្លាយអស់រយៈពេលជាង១ឆ្នាំ ដែលប្រជាពលរដ្ឋចំនួន៤២គ្រួសារនៅភូមិព្រែកស្វាយ សង្កាត់កោះរ៉ុង ក្រុងព្រះសីហនុ បានប្តឹងលោក សុខ ប៊ុន ទៅសាលាសង្កាត់កោះរ៉ុង និងសាលាខេត្តព្រះសីហនុ ដើម្បីសុំការជួយអន្តរាគមន៍ពីអាជ្ញាធរដែនដី ខណ:ដែលពួកគាត់បានកាន់កាប់ដីធ្លីរស់នៅ និង អាស្រ័យផលដំណាំលើដីនេះជាច្រើនឆ្នាំមកហើយ ស្រាប់តែលោក សុខ ប៊ុន ថាជាដីរបស់គាត់ទៅវិញ ។
ទោះបីជាប្រជាពលរដ្ឋបានដាក់ពាក្យបណ្តឹង ទៅអាជ្ញាធរគ្រប់លំដាប់ថ្នាក់ ហើយមិនទាន់មានដំណោះស្រាយពីអាជ្ញាធរដែនដីក្តី តែបណ្តឹងនេះបានបែកធ្លាយនិងធ្លាក់ដល់អង្គភាពប្រឆាំងអំពើរពុករលួយ(ACU) និងត្រូវបានថ្នាក់ដឹកនាំអង្គភាពខាងលើបញ្ជូនមន្ត្រីទៅសុើបអង្កេតកាលពីព្រឹកថ្ងៃទី៦ ខែមិថុនា ឆ្នាំ២០១៩កន្លងមក ។ ជាមួយនេះ បានចុះស្រង់ទិន្នន័យក្បាលដីរបស់ប្រជាពលរដ្ឋទាំង៤២គ្រួសារ ស្ថិតនៅពយថ្មជញ្ជាំង ពយអាពត ពយតាផេង ស្ថិតក្នុងភូមិព្រែកស្វាយ សង្កាត់កោះ រ៉ុង ក្រុងព្រះសីហនុ ដែលមានវិវាទជាមួយឧកញា៉ សុខ ប៊ុន ប្រធានក្រុមហ៊ុន សុខ ប៊ុន គ្រុប ដើម្បីត្រួតពិនិត្យឈានទៅរកដំណោះស្រាយប្រកបដោយតម្លាភាពជូនដល់បងប្អូនប្រជាពលរដ្ឋ។
លោក កែវ សោម ស្ថិតក្នុងចំណោមប្រជាពលរដ្ឋ៤២គ្រួសារ ដែលមានវិវាទដីធ្លីជាមួយលោក សុខ ប៊ុន បានឲ្យដឹងថា «កាលពីចុងឆ្នាំ២០១៨កន្លងមក ឧកញា៉ សុខ ប៊ុន បាននាំមន្ត្រីសុរិយោដីពីភ្នំពេញចុះមកចុចម៉ាសុីន GPS នៅលើទីតាំងដីរបស់ប្រជាពលរដ្ឋទាំង៤២គ្រួសារនៅចំណុចខាងលើ ដោយមិនបានជូនដំណឹងដល់អាជ្ញាធរភូមិ សង្កាត់ និងប្រជាពលរដ្ឋមកចូលរួមទេ ។ ពេលឃើញដូច្នេះប្រជាពលរដ្ឋនាំគ្នាទៅសួរនាំ ស្រាប់តែលោក សុខ ប៊ុន និងមន្ត្រីជំនាញនាំគ្នាចេញទៅវិញអស់ទៅ ។
ប្រភពដដែលបន្តថា នៅថ្ងៃទី៨ ខែកក្កដា ឆ្នាំ២០១៨ ប្រជាពលរដ្ឋបានដឹងថា ឧកញ៉ា សុខ ប៊ុន បានរៀបចំឯកសារក្លែងយកទៅឲ្យអាជ្ញាធរចុះហត្ថលេខា ក៏បានផ្តិតមេដៃដាក់ពាក្យបណ្តឹងសុំអន្តរាគមន៍ទៅអាជ្ញាធរសង្កាត់កោះរ៉ុង អាជ្ញាធរក្រុង និងរដ្ឋបាលសាលាខេត្តព្រះសីហនុ ម្តងរួចមកហើយ ក៏ប៉ុន្តែមិនមានការដោះស្រាយឡើយ ។
កាលពីខែឧសភា ឆ្នាំ២០១៩ថ្មីៗ នេះ ប្រជាពលរដ្ឋទាំង៤២គ្រួសារ បានផ្តិតមេ ដៃដាក់ពាក្យបណ្តឹងសាជា
ថ្មីសុំការជួយអន្តរាគមន៍សាជាថ្មីម្តងទៀត ដើម្បីឱ្យអាជ្ញាធរជួយដោះស្រាយជូនពួកគាត់ក៏នៅតែមិនមានការដោះស្រាយជូនដល់ពួកគាត់ដដែល ធ្វើឲ្យប្រជាពលរដ្ឋកាន់តែអស់ទំនុកចិត្តលើអាជ្ញាធរដែនដី។ កាលពីពេលថ្មីៗកន្លងមកនេះ មន្ត្រីមកពីអង្គភាពប្រឆាំងអំពើរពុករលួយ(ACU)ចុះមកពិនិត្យទីតាំងដីដែលប្រជាពលរដ្ឋកំពុងរស់នៅអាស្រ័យផលនិងឯកសារកាន់កាប់ដីធ្លី ហើយពួកគាត់សង្ឃឹមថានឹងទទួលបានភាពយុត្តិធម៌សម្រាប់ប្រជាពលរដ្ឋ ។
លោក ហែម សម្បត្តិ ប្រធានក្រុមការងាររបស់អង្គភាពប្រឆាំងអំពើពុករលួយ(ACU)ពេលទៅត្រួតពិនិត្យនោះបានឲ្យដឹងថា លោកបានដឹកនាំមន្ត្រីអង្គភាពប្រឆាំងអំពើពុករលួយមកជួបជាមួយបងប្អូនប្រជាពលរដ្ឋ ដើម្បីធ្វើការផ្ទៀងផ្ទាត់ឯកសាររបស់ប្រជាពលរដ្ឋពាក់ព័ន្ធទៅនឹងការកាន់កាប់ដីធ្លីរបស់ពួកគាត់ ដើម្បី
បានទិន្នន័យយកទៅផ្ទៀងផ្ទាត់ជាមួយនឹងឯកសារដីរបស់ឧកញ៉ា សុខ ប៊ុន ។
គោលបំណង គឺដើម្បីផ្ទៀងផ្ទាត់ឯកសារទាំងពីរ រវាងប្រជាពលរដ្ឋទាំង៤២គ្រួសារតាមរយៈបណ្ដឹងដែលអង្គភាពបានឃើញដាក់ចូលសាលាសង្កាត់កោះរ៉ុង ក៏ដូចជាការដាក់ចូលទៅសាលាខេត្តព្រះសីហនុ ក្នុងករណីវិវាទដីធ្លីរវាងប្រជាពលរដ្ឋជាមួយឧកញ៉ា សុខ ប៊ុន ។ ការចុះមកនេះដើម្បីចង់ដឹងថា តើភាគីខាង
ណាជាភាគីត្រឹមត្រូវម្ចាស់កម្មសិទិ្ធដីធ្លីពិតប្រាកដ ។
លោក ហែម សម្បត្តិ សូមឲ្យបងប្អូនប្រជាពលរដ្ឋដែលមានការពាក់ព័ន្ធនឹងដីធ្លីខាងលើកុំមានការភ័យខ្លាច ត្រូវបញ្ចេញជាយោបល់ក៏ដូចជាលើកសំណូមពរមកដល់ក្រុមការងារ ដើម្បីធ្វើការដោះស្រាយទៅតាមផ្លូវច្បាប់ ៕
ចែករំលែកព័តមាននេះ