ខេត្តពោធិ៍សាត់ ៖ ក្មេងប្រុសស្រី២នាក់បងប្អូនបានលង់ទឹកស្ទឹងស្លាប់យ៉ាងអាណោចអាធ័ម ខណៈជីដូនកំពុងដេកលក់ ហើយក្មេងរងគ្រោះនាំគ្នាចុះងូតទឹកចំកន្លែងរណ្ដៅដីដែលមានទឹកជ្រៅ ។ ហេតុការណ៍ដ៏រន្ធត់នេះបានកើតឡើងនៅវេលាម៉ោង១និង៣០នាទីរសៀលថ្ងៃទី២៣ ខែមិថុនា ឆ្នាំ២០១៩ នៅចំណុចក្នុងស្ទឹងមេទឹក ស្ថិតក្នុងភូមិមេទឹក ឃុំមេទឹក ស្រុកបាកាន ខេត្តពោធិ៍សាត់ ។
តាមប្រភពពីសមត្ថកិច្ចឲ្យដឹងថា ក្មេងរងគ្រោះដែលលង់ទឹកស្លាប់ទាំងពីរនាក់ខាងនេះជាបងប្អូនបង្កើតនឹងគ្នា ក្នុងនោះម្នាក់ឈ្មោះ ម៉ុន សុខណា ភេទប្រុស អាយុ៦ឆ្នាំ និងម្នាក់ទៀតឈ្មោះ ម៉ុន ស្រីនិត ភេទស្រី អាយុ៤ឆ្នាំ ។ ក្មេងរងគ្រោះទាំង២នាក់នេះមានម្ដាយជាស្ត្រីម៉េម៉ាយឈ្មោះ កែម យឿន អាយុ៣៤ឆ្នាំ រស់នៅភូមិឃុំកើតហេតុខាងលើ ។
តាមប្រភពពីសមត្ថកិច្ចបានបន្តថា ឪពុកម្តាយរបស់ក្មេងរងគ្រោះបានលែងលះគ្នាយូរមកហើយ ដោយក្មេងរងគ្រោះទាំង២នាក់បានរស់នៅជាមួយម្តាយ និងជីដូនជរា។ ដោយសារជីវភាពទីទាល់ក្រខ្លាំងពេក ស្ត្រីជាម្ដាយបានទុកកូនប្រុសស្រីទាំងពីរនាក់ឲ្យរស់នៅជាមួយជីដូន ហើយបានទៅស៊ីឈ្នួលលគេនៅឯខេត្តព្រះសីហនុ ដើម្បីយកលុយមកចិញ្ចឹមកូន។
តាមប្រភពពីសមត្ថកិច្ចបានបន្តទៀតថា មុនពេលកើតហេតុ បន្ទាប់ពីហូបបាយថ្ងៃត្រង់រួច ជីដូនបានដេកមើលចៅៗប្រលែងគ្នាលេងនៅក្រោមផ្ទះនោះ លុះនៅវេលាម៉ោងប្រមាណ១និង៣០នាទីរសៀលថ្ងៃទី២៣ មិថុនា ជីដូនបានដេកលក់មួយភាំង ស្រាប់តែក្មេងរងគ្រោះទាំងពីរនាក់បងប្អូនបាននាំគ្នាចុះទៅលេងក្នុងទឹកស្ទឹងក្បែរផ្ទះ ដែលកន្លែងខ្លះទឹករាក់ កន្លែងខ្លះទឹកជ្រៅ។ មុនដំបូងគេឃើញក្មេងរងគ្រោះទាំងពីរនាក់ដើរចាប់ត្រីលេងក្នុងទឹករាក់ៗ ហើយក្រោយមកទំនងជាក្តៅពេកក៏នាំគ្នាចុះងូតទឹកស្ទឹង បណ្ដាលឲ្យធ្លាក់ក្នុងរណ្ដៅដីដែលមានទឹកជ្រៅក៏លង់ស្លាប់ទាំង២នាក់តែម្ដង ៕ (កែសម្រួលដោយ ៖ ធីតា)
ចែករំលែកព័តមាននេះ