រាជធានីភ្នំពេញ ៖ ដូចការគ្រោងទុកខ្សែភាពយន្តខ្នាតធំរឿងវិញ្ញាណលោកម្ចាស់គ្រញូង បានចាក់បញ្ចាំងនៅរោងភាពយន្តលុច្ស ចាប់ពីថ្ងៃទី២៧ ធ្នូ ២០១៣ ទៅក្នុងរយៈពេល២សប្តាហ៍ ក្នុងនោះនៅរោងភាពយន្តបារាយណ៍អណ្តែតខេត្តសៀមរាប ក៏ចាក់បញ្ចាំងក្នុងពេលដូចគ្នា ចំណែករោងភាពយន្ត Platinum Cineplex និងរោងភាពយន្ត Legend គ្រោងចាក់បញ្ចាំងនៅថ្ងៃទី២៣ មករា ២០១៤។
អ្នកដឹកនាំរឿង អ្នកស្រី ពាន់ ភួងបុប្ផា បានឱ្យដឹងថា រឿងវិញ្ញាណលោកម្ចាស់គ្រញូងធ្វើពិធីក្រុងពលីថតកាលពីចុងខែកក្កដា បញ្ចប់នៅខែសីហា ២០១៣ គឺចំណាយពេលថតតែជាង១ខែបុ៉ណ្ណោះ ក៏បុ៉ន្តែការស្រាវជ្រាវ និងសរសេរអត្ថបទរឿងចំណាយពេលអស់ជាងមួយឆ្នាំ ។ អ្នកស្រីបញ្ជាក់ថា រឿងវិញ្ញាណលោកម្ចាស់គ្រញូងបានបង្ហាញអំពីអម្បូរឈើគ្រញូងរបស់ខ្មែរដែលជាប្រភេទឈើដ៏មានតម្លៃ និងកំពុងរងការបំផ្លាញ និងជួញដូរពីឈ្មួញទុច្ចរិត ។
នៅក្នុងសាច់រឿងនេះអ្នកស្រីបានប្រៀបធៀបខ្សែជីវិតរបស់តួសម្តែងក្នុងសាច់រឿងទៅនឹងដើមគ្រញូង ដែលនេះជាសារពញ្ញាក់អារម្មណ៍ទស្សនិកជនឱ្យចេះស្រឡាញ់ព្រៃឈើ ពិសេសគឺឆ្លុះបញ្ចាំងពីរឿងមួយដែលមនុស្សស្ទើរតែគ្រប់គ្នាទំនងជាមិនបាននឹកដល់ គឺទុក្ខខ្លោចផ្សារបស់ឈើគ្រញូងដែលត្រូវបានគេកាប់បំផ្លាញ ។
អ្នកស្រីពាន់ ភួងបុប្ផា រំពឹងថា ខ្សែរឿងនេះនឹងអាចក្លាយជាសារមួយសម្រាប់ទស្សនិកជនក្នុងគោលបំណងបង្ហាញពីសារសំខាន់នៃព្រៃឈើ ព្រោះព្រៃឈើក៏មានជីវិតដូចមនុស្សដែរ ដូចនេះយើងត្រូវចេះថែរក្សាឱ្យបានគង់វង្សដូចជារក្សាបរិស្ថានរស់នៅបានល្អ មានសេចក្តីសុខ ចៀសបានគ្រោះធម្មជាតិទាំងឡាយ ។ រឿងវិញ្ញាណលោកម្ចាស់គ្រញូងចូលរួមសម្តែងដោយតារា ល្បីៗមួយចំនួនដូចជា កញ្ញាម៉ាក សែនសូនីតា ហៅតូតា លោកអ៊ុន សុធា អ្នកនាងទូច ស្រីលក្ខណ៍ លោកសឹុម សុភ័ណ្ឌ នាយក្រូច លោកឌួង សុខគា នាងប៉េងប៉ោង ពូឃ្លាំង សំ ប៉ូលីដា នេនទុំ និងតារាកិត្តិយសប្រុសស្រីជាច្រើនរូបទៀត ៕
ចែករំលែកព័តមាននេះ