ខេត្តកណ្ដាល ៖ បើតាមសេចក្តីរាយការណ៍បានឱ្យដឹងថា លោកតាម្នាក់កំពុងកៀងសត្វពពែឲ្យស៊ីស្មៅនៅចំណុចបឹងបបុស្សខាងកើត ភូមិបឹងក្រចាប់ជើង ស្រាប់តែប្រទះឃើញសាកសពបុរសម្នាក់ដេកផ្កាប់មុខស្លាប់នៅក្នុងចំការត្រសក់មិនទាន់មានអ្នកស្គាល់អត្តសញ្ញាណ បង្កឱ្យមានការភ្ញាក់ផ្អើលកាលពីម៉ោងប្រមាណ១២ថ្ងៃត្រង់ ថ្ងៃទី២២ ខែមិថុនា ។
សេចក្តីរាយការណ៍បន្តថា សពជនរងគ្រោះខាងលើមានភិនភាគអាយុប្រហែល៤៥ឆ្នាំ កម្ពស់១ម៉ែត្រ៥៣ សម្បុរស្រអែម សក់រួញ មុខរាងទំប៉ែត ម្រាមដៃឆ្វេងអង្គត់២ ស្នាមសាករូបបេះដូងចាក់ដាវនៅ.កជើងឆ្វេង និងសាករូបនាគនៅលើទ្រូងខាងស្ដាំ ពាក់អាវយឺវដៃខ្លីពណ៌ទឹកប៊ិចលាយសស្លៀក ខោខ្លីត្រឹមជង្គង់ពណ៌គគី ហោប៉ាវ៤ មានក្រមាពណ៌ក្រហមចងនៅចង្កេះ ។ នៅនឹង.កមានពាក់ខ្សែកាតមានស្បោងផ្លាស្ទិច ក្នុងស្បោងរួមមាន យ័នក្រណាត់ពណ៌ក្រហម១ ផ្លែឡាបចំនួន១ និងមានខ្នែងឬស្សី១កំណាត់នៅក្នុងហោប៉ាវខោ មានប្រាក់ចំនួន២.៥០០រៀល និងមានដុំសាកទូរស័ព្ទ១ ។
សេចក្តីរាយការណ៍បន្តទៀតថា មុនពេលកើតហេតុ បន្ទាប់ពីលោកតា ហេង ហាក់ អាយុ៦០ឆ្នាំ រស់នៅភូមិអន្លុង ឃុំព្រែកតាមាក់ ស្រុកខ្សាច់កណ្ដាល បានប្រទះឃើញសាកសពបុរសម្នាក់ខាងលើនោះ ក៏រាយការណ៍ដល់សមត្ថកិច្ចនគរបាល ប៉ុស្តិ៍ព្រែកតាមាក់ ទើបមួយសន្ទុះមន្ត្រីជំនាញចុះធ្វើការពិនិត្យលើសាកសពនោះ ហើយបានសន្និដ្ឋានជំហានដំបូងថា ជនរងគ្រោះស្លាប់ដោយសារខ្យល់.គ ពោលគឺគាំងបេះដូង ពីព្រោះការធ្វើកោសលវិច្ច័យលើរូបរាងកាយសពពុំមានឃើញស្លាកស្នាមអ្វីគួរឲ្យកត់សម្គាល់នោះទេ ។
ក្រោយកើតហេតុ សពជនរងគ្រោះត្រូវបានប្រគល់ជូន ក្រុមប្រឹក្សាឃុំព្រែកតាមាក់ យកទៅតម្កល់ទុកនៅក្នុងវត្តសុវណ្ណវតី (ព្រែកតាមាក់) ដើម្បីរង់ចាំសាច់ញាតិយកទៅធ្វើបុណ្យតាមប្រពៃណី ។ ហើយនេះជាព័ត៌មានមួយសម្រាប់ក្រុមគ្រួសារណាបាត់សមាជិក ដែលមានភិនភាគដូចរៀបរាប់ខាងលើ សូមទាក់ទងមកគណៈកម្មការអាចរ្យវត្តព្រែកតាមាក់ ៕ (កែសម្រួលដោយ ៖ បុប្ផា)
ចែករំលែកព័តមាននេះ