ខេត្តកំពង់ធំ ៖ ករណីនេះបង្កឱ្យមានការភ្ញាក់ផ្អើលកាលពីម៉ោង៧និង៣០នាទីព្រឹក ថ្ងៃទី២២ ខែមិថុនា ឆ្នាំ២០១៩ នៅផ្ទះបងប្រុសបង្កើត ស្ថិតក្នុងភូមិព្រៃព្រាល(ខ) ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
បើតាមសមត្ថកិច្ចប្រាប់ថា សពជនរងគ្រោះឈ្មោះ ខាត់ លីដា ភេទប្រុស អាយុ២៥ឆ្នាំ មុខរបរកសិករ នៅភូមិ-ឃុំកើតហេតុខាងលើ ។
បើតាមការបំភ្លឺពីឈ្មោះ ខាត់ ផល្លី ត្រូវជាបងប្រុសបង្កើតនៃសពនិយាយថា ពួកគាត់ បន្ទាប់ពីឪពុកម្តាយស្លាប់ចោលអស់ទៅ ប្អូនរបស់គាត់ដែលជាជនរងគ្រោះបានទៅនៅជាមួយបងនៅឯស្រុកកំណើតក្នុងខេត្តកំពង់ឆ្នាំង ហើយក៏ត្រឡប់មកនៅផ្ទះខ្លួនវិញទើបបានប្រហែលមួយអាទិត្យប៉ុណ្ណោះចាប់តាំងពីវាមកដល់ផ្ទះវិញ គាត់សង្កេតឃើញសភាពប្អូនប្រុសគាត់មិនសូវមាត់ មិនសូវ.កនោះទេ ហើយចេះតែដើរសុំរបស់គេស៊ី លុះដល់យប់ក៏ទៅដេកនៅផ្ទះខ្លួនវិញ។
ប្រភពដដែលបន្តថា លុះកាលពីព្រឹកថ្ងៃទី២១ មិថុនា ពេលប្អូនប្រុសងើបពីដេក វាក៏ចេញបាត់ពីផ្ទះមិនដឹងទៅណានោះទេ លុះដល់ម៉ោង៣រសៀលក៏មានអ្នកភូមិប្រាប់ថា គេឃើញប្អូនប្រុសគាត់នៅឯក្នុងត្រពាំងគ្មានទឹកខាងត្បូងភូមិព្រៃព្រាល(ខ) ។ ឮដូច្នេះគាត់ជាបងក៏ដើរទៅមើលឃើញប្អូនកំពុងតែប្រកាច់នៅទីនោះ ហើយក៏លើកយកប្អូនមកផ្ទះផ្លាស់ខោអាវឲ្យ ងូតទឹកឲ្យ ដាក់ឲ្យដេកនៅលើផ្ទះគាត់ រហូតដល់ម៉ោង៩និង៣០នាទីយប់ ប្អូនគាត់ក៏ដាច់ខ្យល់ស្លាប់បាត់ទៅ។
ក្រោយពីទទួលព័ត៌មាននេះភ្លាម កំលាំងជំនាញស្រុក និងប៉ុស្តិ៍រដ្ឋបាល ព្រមទាំងរដ្ឋអំណាចមូលដ្ឋានបានចុះទៅពិនិត្យសពមិនឃើញ មានស្លាកស្នាមអ្វីដែលសង្ស័យទៅលើអំពើឃាតកម្មឡើយ ទើបសន្និដ្ឋានថា ការស្លាប់នេះដោយសារផឹកស្រា និងមិនមានចំណីអាហារក្នុងខ្លួន បណ្តាលកើតជំងឺខ្យល់គ គាំងបេះដូងស្លាប់ ក្រោយមកពិនិត្យរួចត្រូវប្រគល់ឱ្យក្រុមគ្រួសារធ្វើបុណ្យតាមប្រពៃណី៕ (កែសម្រួលដោយ ៖ បុប្ផា)
ចែករំលែកព័តមាននេះ