កាលពីលេខមុនលោកអ្នកបានជ្រាបរួចមកហើយអំពីមូលហេតុដែលបណ្តាលឱ្យរលាកបាតភ្នែក តែសម្រាប់លើកនេះកោះសន្តិភាពសូមលើកយកប្រធានបទមួយទៀតដែលនិយាយអំពីដំណាក់កាលនៃជំងឺរលាកបាតភ្នែករបស់អ្នកជំងឺទឹកនោមផ្អែមដែលមានការពន្យល់ពីលោកវេជ្ជបណ្ឌិតងី ម៉េង ប្រធានកម្មវិធីជាតិសុខភាពភ្នែក។
ជាទូទៅជំងឺរលាកបាតភ្នែកត្រូវបានចែកចេញជា២ដំណាក់កាលគឺ ៖
ដំណាក់កាលទី១ ៖ ជំងឺនេះមិនទាន់មានការប៉ះពាល់ដល់គំហើញទេ ប្រហែលជា៨០% នៃអ្នកជំងឺមិនមានអាការៈស្រវាំងភ្នែកនៅឡើយ ។ អ្នកជំងឺភាគច្រើនមិនបានចាប់អារម្មណ៍ពីការខុសប្រក្រតីផ្សេងៗរបស់ភ្នែកខ្លួនឯងឡើយ លើកលែងតែក្នុងករណីកម្រិតជាតិស្ករក្នុងឈាមប្រែប្រួល ដែលអាចបណ្តាលឱ្យគំហើញមានការផ្លាស់ប្តូរជាញឹកញាប់ ។ អាការៈបែបនេះអាចដឹងបានលុះត្រាតែមានការពិនិត្យវិនិច្ឆ័យជំងឺពីគ្រូពេទ្យ ទើបអាចដឹងពីភាពមិនប្រក្រតីរបស់សរសៃឈាមនៅត្រង់បាតភ្នែក ។ សរសៃឈាមត្រង់ចំណុចខ្លះអាចប៉ោងដូចជាក្រពះមនុស្សអ៊ីចឹងដែរ ធ្វើឱ្យចរន្តឈាមរត់មិនបានល្អ ។ សរសៃប្រសាទភ្នែកឡើងហើម ឬទឹកលឿងហូរកាត់ភ្លាសស្តើងនៃសរសៃឈាម ហើយទឹកទាំងនេះមកផ្តុំនៅត្រង់បាតភ្នែក ។ ករណីដែលទឹកលឿងជ្រាបចូលដល់ចំណុចកណ្តាលរបស់បាតភ្នែក ដែលជាចំណុចសំខាន់នៃគំហើញនោះ អ្នកជំងឺមិនអាចមើលឃើញច្បាស់ ករណីខ្លះធ្វើឱ្យពួកគាត់មិនអាចប្រកបការងារប្រចាំថ្ងៃបានទៀតទេ ។
ដំណាក់កាលទី២៖ របស់អ្នកជំងឺរលាកបាតភ្នែក ៖ ដំណាក់កាលនេះកើតមានឡើងនៅពេលឈាមរត់ទៅចិញ្ចឹមបាតភ្នែកត្រូវបានកកស្ទះ ធ្វើឱ្យគំហើញកាន់តែខ្សោយទៅៗរហូតដល់បាត់បង់គំហើញទាំងស្រុងបាន ។ នៅក្នុងដំណាក់កាលនេះអ្នកជំងឺត្រូវស្ថិតក្នុងការមើលថែយ៉ាងដិតដល់ពីគ្រូពេទ្យ ព្រោះថាការស្តារគំហើញឡើងវិញកាន់តែលំបាក ។ ពេលឈានចូលដំណាក់កាលនេះអ្នកជំងឺអាចមានការស្រវាំងភ្នែកមួយរំពេច ដោយគ្មានការឈឺចាប់ទេ នេះដោយសារតែសរសៃឈាមថ្មីដុះចេញមកពីបាតភ្នែក ឬអាចដុះចេញពីចំណុចស្នូលរបស់បាតភ្នែក ។
-សរសៃឈាមថ្មីមានលក្ខណៈស្តើង ហើយពេលវាធ្លាយ ឈាមនឹងហូរចូលក្នុងបាតភ្នែកបង្កើតជាស្នាមអុច បិទផ្ទាំងរូបភាពដែលលេចឡើងលើរេទីន ធ្វើឱ្យគំហើញកាន់តែថយចុះ ។
-អ្នកជំងឺមួយចំនួនអាចមានដុះចេញជាស្រទាប់ស្តើងនៅលើបាតភ្នែក ។ ស្រទាប់ស្តើង ឬស្បៃស្តើងនោះអាចទាញបាតភ្នែកឱ្យហើបចេញពីភ្នែកធ្វើឱ្យអ្នកជំងឺពិការភ្នែកតែម្តង។
-ចំណែកអ្នកជំងឺខ្លះទៀតអាចមានសរសៃឈាមដុះឡើងអាចបណ្តាលឱ្យមានទឹកដក់ក្នុងភ្នែក ។
ការធ្វើរោគវិនិច្ឆ័យពីជំងឺរលាកបាតភ្នែកនៃអ្នកជំងឺទឹកនោមផ្អែម ៖
ដំណើរការល្អបំផុតនៅពេលដឹងថា មានជំងឺទឹកនោមផ្អែមហើយអ្នកជំងឺត្រូវទៅជួបវេជ្ជបណ្ឌិតឱ្យបានញឹកញាប់ដើម្បីពិនិត្យរកសរសៃឈាមដែលដុះខុសប្រក្រតី ហើយពិនិត្យរកមើលថាតើមានឈាម ឬទឹកលឿងជ្រាបចេញមកទេ។ ដំណាក់កាលនេះ គ្រូពេទ្យនឹងចាក់ជាតិ Fluorescein ចូលទៅក្នុងសរសៃឈាមខ្មៅត្រង់ដើមដៃអ្នកជំងឺដើម្បីការពារការធ្លាយបែករបស់សរសៃឈាម ៕
ចែករំលែកព័តមាននេះ