បណ្តាវេជ្ជបណ្ឌិតតែងផ្តល់ដំបូន្មានជារឿយៗដល់មនុស្សទូទៅពីសារសំខាន់ក្នុងការពិនិត្យតាមដានសម្ពាធឈាមរបស់ខ្លួនខណៈវាជាកត្តាប្រឈមមួយក្នុងចំណោមកត្តាប្រឈមសំខាន់មួយចំនួនទៀតដែលអាចបង្កើនហានិភ័យកើតមានជំងឺបេះដូង ដាច់សរសៃឈាមខួរក្បាលនិងឈានទៅពិការភាព ។ លើពិភពលោក ក្នុងចំណោមមនុស្ស៣នាក់គឺមានម្នាក់រងផលប៉ះពាល់ពីជំងឺលើសឈាម ប៉ុន្តែមនុស្សជាច្រើនមិនបានដឹងថា ខ្លួនមានជំងឺនេះទេ ។ នេះគឺដោយសារដំណើរលើសឈាមមិនបានបង្ហាញរោគសញ្ញាឱ្យបានច្បាស់លាស់ ។ ទោះជាយ៉ាងណា យោងតាមអ្នកជំនាញ គេអាចកាត់បន្ថយដំណើរលើសឈាមបានតាមរយៈការទទួលទានអាហារមួយចំនួនដូចខាងក្រោមនេះ ៖
១- ចេកទុំ ៖
ប្រសិនបើអ្នកចង់បញ្ចុះសម្ពាធឈាម ចេកទុំគឺជាជម្រើសល្អជាងគេ ។ វាមានតម្លៃថោកនិងងាយរកបានគ្រប់រដូវកាល ។ ដោយវត្តមានយ៉ាងសម្បូរបែបនៃសារធាតុប៉ូតាស្យូម នាំឱ្យការទទួលទានផ្លែចេកមានប្រសិទ្ធភាពជួយបញ្ចុះសម្ពាធឈាមបានពី២-៣ពិន្ទុ និងកាត់បន្ថយហានិភ័យជំងឺដាច់សរសៃឈាមខួរក្បាល ។
២- ទឹកដោះគោឆៅ (គ្មានសារធាតុខ្លាញ់ឬក្រេម) ៖
ខណៈវាផ្ទុកទៅដោយកាល់ស្យូមនិងវីតាមីន D ទឹកដោះគោឆៅមានប្រសិទ្ធភាពជួយបញ្ចុះសម្ពាធឈាម ។ បន្ថែមពីនេះទៀតសមាសធាតុទាំង២នេះបានជួយឱ្យឆ្អឹងកាន់តែរឹងមាំទៀតផង ។
៣- ផ្លែឪឡឹក ៖
ឪឡឹកជាផ្លែឈើមួយប្រភេទដែលអ្នកជំនាញអះអាងថា ផ្តល់អត្ថប្រយោជន៍ដល់សុខភាពបេះដូង ។ ជាមួយនឹងវត្តមានសារធាតុសរសៃ លីកូប៉ែន វីតាមីន Aនិងប៉ូតាស្យូមនាំឱ្យការទទួលផ្លែឈើមួយនេះអាចធ្វើឱ្យសម្ពាធឈាមចុះទាប ។
៤- ក្រូចពោធិ៍សាត់ ៖
ក្រូចពោធិ៍សាត់សម្បូរទៅដោយសារធាតុសរសៃនិងវីតាមីន C យ៉ាងច្រើនដែលទាំងអស់នេះផ្តល់អត្ថប្រយោជន៍កាត់បន្ថយហានិភ័យជំងឺលើសឈាម ។
៥- សូកូឡាពណ៌ខ្មៅ ៖
សូកូឡាប្រភេទនេះត្រូវគេរកឃើញថា មានផ្ទុកទៅដោយសមាសធាតុ Flavonoidsដែលមានសមត្ថភាពជួយពង្រីកសរសៃឈាមមិនឱ្យកកស្ទះ ។
៦- គ្រាប់ឈូករ័ត្ន ៖
គ្រាប់ឈូករ័ត្នសម្បូរទៅដោយវីតាមីន E អាស៊ីតហ្វូលិច ប្រូតេអីុននិងសារធាតុសរសៃ ។ ការទទួលទានចំណុះពេញមួយក្តាប់ដៃក្នុងមួយថ្ងៃនឹងជួយឱ្យសម្ពាធឈាមចុះទាប ជំរុញសុខភាពដល់បេះដូង ។ គ្រាប់ឈូករ័ត្នធ្វើសកម្មភាពដោយបញ្ចេញ peptideមួយប្រភេទទប់ស្កាត់ការផលិតរបស់រាងកាយនូវអង់ហ្ស៊ីមដែលគេដឹងថា ជាមូលហេតុនាំឱ្យឡើងឈាម ។
៧- ដំឡូងជ្វា ៖
ដំឡូងជ្វាសម្បូរទៅដោយប៉ូតាស្យូម ។ វត្តមានដ៏សម្បូរបែបរបស់សារធាតុនេះបានជួយរក្សាកម្រិតសូដ្យូមឱ្យនៅទាប បញ្ចៀសបានដំណើរលើសឈាម ។
៨- ទឹកទំពាំងបាយជូរស្រស់ ៖
ទទួលទានទឹកទំពាំងបាយជូរបន្ទាប់ពីហាត់ប្រាណរួចជួយបញ្ចុះសម្ពាធឈាម ។ ប្រសិទ្ធភាពនេះ ពីព្រោះក្នុងទំពាំងបាយជូរមានផ្ទុកសមាសធាតុ polyphenolsយ៉ាងច្រើនលើសលប់ ។ polyphenolsត្រូវគេរកឃើញថា មានកម្លាំងជួយឱ្យសម្ពាធឈាមចុះទាបដោយជំរុញផលិតកម្មអុកស៊ីតនីទ្រិច ។ ចូរទទួលទានយ៉ាងហោចណាស់២កែវក្នុងមួយថ្ងៃ ៕
ចែករំលែកព័តមាននេះ