ការទទួលទានទឹកទៀងទាត់គឺពិតជាមានសារសំខាន់ខ្លាំងណាស់ក្នុងការរក្សាបាននូវសុខភាពល្អ ។ មនុស្សភាគច្រើនបំផុតបានដឹងថា ៧០ភាគរយនៃទម្ងន់រាងកាយសរុបគឺជាសារធាតុទឹក ។ សារធាតុទឹកមានវត្តមាននៅក្នុងផ្នែកទាំងអស់នៃរាងកាយ ហើយរឹតតែមានច្រើនជាងនេះគឺនៅក្នុងសរីរាង្គដូចជា សួតនិងខួរក្បាល ខណៈវត្ថុរាវផ្សេងទៀតដូចជា ឈាម ទឹករងៃទឹកមាត់មានច្រើនគ្រប់សរីរាង្គប្រព័ន្ធរំលាយអាហារ ។
ជាទូទៅ យើងមានជំនឿថា ស្រេកទឹកគឺជាពេលដែលរាងកាយត្រូវការសារធាតុទឹក ។ ជំនឿនេះគឺជាការពិត ប៉ុន្តែការសិក្សាស្រាវជ្រាវក្នុងពេលថ្មីៗមួយចំនួនបានចង្អុលបង្ហាញថា មានផ្នែកផ្សេងទៀតជាច្រើនក្នុងរាងកាយដែលមិនទទួលបានសារធាតុទឹកគ្រប់គ្រាន់ ។ ប្រសិនជាមិនអើពើពីចំណុចទាំងនេះ នោះអាចនឹងនាំឱ្យមានជំងឺធ្ងន់ធ្ងរមួយចំនួនមកយាយីដល់រាងកាយ ។
មនុស្សភាគច្រើនបំផុតបានចំណាយពេល ច្រើនម៉ោងធ្វើការងារនៅក្នុងបរិស្ថានដែលបំពាក់ដោយម៉ាស៊ីនត្រជាក់ ។ ដូច្នេះពួកគេកម្រ មានអារម្មណ៍ស្រេកទឹកខ្លាំងណាស់ ប៉ុន្តែនេះមិន មែនមានន័យថា រាងកាយរបស់ពួកគេមិនត្រូវការទឹកនោះទេ ។ ការខ្វះសារធាតុទឹក អាចនាំទៅរកអាការអស់កម្លាំង ។ ដូច្នេះ ដើម្បីធ្វើឱ្យសុខភាពបានល្អប្រសើរ គេគួរផឹកទឹកឱ្យបានគ្រប់គ្រាន់ ។
ជាទូទៅ ទឹកពិតជាមានសារសំខាន់ក្នុងការរក្សានូវសុខភាពរាងកាយ ។ វាមិនត្រឹមតែអាចជួយឱ្យគ្រាប់ពូជមួយដុះលូតលាស់ទៅជាដើមឈើធំមួយដើមប៉ុណ្ណោះទេ ប៉ុន្តែវាក៏ជួយឱ្យរាងកាយរីកធំធាត់ផងដែរ ។ លំហូរសារធាតុទឹក ទាំងក្នុងនិងក្រៅកោសិកាគឺបង្កើតបានជាថាមពលសម្រាប់ទ្រទ្រង់រាងកាយ ។ ថាមពលនេះត្រូវបានរក្សាទុកនៅក្នុងរាងកាយរួមជាមួយប្រភពថាមពលរាងកាយដទៃទៀតដែលបានមកពីសារធាតុគីមី ។ ថាមពលដែលបង្កើតដោយសារធាតុទឹកក្នុងបណ្តាកោសិកា អាចជួយបញ្ជូននូវរោគសញ្ញានៅក្នុងបណ្តាសរសៃប្រសាទ ។ បន្ថែមលើនេះទៀត វត្តមានសារធាតុទឹកក្នុងរាងកាយគ្រប់គ្រាន់គឺមានឥទ្ធិពលលើមុខងារប្រូតេអីុន និងអង់ស៊ីមគ្រប់ប្រភេទដែលបន្ទាប់មកត្រូវបានរំលាយនៅក្នុងទឹក ។
អត្ថប្រយោជន៍មួយផ្សេងទៀតរបស់ទឹកគឺជួយរក្សាសំណើមស្រទាប់ខាងក្នុងនៃសរីរាង្គ ខាងក្នុងរាងកាយ ។ វាជួយរក្សាកម្រិតវត្ថុរាវ មានដូចជា ឈាមនិងទឹករងៃឱ្យស្ថិតក្នុុងសភាពធម្មតានិងស្ថិតស្ថេរ រក្សាបាននូវកម្រិតសីតុណ្ហភាពរាងកាយ ។
ក្រៅពីអត្ថប្រយោជន៍ខាងលើ ទឹកអាចជួយកម្ចាត់ចោលជាតិពុលពីរាងកាយ និងព្រមទាំងជួយគ្រប់គ្រងឱ្យមានរបៀបរៀបរយនូវរចនាសម្ព័ន្ធធម្មតានិងមុខងារស្បែក ។ ក្នុងមួយថ្ងៃរាងកាយបាត់បង់ជាតិទឹកប្រហែល៤លីត្រ ។ ដូច្នេះ ដើម្បីបំពេញបរិមាណដែលបាត់បង់នេះគេគួរផឹកយ៉ាងហោចណាស់ស្មើនឹងចំនួនទឹកដែលបាត់បង់ ៕
ចែករំលែកព័តមាននេះ