រាជធានីភ្នំពេញ ៖ ក្រសួងរៀបចំដែនដីនគរូបនីយកម្មនិងសំណង់ បានសម្រេចបញ្ជូនមន្ត្រីជំនាញទៅត្រួតពិនិត្យករណីបាក់រំលំអគារកម្ពស់៧ជាន់នៅខេត្តព្រះសីហនុ ដែលបណ្តាលឲ្យមនុស្សមួយចំនួនបានស្លាប់ រងបួស និងខូចខាតទ្រព្យសម្បត្តិមួយចំនួនទៀតរបស់ប្រជាពលរដ្ឋ។ លោក ឆាន់ សូរ្យផល…
រាជធានីភ្នំពេញ ៖ ក្រសួងរៀបចំដែនដីនគរូបនីយកម្មនិងសំណង់ បានសម្រេចបញ្ជូនមន្ត្រីជំនាញទៅត្រួតពិនិត្យករណីបាក់រំលំអគារកម្ពស់៧ជាន់នៅខេត្តព្រះសីហនុ ដែលបណ្តាលឲ្យមនុស្សមួយចំនួនបានស្លាប់ រងបួស និងខូចខាតទ្រព្យសម្បត្តិមួយចំនួនទៀតរបស់ប្រជាពលរដ្ឋ។
លោក ឆាន់ សូរ្យផល អគ្គនាយកនៃអគ្គនាយករដ្ឋានសំណង់ នៃក្រសួងរៀបចំដែនដី នគរូបនីយកម្មនិងសំណង់បានអោយដឹងកាលពីព្រឹកថ្ងៃទី២២ ខែមិថុនានេះថា លោកបានដឹកនាំក្រុមការងារជំនាញមួយក្រុមឆ្ពោះទៅកាន់ខេត្តព្រះស៊ីហនុហើយ ដើម្បីត្រួតពិនិត្យសា្ថនភាពនានាជុំវិញករណីដែលបណ្តាលអោយមានការបាក់ស្រុតរំលំអគារកម្ពស់៧ជាន់នៅខេត្តព្រះសីហនុនេះ។
លោកបានបញ្ជាក់ថា ក្រុមការងារនេះនឹងសហការជាមួយអាជ្ញាធរខេត្តពាក់ព័ន្ធ រួមទាំងស្នងការនគរបាលខេត្តព្រះសីហនុដើម្បីចុះវាយតម្លៃរកមូលហេតុដែលនាំឲ្យអគារកម្ពស់៧ជាន់នេះបាក់និងពិនិត្យទិដ្ឋភាពច្បាប់និងបទដ្ឋានបច្ចេកទេសសំណង់ថែមទៀតផង។
លោកឱ សារឿន ប្រធានមន្ទីរព័ត៌មាននិងជាអ្នកនាំពាក្យខេត្តព្រះសីហនុបានឲ្យដឹងថា ក្រុមការងារដែលដឹកនាំដោយលោកយន្ត មីន អភិបាលខេត្តព្រះសីហនុ កំពុងសង្គ្រោះកាយយកជនរងគ្រោះចេញពីក្នុងគំនរបាក់នៃសំណង់អគារនេះ ខណៈក្រុមការងារបានរកឃើញជនរងគ្រោះជាកម្មករខែ្មរបានចំនួន១៨នាក់ ក្នុងនោះស្លាប់ចំនួន៤នាក់។ លោកបញ្ជាក់ថា ក្រុមការងារនឹងបន្តកាយរុករកជនរងគ្រោះបន្តទៀត ដោយសង្ស័យថា នៅមានកម្មករជាង១០នាក់ទៀតកំពុងជាប់នៅក្នុងគំនរបាក់បែកអគារនេះ។
សូមបញ្ជាក់ថា ករណីបាក់រំលំអគារ៧ជាន់នៅខេត្តព្រះសីហនុនេះបានកើតឡើងនៅវេលាម៉ោងជិត៥ព្រឹកព្រលឹមនា ថ្ងៃទី២២ ខែមិថុនា ឆ្នាំ២០១៩នេះ។ អគារនេះនៅជិតកន្លែងលាងរថយន្តយីហោ «អារុណរះ» ក្នុងសង្កាត់លេខ៤ ក្រុងព្រះសីហនុ ជារបស់ជនជាតិចិនដែលបានជួលដីទំហំទទឹង១៥ម៉ែត្រ និងបណ្តោយ៣០ម៉ែត្រ សាងសង់កម្ពស់៧ជាន់ ហើយសង់បានប្រហែល៨០ភាគរយ៕ (កែសម្រួលដោយ ៖ ធីតា)
ចែករំលែកព័តមាននេះ