រាជធានីភ្នំពេញ៖ អតីតតារាចម្រៀងក្នុងក្រុមEV ដែលធ្លាប់ល្បីឈ្មោះកាលពីជាង១០មុនលោកបូ វិចិត្រ បានធ្លាក់ខ្លួនធ្វើជាអ្នកសារ៉េឡាន នៅក្លឹបកម្សាន្តមួយក្នុងរាជធានីភ្នំពេញ ដើម្បីបានប្រាក់ចិញ្ចឹមជីវិត គឺជីវិតស្រអាប់ពណ៌យ៉ាងខ្លាំង ។ រូបភាពរបស់អតីតតារាចម្រៀងម្ចាស់បទ«ប៊ិះស៊យ» រូបនេះត្រូវគេបង្ហោះនៅតាមហ្វេសប៊ុកកាលពីពេល ថ្មីៗកន្លងមកនាំឲ្យទស្សនិកជនដែលធ្លាប់ស្គាល់ និងគាំទ្របទចម្រៀងរបស់លោកភ្ញាក់ផ្អើលខ្លាំង ។
ហ្វេសប៊ុកឈ្មោះថា Jenny Chamroeun បានបង្ហោះវីដេអូស្តែងពីសកម្មភាពរបស់លោក បូ វិចិត្រ ដែលកំពុងតែសារ៉េឡានភ្ញៀវនៅក្នុងក្លឹបកម្សាន្តមួយ ជិតអាហារដ្ឋានយាយម្លូរ។ ជាមួយនឹងរូបភាពនោះម្ចាស់ហ្វេសប៊ុកបានភ្ជាប់សារថា «បងបូ វិចិត្រ ម្ចាស់បទ«ប៊ិះស៊យ »ដុនដាប ឃើញសភាពគាត់ជា រឿយៗ ក្បែរក្លឹបកម្សាន្ដ៥៥ ជិតអាហារដ្ឋានយាយម្លូរ អាយ៊ែរឡានឲ្យគេ ពិបាកភ្នែកណាស់ ធ្លាប់ តែស្ដាប់ចម្រៀងគាត់ពី ក្មេង ៗ ១០ឆ្នាំជាងមុន។ សង្ឃឹមថានឹងមានអ្នកឈឺឆ្អាលទៅចុះ សួរគាត់គ្មានលេខទូរសព្ទ័ផ្ទាល់ខ្លួនទៀត អាចជួយគាត់បាន គាត់នៅជិតផ្ទះខ្ញុំ ។ ឃើញសភាពបែបនេះប្អូននៅមិនសុខ មានតែបង្ហោះ គាត់មិនប្រកាន់ខ្ញុំទៀត គាត់ថាជួយគាត់ផង ក្រែងបានសម្រួលជីវភាពបានខ្លះ »។
បន្ថែមពីការបង្ហោះសារនេះលោកចំរើន ក៏បានអះអាងបន្ថែមប្រាប់កោះសន្តិភាពតាមសារអេឡិចត្រូនិកថា លោកបានជិះកាត់តាមហាងមួយនេះ ហើយបានឃើញលោកបូ វិចិត្រ នៅទីនោះជា រឿយៗ តែកន្លងមកលោកមិនបានចាប់អារម្មណ៍ទេ ។ នៅពេលដែលលោកបានឃើញព័ត៌មានដែលគេចុះផ្សាយពីតារាចម្រៀងចាស់រួមជំនាន់ជាមួយលោកបូ វិចិត្រ នោះ លោកក៏បានទៅថត ហើយបានបង្ហោះតាមហ្វេសប៊ុកតែម្តង ។
បើតាមលោកចំរើន នៅក្នុងអំឡុងពេលនោះលោកមិនបានសួរនាំច្រើនពីស្ថានភាពលោក បូ វិចិត្រ ទេ ព្រោះកំពុងរវល់ ។ ប៉ុន្តែលោក បូ វិចិត្រ បានស្នើសុំឲ្យរូបលោកបង្ហោះព័ត៌មាននេះផង ក្រែងមានឱកាសឲ្យលោកបានចូលច្រៀងបន្តទៀត ដើម្បីជួយដោះស្រាយជីវភាពបានខ្លះ ។
លោកបូ វិចិត្រ គឺជាអតីតតារាចម្រៀងរួមក្រុមEV ជាមួយលោកឃុំ ប៊ុណ្ណាដែត ឱក សុគន្ធ កញ្ញាយក់ ឋិតរដ្ឋា លី អុីវ៉ាធីណា សែម សង្វាត និងលោកសេន រ៉ានុត ដែលមានឈ្មោះល្បីក្នុងផលិតកម្មរស្មីស្ទឹងសង្កែ ។ បទចម្រៀងរបស់លោកមានដូចជា «ប៊ិះស៊យ» «ឈប់បោកប្រាស់បង» និងបទ«ក្បត់អូនម្តេចទៅ » ទទួលបានការគាំទ្រគួរសមកាលពីជាង១០ឆ្នាំមុន ៕ (កែសម្រួលដោយ ៖ បុប្ផា)
ចែករំលែកព័តមាននេះ