ខេត្តកំពង់ឆ្នាំង ៖ ប្រជាពលរដ្ឋរស់នៅភូមិអណ្តូងឬស្សី ឃុំស្រែថ្មី ស្រុករលាប្អៀរ បានសម្ដែងទឹកចិត្តរីករាយលើគម្រោងអភិវឌ្ឍន៍ភូមិអណ្ដូងឫស្សីនេះ ឲ្យក្លាយជាភូមិទេសចរណ៍គំរូដែលអាជ្ញាធរគ្រោងរៀបចំឲ្យកើតឡើងក្នុងពេលឆាប់ៗនេះ ។ កិច្ចប្រជុំជាថ្មីនៅព្រឹកថ្ងៃទី២០ ខែមិថុនានេះ…
ខេត្តកំពង់ឆ្នាំង ៖ ប្រជាពលរដ្ឋរស់នៅភូមិអណ្តូងឬស្សី ឃុំស្រែថ្មី ស្រុករលាប្អៀរ បានសម្ដែងទឹកចិត្តរីករាយលើគម្រោងអភិវឌ្ឍន៍ភូមិអណ្ដូងឫស្សីនេះ ឲ្យក្លាយជាភូមិទេសចរណ៍គំរូដែលអាជ្ញាធរគ្រោងរៀបចំឲ្យកើតឡើងក្នុងពេលឆាប់ៗនេះ ។ កិច្ចប្រជុំជាថ្មីនៅព្រឹកថ្ងៃទី២០ ខែមិថុនានេះ ប្រជាពលរដ្ឋក្នុងភូមិអណ្ដូងឫស្សីបានសម្ដែងការអបអរសាទរចំពោះគម្រោងអភិវឌ្ឍន៍របស់អាជ្ញាធរខាងលើនេះ ដោយព្រមបរិច្ចាគមុខផ្ទះដីខ្លះសម្រាប់កសាងផ្លូវក្នុងភូមិ ។
ប្រជាពលរដ្ឋបានលើកឡើងថា ៖ ពួកគាត់មិនបដិសេធចំពោះរៀបចំគម្រោងអភិវឌ្ឍន៍ភូមិអណ្ដូងឫស្សីឲ្យក្លាយជាភូមិទេសចរណ៍គំរូនេះទេព្រោះថា បច្ចុប្បន្ននេះភ្ញៀវទេសចរមកលេង គឺគេមកលេងកម្សាន្តតាមដោយកន្លែងតែប៉ុណ្ណោះ ។ ហេតុនេះហើយបើសិនជាមានរៀបចំសហគមន៍អណ្ដូងឫស្សីឲ្យបានដូចៗគ្នានោះ គឺពិតមានចំណូលតាមគ្រួសារជាក់ជាមិនខានឡើយ ។
ស្ត្រីម្ចាស់សិប្បកម្មស្មូនឆ្នាំងម្នាក់ អ្នកដែលធ្លាប់ទទួលការបណ្ដុះបណ្ដាលនៅក្រៅប្រទេសបាននិយាយថា ៖ គាត់សប្បាយចិត្តរីករាយណាស់ ព្រោះគាត់ធ្លាប់ទៅប្រទេសក្រៅក៏មានសហគមន៍ទេសចរណ៍បែបនេះដែរ ហើយការរៀបចំរបស់ប្រទេសគេប្រហាក់ប្រហែលនឹងគម្រោងរបស់ខេត្តដែលកំពុងតែរៀបចំនេះគាត់សូមចូលរួមអបអរសាទរទាំងអស់គ្នា ។ ដោយឡែក ឯកឧត្តម ស៊ុន សុវណ្ណរិទ្ធ អភិបាលរងខេត្តកំពង់ឆ្នាំងបានផ្ដល់កិច្ចសម្ភាសន៍នៅក្នុងកិច្ចប្រជុំនោះថា មូលហេតុដែលជ្រើសរើសយកភូមិអណ្ដូងឫស្សីនេះធ្វើជាភូមិគំរូលើវិស័យទេសចរណ៍ដោយសារតែភូមិនេះជាភូមិដែលផលិតក្អមឆ្នាំងពីបុរាណកាលមក ។ ប៉ុន្តែដើម្បីអភិវឌ្ឍន៍ភូមិនេះបាន គឺមិនមែនពឹងផ្អែកតែលើការផលិតក្អមឆ្នាំងតែមួយមុខវាមិនគ្រប់គ្រាន់នោះទេ យើងត្រូវពង្រីកផ្លូវប្រវែងជាង៤គីឡូម៉ែត្រដែលមានទទឹង១៥ម៉ែត្រ ក្នុងនោះចាក់កៅស៊ូ៦ម៉ែត្រ និងសងខាងផ្លូវ ៩ម៉ែត្រ ជាដីចំណីផ្លូវរបស់ប្រជាពលរដ្ឋតាមមុខផ្ទះរាងៗខ្លួន ដោយឲ្យពួកគាត់ដាំផ្កាមុខផ្ទះរៀងៗខ្លួន ។ សហគមន៍នេះនឹងរៀបចំឲ្យមានការចិញ្ចឹមសត្វមាន់ទាធ្វើសួនផ្កាសួនបន្លែ និងកន្លែងសម្រាប់សម្រាកដល់ភ្ញៀវទេសចរផងដែរ ។
ឯកឧត្តមបានបញ្ជាក់ថា ប្រជាពលរដ្ឋដែលបានចូលរួមប្រជុំទាំងជាង២រយនាក់បានឯកភាពនិងសុខចិត្តបរិច្ចាគដីមុខផ្ទះធ្វើផ្លូវអោយធំទូលាយ និងចូលរួមដាំដើមផ្កាដើមឈើហូបផ្លែជាដើម ។ ក្នុងឱកាសនោះឯកឧត្តមអភិបាលរងខេត្តបានចែកជូនសារុង ដល់ប្រជាពលរដ្ឋ ដែលបានចូលរួមទាំងជាង២០០នាក់ ក្នុងម្នាក់បានសារ៉ុង១ផងដែរ ។
គួររំលឹកដែរថាភូមិអណ្ដូងឫស្សី ឃុំស្រែថ្មី ស្រុករលាប្អៀរ គឺជាគោលដៅទេសចរណ៍ដ៏សំខាន់របស់ភ្ញៀវបរទេសដែលតែងតែឡើងពីកបាល់ទេសចរមកទស្សនាកម្សាន្តការរស់នៅរបស់ប្រជាពលរដ្ឋ ការផលិត ស្មូនឆ្នាំង ឡើងត្នោត និង សិប្បកម្មផលិតវត្ថុអនុស្សាវរីយ៍ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ