គំនិតសម្ភារនិយមកំពុងតែធ្វើឲ្យមនុស្សជាច្រើនមិនសប្បាយចិត្តនឹងអ្វីដែលខ្លួនមាន ។ ពួកគេតែងតែត្រូវបានបង្ខំឲ្យចាប់អារម្មណ៍នឹងផលិតផល ឬសេវាកម្មថ្មីៗ ហើយវាកំពុងតែប៉ះពាល់ដល់កុមារៗតាំងពីអាយុ៨ឆ្នាំមក ។
ការចង់បានសម្ភារដើម្បីចូលចុះក្នុងសង្គម ឬក្រុមមិត្តភក្តិកំពុងតែបង្កការប៉ះពាល់ដល់ទំនាក់ទំនង និងសុខភាពផ្លូវចិត្តរបស់កូនៗ ហើយឪពុកម្តាយនិងអាណាព្យាបាលត្រូវទទួលស្គាល់ថា ការទិញសម្ភារមិនមែនជាដំណោះស្រាយល្អទេពេលដែកូនៗទាមទារ ឬរងរឿងចង់បាន។
ខាងក្រោមនេះគឺជាគន្លឹះសំខាន់ៗសម្រាប់ឪពុកម្តាយដែលចង់ឲ្យកូនៗយល់ដឹងថាការមានសម្ភារមិនមែនជាកត្តាសំខាន់នៃជីវិតទេ៖
១. ធ្វើជាឧទាហរណ៍សម្រាប់កូនៗ
កូនៗតែងតែធ្វើត្រាប់តាមឪពុកម្តាយ។ ប្រសិនបើឪពុកម្តាយជាមនុស្សសម្ភារនិយមដែរនោះ កូនៗក៏ចង់បានជីវភាពរស់នៅបែបនេះដែរ។ ឪពុកម្តាយត្រូវតែបង្ហាញឲ្យកូនៗឃើញច្បាស់ពីតម្លៃនៃជីវិតដែលមិនផ្តោតសំខាន់លើសម្ភារដែលខ្លួនមាន និងធ្វើជាឧទាហរណ៍សំខាន់ជាងគេដល់កូនៗ។
២. ស្តាប់ និងព្យាយាមយល់ពីកូនៗ
សុខភាពផ្លូវកាយ និងផ្លូវចិត្តរបស់កូនៗពឹងផ្អែកលើការយកចិត្តទុកដាក់របស់ឪពុកម្តាយ និងអាណាព្យាបាល។ ពេលខ្លះ កូនៗត្រូវការតែប៉ុន្មាននាទីប៉ុណ្ណោះដើម្បីឲ្យអ្នកស្តាប់ពីអ្វីដែលពួកគេចង់និយាយ និងគិត ។
ពេលដែលកូនៗទាមទារសម្ភារផ្សេងៗ ឪពុកម្តាយគួរតែព្យាយាមស្តាប់ និងស្វែងយល់ពីមូលហេតុដែលកូនៗចង់បាន ។ ត្រូវចងចាំថាក្មេងៗមួយចំនួនធំទាមទារសម្ភារដើម្បីទទួលបានការទទួលស្គាល់ពីអ្នកដទៃ ឬប្រជាប្រិយភាពផ្សេងៗ ហើយការទិញសម្ភារដល់កូនៗមិនជួយឲ្យកូនៗដោះស្រាយបញ្ហាអ្វីទេ។
៣. ចេះបត់បែនតាមកាលៈទេសៈ
អ្នកមិនគួរយល់ព្រមរហូត ឬបដិសេធរហូតនឹងកូនៗពេលដែលពួកគេទាមទារសម្ភារទេព្រោះមានពេលខ្លះកូនៗរបស់អ្នកពិតជាចង់បានសម្ភារមួយដែលអាចជួយដល់ពួកគេ ឬជាអ្វីដែលពួកគេត្រូវការពិតមែន។ ប៉ុន្តែប្រសិនបើមូលហេតុគឺដើម្បីទទួលបានការទទួលស្គាល់ និងប្រជាប្រិយភាពនោះ អ្នកគួរតែព្យាយាមពន្យល់និងចរចាជាមួយនឹងពួកគេឲ្យបានច្បាស់លាស់។
៤. ជៀសវាងការឲ្យអំណោយងាយៗ
កូនៗអ្នកគួរតែយល់ដឹងពីការការចំណាយលើសម្ភារដែលពួកគេចង់បាន ហើយអ្នកអាចបង្រៀនដល់ពួកគេបានដោយឲ្យពួកគេចូលរួមចំណែកក្នុងការទិញផលិតផល ឬសេវាកម្ម ឬឲ្យពួកគេរងចាំមួយរយៈដូចជាចាំដល់ថ្ងៃខួបកំណើតជាដើម។ ការធ្វើដូច្នេះបង្រៀនដល់កូនៗថាពួកគេត្រូវតែខិតខំប្រឹងប្រែងសម្រេចអ្វីមួយ ឬត្រូវរងចាំដល់ថ្ងៃពិសេសទើបទទួលបានសម្ភារដែលខ្លួនចង់បាន។
កែសម្រួលដោយ ៖ សំណាង
ចែករំលែកព័តមាននេះ