រាជធានីភ្នំពេញ ៖ សវនាការនាព្រឹកថ្ងៃទី២០ មិថុនា ដែលជាសវនាការលើកទី៦លើសំណុំរឿងលោក ឡាយ វណ្ណៈ អតីតអភិបាលខេត្តតាកែវ ពាក់ព័ន្ធកនឹងការស្លាប់របស់អ្នកស្រីចេវ សុវឌ្ឍនា បានបញ្ចប់ការសាកសួរដេញដោលហើយ ហើយនៅថ្ងៃទី១១ ខែកក្កដាខាងមុខ អង្គសវនាការនឹងធ្វើការសន្និដ្ឋានរួម ដើម្បីសម្រេចផ្តន្ទាទោសក្នុងសំណុំរឿងនេះ ។ អង្គសវនាការចុងក្រោយនេះ តុលាការផ្ដោតសំខាន់លើការពន្យល់របស់លោកវេជ្ជបណ្ឌិត នងសុវណ្ណរ័ត្ន គ្រូពេទ្យកោសល្យវិច័យនៃនីតិវេជ្ជសាស្ត្រមន្ទីរសុខាភិបាលរាជធានីភ្នំពេញ ដែលបញ្ជាក់អំពីស្ថានភាពទូទៅនៃសពដែលស្លាប់ដោយ ការធ្វើឲ្យថប់ដង្ហើមស្លាប់
(ឃាតកម្ម) និងសពដែលស្លាប់ដោយការធ្វើអត្តឃាត(ចង.កស្លាប់) ។
បើតាមបទពិសោធន៍នៃការធ្វើកោសល្យវិច័យ សពចំនួនជាង៣០០០មកហើយ ទាំងការស្លាប់ដោយអត្ត ឃាត និងឃាតកម្មក្នុងរយៈពេល១៩ឆ្នាំកន្លងទៅនេះ លោកវេជ្ជបណ្ឌិត នង សុវណ្ណរ័ត្ន បានពន្យល់ថា តាមការសិក្សាស្រាវជ្រាវដែលមានឯកសារតម្កល់នៅក្រសួងសុខាភិបាល គ្រប់សពដែលស្លាប់ដោយការធ្វើឲ្យថប់ដង្ហើមស្លាប់(ឃាតកម្ម) គឺ៩៩ភាគរយមានស្លាកស្នាមផ្សេងៗគ្ន ានៅលើសាកសព មានកកឈាមនៅក្នុងភ្នែក និងឡើងពណ៌ស្វាយនៅចុងដៃចុងជើងនៃសព ។ ចំពោះសពដែលស្លាប់លើចំណង(អត្តឃាត) ដោយចងក គឺសពតែងតែក្ដាប់ដៃជាប់ជានិច្ច មានហៀរសំបោរ និងទឹកមាត់ ស្ថានភាពសពផ្ទៃ មុខមានពណ៌សស្លេក ។ សពមិនមានការប្រែពណ៌ស្វាយចុងដៃចុងជើងឡើយ ។
ចំពោះករណីសពអ្នកស្រី ចេវ សុវឌ្ឍនា នៅខេត្តតាកែវ ដែលគ្រូពេទ្យកោសល្យវិច័យខេត្ត និងសមត្ថកិច្ចនគរបាលខេត្តបញ្ជាក់ថា ស្លាប់ការធ្វើអត្តឃាតនោះ លោកមិនអាចធ្វើការសន្និដ្ឋានបានទេ ដោយសារលោកមិនបានពិនិត្យសពផ្ទាល់ ប៉ុន្តែលោកមានការកត់សម្គាល់ឃើញថា សពជនរងគ្រោះមានហៀរទឹកមាត់ និងសំបោរ នៅពេលស្រាយសពដាក់មកលើកម្រាលឥដ្ឋ ។ ដូច្នេះ ករណីនេះទុកពេលឲ្យចៅក្រម ក្រុម
ប្រឹក្សាសម្រេចសេចក្តីទៅតាមនីតិវិធី ដែលបានឆ្លងកាត់សវនាការជាច្រើនលើកនោះចុះ ។
គួរបញ្ជាក់ថា សំណុំរឿងដ៏ស្មុគស្មាញមួយនេះមានជនត្រូវចោទ៤នាក់ ១-លោក ឡាយ វណ្ណ:អាយុ៤៥ឆ្នាំ ២-លោក ឡាយ ណារិទ្ធ អាយុ៤៦ឆ្នាំ ជាបងប្រុសរបស់លោក ឡាយ វណ្ណៈ ជាប់ចោទពីបទឃាតកម្ម ប្រព្រឹត្តនៅផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ យោងតាមមាត្រា១៩៩ នៃក្រមព្រហ្មទណ្ឌ ។ ៣-ឈ្មោះ ម៉េន សាម៉ៃ ភេទប្រុស អាយុ៣៦ឆ្នាំ ជាអ្នកបើកបររថយន្តឲ្យលោក ឡាយ វណ្ណៈ និង៤-ឈ្មោះ ជឹម វុធ ហៅថូត ភេទប្រុស អាយុ៤១ឆ្នាំ ជាអ្នកបម្រើនៅផ្ទះរបស់អ្នកស្រី ចេវ សុវឌ្ឍនា ពីបទលាក់បាំងតម្រុយ ប្រព្រឹត្តនៅផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ យោងតាមមាត្រា៥៣២ នៃក្រមព្រហ្មទណ្ឌ ។
អ្នកស្រី ចេវ សុវឌ្ឍនា ត្រូវគេប្រទះឃើញស្លាប់ដោយចងកនៅក្នុងបន្ទប់ដេករបស់នាងក្នុងផ្ទះជួលដ៏ធំមួយ ស្ថិតនៅភូមិផ្សារតាកោ សង្កាត់រកាក្នុង ក្រុងដូនកែវ កាលពីល្ងាចថ្ងៃទី២៦ ខែមករា ឆ្នាំ២០១៨ ។ ការស្លាប់របស់អ្នកស្រី ចេវ សុវឌ្ឍនា ដំបូងសមត្ថកិច្ចគណៈកម្មការខេត្តតាកែវសន្និដ្ឋានថា ជារឿងអត្តឃាតព្រោះ
តែវិបត្តិស្នេហា ពោលគឺជនរងគ្រោះចងកធ្វើអត្តឃាត ។ ប៉ុន្ដែប្រមាណជិត១ខែក្រោយមកសមត្ថកិច្ចរបស់នាយកដ្ឋានព្រហ្មទណ្ឌក្រសួងមហាផ្ទៃ បានធ្វើការស្រាវជ្រាវរកឃើញថា មិនមែនអត្តឃាតទេ គឺជារឿងឃាតកម្មទៅវិញ ។
បន្ទាប់មក សមត្តកិច្ចបានបើកការស៊ើបអង្កេតតាមជំនាញ រហូតឈានដល់ឃាត់ខ្លួនជនសង្ស័យ៤នាក់ ដែលមានលោក ឡាយ វណ្ណៈ អតីតអភិបាលខេត្តផង ហើយជនសង្ស័យត្រូវបានឃុំខ្លួន និងរងនូវការចោទប្រកាន់ពីបទឃាតកម្ម និងលាក់បាំងក្នុងអំពើឃាតកម្ម ។ ជាការកត់សម្គាល់ រាល់ពេលសវនាការលោក ឡាយ វណ្ណៈ ដែលជាជនជាប់ពាក់ព័ន្ធក្នុងអំពើឃាតកម្មលើគូស្នេហ៍ តែងតែបានបដិសេធថា ខ្លួនមិនល្ងង់ ខ្លៅរហូតដល់ទៅសម្លាប់ស្រីកំណាន់ចិត្តរបស់ខ្លួននោះទេ និងបានទទួចសុំឲ្យតុលាការជួយផ្តល់យុត្តិធម៌ចំពោះការចោទប្រកាន់នេះ ៕
ចែករំលែកព័តមាននេះ