ខេត្តបាត់ដំបង ៖ តាមសេចក្ដីរាយការណ៍បឋមពីសមត្ថកិច្ចបានឲ្យដឹងថា គ្រាន់តែរយៈពេលមួយយប់សោះ អំពើចោរកម្មដែលបង្កឡើងដោយជនមិនស្គាល់មុខបានធ្វើសកម្មភាព លួចទ្រព្យសម្បត្តិ និងកាច់សោលួចយកម៉ូតូចំនួន៣លើក នៅតាមបណ្ដាស្រុក និងនៅក្នុងក្រុងបាត់ដំបង ដែលធ្វើឲ្យកម្លាំងសមត្ថកិច្ចស្ទើរវិលក្បុងក្នុងការស្រាវជ្រាវ រកមុខសញ្ញាជនដៃដល់ ។
សេចក្ដីរាយការណ៍បានបន្តថា អំពើចោរកម្មដែលបានកើតឡើង៣លើកផ្ទូនៗ ក្នុងយប់តែមួយ នេះបើតាមរបាយការណ៍បានឲ្យដឹងថា លើកទី១បានកើតឡើងនៅវេលាម៉ោងជិត១ រំលងអធ្រាត្រឈានចូលថ្ងៃទី១៩ មិថុនា ដែលជនមិនស្គាល់មុខបានចូលលួចយកទូរស័ព្ទដៃ របស់ព្រះសង្ឃ គង់នៅកុដិ ក្នុងវត្តឈើទាល ស្ថិតក្នុងភូមិឈើទាល ឃុំឈើទាល ស្រុកបាណន់ ។
របាយការណ៍បានបញ្ជាក់ថា ជនដៃដល់បានចូលលួចយកទុរស័ព្ទដៃអស់ចំនួន៥គ្រឿង និងលុយចំនួន២,២លានរៀល ខណៈព្រះអង្គសឹងលក់ ហើយមិនបានបិតទ្វារកុដិ។
ករណីទី២ អំពើចោរកម្មនេះបានកើតឡើងនៅក្នុងស្រុករុក្ខគិរី ហាក់មុនក្រោយគ្នា បន្តិច បន្ទាប់ពីអំពើចោរកម្មនៅស្រុកបាណន់ ។ សមត្ថកិច្ចបានសរសេរក្នុងរបាយការណ៍ថា ជនសង្ស័យអាចមានបក្សពួកយ៉ាងតិច២នាក់ បានដាក់ថ្នាំបំពុលឆ្កែរួចចូលលួចយកម៉ូតូ របស់ប្រជាពលរដ្ឋអស់ចំនួន២គ្រឿង នៅវេលាម៉ោង១រំលងអធ្រាត្រឈានចូលថ្ងៃទី១៩ មិថុនា នៅចំណុចកំប៉ង់ ស្ថិតក្នុងភួមិអូររំចេក ឃុំបាសាក់ ខណៈដែលម្ចាស់ផ្ទះកំពុងដឹកលក់ ។
សមត្ថកិច្ចបាននិយាយថា ម៉ូតូទាំង២គ្រឿងនោះ គឺ១គ្រឿងម៉ាកហុងដាឌ្រីម ស៊េរីឆ្នាំ២០១៥ ពាក់ស្លាកលេខ បាត់ដំបង 1C-5971 របស់ឈ្មោះលន ខុន ភេទប្រុស អាយុ៥១ឆ្នាំ និង១គ្រឿងទៀតម៉ូតូកូរ៉េ ពណ៌ខ្មៅ គ្មានស្លាកលេខរបស់ឈ្មោះម៉ន ចន្ធូន ភេទប្រុស អាយុ៤០ឆ្នាំ រស់នៅក្នុងផ្ទះជាមួយគ្នា ។ មន្ត្រីដដែលបានបញ្ជាក់ថា ម្ចាស់ផ្ទះបាន ទុកម៉ូតូទាំង២គ្រឿងនេះខាងក្រោមផ្ទះ ហើយឈ្មោះលន ខុន បានដេកក្បែរម៉ូតូ នៅខាងក្រោមផ្ទះនោះ តែមិនបានដឹងថា ត្រូវចោរចូលលួចម៉ូតូទេលុះព្រឹកឡើងទើបដឹង និងមានការផ្អើលឆោឡោតែម្ដង ។
ដោយឡែកចំពោះករណីទី៣វិញ គឺបានកើតឡើងនៅក្នុងបាត់ដំបងតែម្ដង ដែលបច្ចុប្បន្នហាក់កំពុងមមាញឹកខ្លាំងបំផុតនៃបទល្មើសអំពើចោរកម្មនេះ ។ បើតាមសមត្ថកិច្ចបានឲ្យដឹងថា ជនមិនស្គាល់មុខបានកាច់សោ.កលួចយកម៉ូតូមួយគ្រឿងរួចជិះគេចខ្លួនដោយសុវត្ថិភាព កាលពីវេលាម៉ោង៩យប់ ថ្ងៃទី១៩ មិថុនានេះ នៅចំណុចផ្សាររាត្រី ដែលស្ថិតចំកណ្ដាលបេះដូងក្រុងបាត់ដំបងតែម្ដង ។ ម៉ូតូនោះម៉ាក់ឃ្លីកពណ៌ស ស៊េរីឆ្នាំ២០១៣ ពាក់ស្លាកលេខបាត់ដំបង 2M-6514 របស់ឈ្មោះឯម បូរ៉ា ភេទប្រុស អាយុ៣៥ឆ្នាំ រស់នៅភូមិស្លាកែត សង្កាត់ស្លាកែត ក្រុងបាត់ដំបង ។ សមត្ថកិច្ចបានបញ្ជាក់ថា ជនរងគ្រោះបានទុកម៉ូតូនៅខាងមុខផ្សារ រួចដើរចូលទៅក្នុងផ្សារ លុះត្រឡប់មកវិញ ស្រាប់តែបាត់ម៉ូតូតែម្ដង ។
ជុំវិញអំពើចោរកម្មដែលបានកើតឡើងផ្ទូនៗគ្នា ទាំងនៅតាមបណ្ដាស្រុក និងនៅក្នុងក្រុងបាត់ដំបង នេះ មន្ត្រីជំនាញនៅតាមទីកន្លែងកើតហេតុទាំងនោះ ហាក់មិនទាន់មានការអះអាងថា បានកំណត់មុខសញ្ញាជនសង្ស័យណាមួយនៅឡើយទេ រហូតមកដល់ពេលនេះ ។ ប៉ុន្តែបើតាមប្រភពពីមន្ត្រីការិយាល័យជំនាញនៃស្នងការខេត្ត បានប្រាប់ថា ពេលនេះលោកស្នងការខេត្តបានដាក់ផែនការ និងជំរុញឲ្យមន្ត្រីជំនាញដុតដៃដុតជើង ដើម្បីស្រាវជ្រាវរកមុខសញ្ញាជនសង្ស័យ ។ ជាពិសេសមន្ត្រីនៅតាមតាមអធិការស្រុក និងក្រុងដែលបទល្មើសបានកើតឡើង ក្នុងទឹកដីរបស់ខ្លួនគ្រប់គ្រង ត្រូវប្រឹងប្រែងធ្វើការស៊ើបអង្កេតលើករណីនេះ ដើម្បីវែកមុខជនដៃដល់ ។
គួរកត់សម្គាល់ផងដែរចំពោះបទល្មើសដែលបានកើតឡើង ក្នុងរយៈពេលជិត១ខែកន្លងទៅនេះហាក់មានការកម្រើកយ៉ាងខ្លាំង នៅតាមស្រុកមួយចំនួន និងនៅក្នុងក្រុងបាត់ដំបង ។ បទល្មើសដែលបាន និងកំពុងផ្ទុះឡើងនាពេលនេះ ត្រូវគេកត់សម្គាល់ថា គឺ«អំពើចោរកម្ម និងគ្រឿងញៀន» ។ ប៉ុន្តែបទល្មើសដែលកើតឡើងធ្ងន់ធ្ងរ និងញឹកញ៉ាប់ជាងគេមួយរយៈកន្លងទៅនេះ ដែលមានទាំងបទល្មើសឧក្រិដ្ឋផង គឺកើតឡើងនៅក្នុងស្រុកបាណន់ ដែលមានអំពើ «លួច ប្លន់ ឃាតកម្ម និងជួញដូរគ្រឿងញៀន» ៕
ចែករំលែកព័តមាននេះ