បន្ទាយមានជ័យ ៖ បិតទ្វារកាស៊ីណូយីហោឡាក់គីវីងក្រុងប៉ោយប៉ែត ក្រោយពេលឃាត់ខ្លួនសង្ស័យ១៥៥នាក់ ត្រូវបានធ្វើតេស្តមានសារធាតុញៀនចំនួន១៤៤នាក់ ត្រូវបានកសាងសំណុំរឿងដើម្បីអនុវត្តន៍ទៅតាមច្បាប់ ។
លោកវរសេនីយ៍ទោ ង៉េង សុជា ស្នងការរងទទួលផែនប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តបន្ទាយមានជ័យបានប្រាប់ថា ដោយបានការដឹកនាំផ្ទាល់ពីលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យបានដឹកនាំកម្លាំងនគរបាលខេត្តសហការជាមួយកម្លាំងនគរបាលក្រុងប៉ោយប៉ែត បានចុះប្រតិបត្តិការបង្ក្រាបបទល្មើសគ្រឿងញៀន នៅក្នុងកាស៊ីណូយីហោឡាក់គីវីង ចាប់ពីម៉ោង៣និង៣០នាទី ថ្ងៃទី១៨ ដល់១៩ ខែមិថុនា ឆ្នាំ២០១៩ ដែលស្ថិតសង្កាត់-ក្រុងប៉ោយប៉ែត ។
លោកបានបញ្ជាក់ថា ប្រតិបត្តិការបង្ក្រាបបទល្មើសគ្រឿងញៀនកាស៊ីណូយីហោឡាក់គីវីងក្រុងប៉ោយប៉ែតត្រូវកម្លាំងនគរបាលជំនាញឃាត់ខ្លួនជនសង្ស័យជាបន្តបន្ទាប់បានចំនួន១៥៥នាក់ មានស្រីចំនួន២នាក់ ក្នុងនោះមានមេការកាស៊ីណូចំនួន២នាក់ បុគ្គលិកកាស៊ីណូចំនួន៤នាក់ និងដកហូតវត្ថុតាងគ្រឿងញៀនមានប្រភេទមេតំហ្វេតាមីនហៅយ៉ាម៉ា ចំនួន៥៤គ្រាប់ និងខេទឹកកកចំនួន៧ថង់តូច កេតាមីន១កូនថង់ ។
លោកវរៈសេនីយ៍ទោ ង៉េង សុជា បានបន្តថា ក្រោយពេលឃាត់ខ្លួនជនសង្ស័យចំនួន១៥៥នាក់ ក្នុងនោះមានស្រី២នាក់ និងវត្ថុតាងគ្រឿងញៀនត្រូវបានបញ្ជូនខ្លួនមកស្នងការនគរបាលខេត្តបន្ទាយមានជ័យ ដើម្បីធ្វើការសាកសួរ និងធ្វើតេស្តមានសាធាតុញៀនចំនួន១៤៤នាក់មានមេការកាស៊ីណូ២នាក់មាន១-ឈ្មោះ ស៊ុន សៀងហេង ភេទប្រុស អាយុ៤៧ឆ្នាំ មានស្រុកកំណើតភ្នំពេញស្នាក់នៅក្រុងប៉ោយប៉ែត ២-ឈ្មោះ ពួន គឹមហេង ភេទប្រុស អាយុ៣១ឆ្នាំ មានស្រុកកំណើតខេត្តបាត់ដំបង ស្នាក់នៅក្រុងប៉ោយប៉ែត ។
តាមចម្លើយឈ្មោះ ស៊ុន សៀងហេង ជាមេការ និងឈ្មោះ ពួន គឹមហេង ជាមេការងបានសារភាពថា ពួកគាត់គ្រាន់តែស៊ីឈ្នួល និងទទួលប្រាក់ខែធ្វើជាមេការ និងមេការងក្នុងកាស៊ីណូយីហោឡាគីវីង គឺថៅឈ្មោះ ធា រ៉ា រស់នៅក្រុងប៉ោយប៉ែតដែលរកស៊ីបើកខារ៉ាអូខេ និងរាង្គសាល និងក្លិបកម្សាន្ត ។ តែឈ្មោះ ធា រ៉ា បានបដិសេដ្ឋថា កាស៊ីណូយីហោឡាក់គីវីងនេះត្រូវបានត្រូវបានជួលអោយទៅឈ្មោះ ស៊ុន សៀងហេង ដោយមានលិខិតស្នាមលាយលាក់អក្សមានមេធាវីត្រឹមត្រូវទៀតផង ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានបញ្ជាក់ថា ៖ប្រតិបត្តិការបង្ក្រាបបទល្មើសគ្រឿងញៀនក្នុងកាស៊ីណូយីហោឡាក់គីវីងបានឃាត់ខ្លួនជនសង្ស័យជាបន្តបន្ទាប់រហូតដល់១៥៥នាក់ មានស្រី២នាក់ មានមេការកាស៊ីណូចំនួន២នាក់ និងបុគ្គលិកកាស៊ីណូ៤នាក់ និងរឹបអូសវត្ថុតាងគ្រឿងញៀនមួយចំនួនក្រោយពេលធ្វើតេស្តមានសាធាតុញៀនចំនួន១៤៤នាក់ ត្រូវបានកសាងសំណុំរឿង ដើម្បីបញ្ជូនទៅសាលដំបូងខេត្តបន្ទាយមានជ័យ ដើម្បីចាត់ការតាមច្បាប់ និងសម្រេចបិតទ្វារកាស៊ីណូយីហោឡាក់គីវីង ៕ កែសម្រួលដោយ ៖ សុឃាក់
ចែករំលែកព័តមាននេះ