រាជធានីភ្នំពេញ៖ បើទោះបីជាកន្លងមកលោកញ៉ែម សុគន្ឋ បានបង្ហាញអារម្មណ៍នឿយណាយអាជីពសិល្បៈ ដ្បិតល្បីតែឈ្មោះ តែមិនអាចសាងជីវភាពឲ្យល្អប្រសើរបានក្តី ពេលនេះលោកប្រែចិត្តហើយ ។ ជាក់ស្តែងលោកនៅតែចូលរួមសម្តែង ព្រមទាំងការងារជាពិធីករទូរទស្សន៍…
រាជធានីភ្នំពេញ៖ បើទោះបីជាកន្លងមកលោកញ៉ែម សុគន្ឋ បានបង្ហាញអារម្មណ៍នឿយណាយអាជីពសិល្បៈ ដ្បិតល្បីតែឈ្មោះ តែមិនអាចសាងជីវភាពឲ្យល្អប្រសើរបានក្តី ពេលនេះលោកប្រែចិត្តហើយ ។ ជាក់ស្តែងលោកនៅតែចូលរួមសម្តែង ព្រមទាំងការងារជាពិធីករទូរទស្សន៍ ។
លោកញ៉ែម សុគន្ឋ ក្រោយប្រឡងជាប់ហ្វ្រេសុីប៊យជំនាន់ទី១មក បានចាប់អាជីពសម្តែងភាពយន្ត ដោយទទួលបានឱកាសជាបន្តបន្ទាប់ ។ លោកមានទម្រង់មុខបែបខ្មែរ ដូច្នេះហើយអ្នកដឹកនាំរឿង និយាយថាលោកត្រូវសឹងគ្រប់សណ្ឋាននៃតួសម្តែង មិនថាតែជាតួស្តេច មេទ័ពបុរាណ មាណព… ។ មានខ្សែភាពយន្តខ្នាតធំជាច្រើនត្រូវលោកញ៉ែម សុគន្ឋ ថតរួចមកហើយដោយទទួលបានប្រជាប្រិយភាពជាបន្តបន្ទាប់។ គិតរហូតមកទល់ពេលនេះលោកនៅតែបន្តមានមុខបណ្តែតលើវិស័យសិល្បៈភាពយន្ត ។
ទោះជាយ៉ាងណាក្តី លោកសុគន្ធ និយាយថា «ខ្ញុំហាក់ចង់នឿយណាយដោយសារតែវិស័យភាពយន្តហាក់នៅតែមិនទាន់តាមតម្រូវការទស្សនិកជនស្របពេលរឿងបរទេសជិតខាងវាយអុកឡុកចូលមកយ៉ាងច្រើនធ្វើឲ្យកុនខ្មែរចង់ផ្ងារជើងទៅម្ខាងទៀត »។
ញ៉ែម សុគន្ឋ កាលពីពេល ថ្មីៗកន្លងមកនិយាយថា«ក្នុងនាមជាតារាភាពយន្តតែងតែខិតខំសម្តែងលើកមុខមាត់វិស័យភាពយន្តទោះលំបាកឆ្លងកាត់ហាលភ្លៀងខ្យល់កម្តៅថ្ងៃ ខ្លោចរលាកស្បែកបែបណាខ្ញុំនៅតែព្យាយាមព្រោះនេះជាតួនាទី ហើយអ្វីដែលយើងធ្វើតាំងពីដើមមក ។
អារម្មណ៍មុននេះចំពោះរឿងខ្មែរគេមិនសូវឲ្យតម្លៃក៏ព្រោះរឿងបរទេសគេបញ្ចូលមកច្រើនពេកដែលតួសម្តែងណាក៏ចង់អស់សង្ឃឹម ។ ក្រោយពេលដឹងថាបើយើងមិននាំគ្នាងើប ពិតណាស់យើងកាន់តែចាញ់ ដូចនេះខ្ញុំនៅតែតស៊ូសម្តែង និងគិតថាមកពី បងៗខាងផលិតករទាំងអស់គាត់នៅតែចំណាយដើមទុនរិះរកអ្វីដែលថ្មីៗដើម្បីឲ្យកុនខ្មែរទទួលយកបានក្នុងក្រសែភ្នែកទស្សនិកជនព្រមទាំងមើលឃើញថាបច្ចេកទេសថតរបស់យើងក៏ល្អ ហើយមានយុវជនរលកក្រោយមានទេពកោសល្យល្អជាច្រើនយើងមិនអាចមើលរំលងដើរចេញបានឡើយ »។
ញ៉ែម សុគន្ឋ បានបន្ថែមអាជីពសិល្បៈរបស់ខ្លួនតាមរយៈការធ្វើជាពិធីករនៅទូរទស្សន៍ហង្សមាស ដោយទទួលបានភាពជោគជ័យស្ទើរមិននឹកស្មានដល់ ។ ក្រៅពីនេះច្រៀងតាមពិធីមង្គលការជាមួយក្រុមតារា ល្បីៗមួយចំនួនដូចជាក្រុមលោកយ៉ែម សំអូន លោកអេឡិច ចិន្ត្រា ជាដើម ។
អាជីពជាតារាភាពយន្ត លោកញ៉ែម សុគន្ធ ចាត់ទុកថាដូចជាស្គរ ប្រហោងក្នុង គឺល្បីតែឈ្មោះ តែមិនអាចសាងជីវភាពបានធូរធារទេ ដូច្នេះហើយទើបកន្លងមកលោកនឿយណាយចង់ឈប់ ។ ទោះជាយ៉ាងណាក្តីតាំងពីយូរនោះមក លោកនៅបន្តជីវិតលើវិថីសិល្បៈដដែលមកដល់បច្ចុប្បន្ននេះ ។ គឺបានន័យថាលោកបានប្រែចិត្តលែងចង់បោះបង់អាជីពសិល្បៈវិញ ។
ក្រោយរៀបការរួចមកលោកញ៉ែម សុគន្ធ ចង់បានកូន តែមកទល់ពេលនេះនៅពុំទាន់មានពន្លឺទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ