រាជធានីភ្នំពេញ ៖ តារាសម្តែងជើងថ្មីនាង ទេព កញ្ញា បានរៀបចំពិធីឡើងគេហដ្ឋានថ្មីរបស់ខ្លួនយ៉ាងឱឡារឹកកាលពីពេលថ្មីៗនេះ ដែលផ្ទះវីឡាថ្មីដែលនាងកំពុងរស់នៅយ៉ាងត្រជាក់ល្ហឹមនេះ ស្ថិតនៅក្នុងបុរីហុងឡាយ សង្កាត់ចោមចៅ ខណ្ឌពោធិ៍សែនជ័យ។
ការសម្រេចទិញផ្ទះដែលមានតម្លៃជាង១០ម៉ឺនដុល្លារពីតារារូបនេះ ត្រូវបានគេសង្ស័យថា នាងអាចនឹងមានបុរសមានទ្រព្យណាម្នាក់ដែលស្ថិតនៅពីក្រោយការជួយឧបត្ថម្ភទិញផ្ទះមួយនេះ ក្នុងពេលដែលនាងកំពុងចាប់ផ្តើមមានឈ្មោះបោះសម្លេងនៅក្នុងវិស័យសិល្បៈ។
យ៉ាងណា តារាសម្តែងវ័យក្មេងសាច់សខ្ចី ទេព កញ្ញា មិនបានទទួលស្គាល់ការលើកឡើងពីមហាជនមួយចំនួនលើបញ្ហាទាំងនោះឡើយ ពោលគឺអ្វីដែលនាងកំពុងមានសព្វថ្ងៃនេះ គឺបានមកពីកម្លាំងញើសឈាមនាង និងក្រុមគ្រួសាររបស់នាងសុទ្ធសាធ។
ទេព កញ្ញា បានអះអាងថា ផ្ទះដែលនាងទើបតែបានទិញនេះ គឺមានតម្លៃជាង១០ម៉ឺនដុល្លារ ដោយមិនគិតពីការចំណាយលើការតុបតែងនោះឡើយ ខណៈពេលដែលលុយដែលបានទិញនេះ គឺកម្លាំងញើសឈាមរបស់នាង និងក្រុមគ្រួសារ។ នាងបញ្ជាក់ថា ការទិញផ្ទះថ្មីនេះ គឺនាងមិនទាន់បានទិញផ្តាច់នោះឡើយ គឺជាការទិញបង់រំលោះចំនួន ៥០ភាគរយ ប៉ុន្តែនាងមិនមានការព្រួយបារម្ភពីការបង់នោះឡើយ ដោយសារបច្ចុប្បន្ននាងមានការងារសិល្បៈ ធ្លាក់មកជាហូរហែ។
បើតាម ទេព កញ្ញា ថា ការទិញផ្ទះដែលមានតម្លៃខាងលើនេះ មិនមែនជារឿងមួយចម្លែកឡើយ ដោយសារតែនាងអាចមានលទ្ធភាពពីការសន្សំលើការងារសិល្បៈកន្លងមក ព្រោះតម្លៃនៃការថតរឿងរបស់នាងម្តងៗ ក៏ទទួលបានថ្លៃគួរសមផងដែរ។ ភាគច្រើននាងទទួលបានតំណែងជាតួមួយធំនៅក្នុងសាច់រឿង ដោយមិនសូវទទួលបានតួរាយរង ហេតុនេះតម្លៃទាល់តែទទួលបានក្នុងកម្រិតមួយសមរម្យ ទើបនាងអាចយល់ព្រមក្នុងការថត។
តួឯកនៅក្នុងរឿង «គ្រូខ្មែរ» នាង ទេព កញ្ញា បានអះអាងថា បច្ចុប្បន្នបញ្ហាគូស្រករនាងមិនទាន់គិតឡើយទេ ក្នុងពេលដែលនាងកំពុងតែពង្រឹងខ្លាំងលើការងារសម្តែង និងមុខរបររកស៊ីជាមុនសិន។ យ៉ាងណា តារារូបនេះមិនបានហាមសិទ្ធិខ្លួនឯងនៅក្នុងការទទួលគូស្រករនោះឡើយ ពោលគឺអាស្រ័យលើពេលវេលា ប្រសិនបើពេលដល់គូពេលណា គឺយកពេលនោះ៕ (កែសម្រួលដោយ ៖ បុប្ផា)
ចែករំលែកព័តមាននេះ