រាជធានីភ្នំពេញ ៖ នៅត្រីមាសទី៤ នៃឆ្នាំ២០១៣ នេះ ការទិញលក់អាផាត់មែន និងការជួលឃើញថា មានភាពមិនច្បាស់លាស់នោះទេ ។ អាផាត់មែន ឬខន់ដូរ ដែលភាគច្រើនជាជនបរទេស ជាអ្នកទិញ ឬក៏ជួលនោះ ពេលនេះមានសកម្មភាពឡើងចុះ មិនដូចកាលពីដើមឆ្នាំ២០១៣នោះទេ ដែលអ្នកជំនាញបានឱ្យដឹងថា ឆ្នាំ២០១៣ នេះគឺជាឆ្នាំមួយដ៏ល្អប្រសើរសម្រាប់វិស័យអចលនទ្រព្យ តែនៅចុងឆ្នាំបែរជាមានសកម្មភាពមិននឹងនរ ឬមិនខ្លាំងដូចនៅដើមឆ្នាំ។
លោកគីម ហ៊ាង ប្រធានក្រុមហ៊ុនខ្មែរ រៀល អីុស្ទេត បានឱ្យដឹងថា ទាក់ទងនឹងសកម្មភាពទិញលក់ ជួលអាផាត់មែនចាប់តាំងពីដើមឆ្នាំមក គឺវាមានសកម្មភាពល្អទាំងតម្លៃ និងសកម្មភាព គឺចាប់ពីដើមឆ្នាំរហូតដល់អំឡុងខែ៩ តែនៅពេលចូលដល់ខែ១០និង១១ មក រហូតមកដល់ពេលនេះវាជាដំណាក់កាលមួយដែលគេហៅថា ចាយលុយសល់ គឺឃើញថា មិនសូវល្អ ដោយសារតែបញ្ហាបាតុកម្មនៅភ្នំពេញ មានច្រើនពេក វាធ្វើឱ្យអ្នកចង់ទិញ ចង់លក់ ចង់សាងសង់នៅរង់ចាំមើលគ្នា ។ មានន័យថា បើសិនជាគេចង់ទិញ គេត្រូវរង់ចាំមើលសិន គេមិនទាន់ទិញភ្លាមៗនោះទេ ហើយចំពោះអ្នកលក់វិញក៏ដូចនេះដែរ គេនៅចាំមើលសិន ព្រោះពេលនេះវាថោកពេកគេមិនព្រមលក់ ។
ចំពោះការសាងសង់អាផាត់មែននាពេលនេះ ក៏ហាក់ដូចជាសមិនមានសកម្មភាពសម្រុកខ្លាំងណាស់ណាទេ ចំពោះគំរោងដែលគេកំពុងសាងសង់ដូចជា សាងសង់បាន៥០% ឬ៦០% គេនឹងនៅតែបន្តសាងសង់ទៀត តែចំពោះគំរោងដែលគេថា នឹងចាប់ផ្តើមនៅចុងឆ្នាំ គេនឹងបង្អាក់ ឬផ្អាកសិន ដោយរង់ចាំដាច់ឆ្នាំសិន ឬចាំខែ១ ខែ២ ខែ៣ជាដើម ដោយរង់ចាំស្ថានភាពនយោបាយស្រុកទេសសិន ។
ចែករំលែកព័តមាននេះ