ខេត្តកំពង់ធំ ៖ ក្រុមប្រឹក្សាខេត្តកំពង់ធំត្រូវរួមគ្នាសម្រេចឲ្យបាននូវតួនាទីភារកិច្ចតាមគោលនយោបាយរបស់រាជរដ្ឋាភិបាល សំខាន់ត្រូវលើកកម្ពស់សាមគ្គីភាពផ្ទៃក្នុង ប្រសិទ្ធភាពការងារ គោរពឲ្យបានគោលការនានារបស់រដ្ឋ ហើយអ្វីជាសំខាន់ គឺត្រូវយកចិត្តទុកដាក់បំពេញការ ងារ ដើម្បីឆ្លើយតបតម្រូវការសំណូមពររបស់ប្រជាពលរដ្ឋ…
ខេត្តកំពង់ធំ ៖ ក្រុមប្រឹក្សាខេត្តកំពង់ធំត្រូវរួមគ្នាសម្រេចឲ្យបាននូវតួនាទីភារកិច្ចតាមគោលនយោបាយរបស់រាជរដ្ឋាភិបាល សំខាន់ត្រូវលើកកម្ពស់សាមគ្គីភាពផ្ទៃក្នុង ប្រសិទ្ធភាពការងារ គោរពឲ្យបានគោលការនានារបស់រដ្ឋ ហើយអ្វីជាសំខាន់ គឺត្រូវយកចិត្តទុកដាក់បំពេញការ ងារ ដើម្បីឆ្លើយតបតម្រូវការសំណូមពររបស់ប្រជាពលរដ្ឋ ។ ខាងលើនេះជាការណែនាំក្រើនរម្លឹករបស់លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងារថ្នាក់ជាតិចុះមូលដ្ឋានខេត្តកំពង់ធំ ។
នៅក្នុងពិធីប្រកាសចូលកាន់តំណែងក្រុម ប្រឹក្សាខេត្តកំពង់ធំ អាណត្តិទី៣ កាលពីថ្ងៃទី១៧ ខែមិថុនា ឆ្នាំ២០១៩នេះ នៅសាលាខេត្តកំពង់ធំ ។ លោក ថោង ខុន បានរម្លឹកឡើងវិញថា នៅក្នុងដំណើរការកសាងពង្រឹងពង្រីកលទ្ធិប្រជាធិបតេយ្យសេរីពហុបក្សឆ្លងតាមការបោះឆ្នោតទាំង១៥លើក កន្លងមកប្រជាជាតិ និងប្រជាជនកម្ពុជាបានពុះពារឆ្លងកាត់នូវវិញ្ញាសាថ្មីៗ និងការលំបាកស្មុគស្មាញនានាទាំងខាងនយោបាយ សេដ្ឋកិច្ច សង្គមរួមទាំងឥទ្ធិពលមួយចំនួនពីខាងក្រៅផង ។
ជាក់ស្តែងការបោះឆ្នោតជាតិលើកទី៦ កាលពីថ្ងៃទី២៩ ខែកក្កដា ឆ្នាំ២០១៨ កន្លងទៅនេះបានប្រព្រឹត្តទៅដោយសេរី ត្រឹមត្រូវ យុត្តិធម៌ តម្លាភាព មានសន្តិសុខ សណ្តាប់ធ្នាប់ល្អ គ្មានអំពើហិង្សា ស្របតាមលទ្ធិប្រជាធិបតេយ្យពិតប្រាកដ ហើយល្អជាងការបោះឆ្នោតមុនៗ ថែមទៀត ។ លោកបន្តថា នៅថ្ងៃបោះឆ្នោតប្រជាជនដែលជាម្ចាស់ឆ្នោតរហូតដល់ជាង៨៣% នៃចំនួន ប្រជាជនដែលមានឈ្មោះក្នុងបញ្ជីបោះឆ្នោតបានចេញទៅបោះឆ្នោត ដើម្បីសម្រេចអំពីជោគ វាសនាអនាគតរបស់ប្រទេសជាតិ និងរបស់ខ្លួន ។
ហេតុនេះជោគជ័យនៃការបោះឆ្នោតជាតិលើកទី៦ កន្លងទៅនេះ គឺជាជោគជ័យរួមរបស់ប្រជាជាតិ និងប្រជាជនកម្ពុជាយើង ។ ដោយឡែកចំពោះការបោះឆ្នោតជ្រើសរើសក្រុមប្រឹក្សារាជធានីខេត្តក្រុងស្រុកខណ្ឌអាណត្តិទី៣ កាលពី ថ្ងៃទី២៦ ខែឧសភា ឆ្នាំ២០១៩ កន្លងមកក៏ត្រូវបានវាយតម្លៃថា មានលក្ខណៈសេរី ត្រឹមត្រូវ យុត្តិធម៌ និងគ្មានអំពើហិង្សា ហើយលទ្ធផលនៃការបោះឆ្នោតក៏ត្រូវបានទទួលស្គាល់ពីគណបក្សនយោបាយនានាដែលបានចូលរួមក្នុងការ បោះឆ្នោតនេះផងដែរ ។
លោកថោង ខុន បានឲ្យដឹងទៀតថា ដោយផ្អែកតាមលទ្ធផលផ្លូវការរបស់ គ.ជ.ប គឺចំនួន ក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៣ សរុបមានចំនួន៤១១៤រូប ក្នុងនោះក្រុមប្រឹក្សារាជធានីខេត្ត មានចំនួន៥៥៩រូប និងក្រុមប្រឹក្សា ក្រុង ស្រុក ខណ្ឌ មានចំនួន ៣៥៥៥រូប ។ ដោយឡែកសម្រាប់រដ្ឋបាលខេត្តកំពង់ធំមានចំនួនក្រុមប្រឹក្សាចំនួន២៥រូបដែលត្រូវប្រកាសឱ្យចូលកាន់មុខតំណែងនាថ្ងៃនេះ ។ លោកថោង ខុន ក្នុងនាមប្រធានក្រុមការងារថ្នាក់ជាតិចុះមូលដ្ឋានខេត្តកំពង់ធំបានធ្វើការណែនាំក្រើនរម្លឹកដល់ក្រុមប្រឹក្សាខេត្តទាំងអស់ត្រូវបន្តលើកកម្ពស់ទំនាក់ទំនង និងគណនេយ្យភាពរវាងក្រុមប្រឹក្សា និងគណៈអភិបាល និង រវាងរដ្ឋបាលថ្នាក់ក្រោមជាតិជាមួយប្រជាពលរដ្ឋសំដៅប្រែក្លាយរដ្ឋបាលថ្នាក់ក្រោមជាតិជាស្ថាប័នអភិបាលកិច្ចដែលមានសមត្ថភាពគ្រប់គ្រាន់ក្នុងការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងសង្គមនៅក្នុងមូលដ្ឋានរបស់ខ្លួន ៕
ចែករំលែកព័តមាននេះ