ខេត្តព្រះសីហនុ ៖ ការដ្ឋានសំណង់ដែលយកផ្លូវសាធារណជាកន្លែងដាក់សម្ភារសំណង់របស់ខ្លួនត្រូវបានអាជ្ញាធរប្រើធម៌ក្ដៅហើយ ក្នុងការហាមមួយដងជាពីរដងទៅហើយ តែមិនស្ដាប់ហើយមិនយកចិត្តទុកដាក់រាល់សកម្មភាពអាជ្ញាធរចុះណែនាំ និងពន្យល់ប្រាប់ទើបអាជ្ញាធរសម្រេចចិត្តឈូសឆាយសម្ភារសំណង់ដែលនៅលើតាមដងផ្លូវសាធារណឲ្យចូលទៅក្នុងការដ្ឋានសំណង់របស់ខ្លួន ហើយនឹងធ្វើការផ្អាកការដ្ឋានជាបណ្ដោះ អាសន្ន ដើម្បីឲ្យម្ចាស់ការដ្ឋានរៀបចំជុំវិញការដ្ឋានរបស់ខ្លួន និងហ៊ុមព័ទ្ធការដ្ឋានតាមច្បាប់បច្ចេកទេសសាងសង់សំណង់ ។
ក្នុងចុះអន្តរាគមន៍ពីមន្ត្រីសាលាខេត្តព្រះសីហនុដឹកនាំដោយលោក លី វ៉ាន់ដា រួមជាមួយលោក លី ចិត្តនិយម និងលោកជួប សីហា ជាមន្ត្រីសាលាក្រុងព្រះសីហនុថែមទាំងមានមន្ត្រីចម្រុះជាច្រើនរូបបានធ្វើការរុះរើសម្ភារសំណង់ដែលយកផ្លូវសាធារណជាកន្លែងរបស់ខ្លួននៅព្រឹកថ្ងៃទី១៧ ខែមិថុនា ឆ្នាំ២០១៩ ការដ្ឋានសំណង់ដែលយកសម្ភារដាក់លើផ្លូវសាធារណដែលនៅតាមបណ្តោយផ្លូវ (ប៉ូលូវ៉ៃ) ស្ថិតនៅក្នុងក្រុមទី១៧ ភូមិ៤ សង្កាត់លេខ៤ ក្រុង-ខេត្តព្រះសីហនុ ។
ប្រភពពីមន្ត្រីសាលាខេត្តព្រះសីហនុបានបង្ហើបប្រាប់អ្នកសារព័ត៌មានថា ការដ្ឋានសំណង់ដែលយកសម្ភារសំណង់របស់ខ្លួនដាក់លើផ្លូវសាធារណ បិទផ្លូវប្រជាពលរដ្ឋក្នុងការធ្វើដំណើរ បណ្ដាលអោយមានការកកស្ទះចរាចរណ៍ថែមទាំងធ្វើឲ្យបងប្អូនប្រជាពលរដ្ឋធ្វើការឆ្លងកាត់ពិបាកក្នុងការធ្វើដំណើរដោយហេតុដូចនេះឯកឧត្តម យន្ត មីន អភិបាលនៃគណៈអភិបាល ខេត្តព្រះសីហនុបានបញ្ជាឲ្យមន្ត្រីសាលាខេត្តព្រះសីហនុចុះអន្តរាគមន៍ហាមឃាត់ និងឲ្យផ្អាកដំណើរការ ។
ដូចនេះ ដើម្បីជាការព្រមានពីមន្ត្រីសាលាខេត្តព្រះសីហនុសម្រេចធ្វើកំណត់ហេតុ និងផ្អាកការដ្ឋានជាបណ្តោះអាសន្នរង់ចាំក្រុមហ៊ុនសាងសង់រៀបចំសម្ភារសំណង់របស់ខ្លួនចេញពីលើផ្លូវដោយយកសម្ភារសំណង់ចេញនឹងត្រូវហ៊ុមព័ន្ធការដ្ឋានសំណង់របស់ខ្លួនទៅតាមបច្ចេកទេសសាងសង់អោយរួចរាល់ជាមុនសិនទើបអនុញ្ញាត្តិអោយបន្តការសាងសង់ទៀត ។
ជុំវិញចំណាត់ការយ៉ាងក្តៅគគុកពីមន្ត្រីសាលាខេត្តព្រះសីហនុផងដែរបងប្អូនប្រជាពលរដ្ឋបានសម្តែងការអបអរសាទរយ៉ាងខ្លាំង និងកោតសរសើរថែមទាំងបានស្នើរអោយអាជ្ញាធរមូលដ្ឋាន ជាពិសេសមន្ត្រីពាក់ព័ន្ធ រឹតបន្តឹងបន្ថែមទៀតទៅលើក្រុមហ៊ុនសាងសង់ជាច្រើនទៀតដែលគិតតែប្រយោជន៍ផ្ទាល់ខ្លួនផ្ទុកសម្ភារសំណង់ផ្សេងៗនៅលើផ្លូវសាធារណបង្កផលប៉ះពាល់យ៉ាងធ្ងន់ធ្ងរដល់សណ្តាប់ធ្នាប់សាធារណបង្កភាពស្មុគស្មាញដល់អាជ្ញាធរដែនដីក៏ដូចជា បងប្អូនប្រជាពលរដ្ឋដែលធ្វើដំណើរតាមដងផ្លូវក្នុងខេត្តព្រះសីហនុ ៕ កែសម្រួលដោយ ៖ សុឃាក់
ចែករំលែកព័តមាននេះ