ប្រទេសជប៉ុន៖ រដ្ឋមន្ត្រីបរិស្ថាននិងថាមពលមកពីប្រទេសសេដ្ឋកិច្ចធំៗទាំង ២០ ឬហៅកាត់ថា G20 បានជួបគ្នានៅ Nagano នៃប្រទេសជប៉ុនដើម្បីស្វែងរកវិធីថ្មីៗក្នុងការដោះស្រាយបញ្ហាបម្រែម្រួលបរិយាកាស និងកាកសំណល់ប្លាស្ទិច។ ប៉ុន្តែការវាយប្រហារនាវាដឹកប្រេងពីរកាលពីថ្ងព្រហស្បត្តិ៍កន្លងមកក៏បានបង្កឲ្យមានការព្រួយបារម្ភពីសន្តិសុខនៃវិស័យថាមពលដែរ។ នេះបើយោងតាមភ្នាក់ងារសារពត៌មាន Japan Times បានឲ្យដឹងកាលពីថ្ងៃសៅរ៍ ទី១៥ ខែមិថុនាកន្លងមកនេះ ។
លោក Hiroshige Seko ដែលជារដ្ឋមន្ត្រីសេដ្ឋកិច្ចពាណិជ្ជកម្មនិងឧស្សាហកម្មជប៉ុនបាននិយាយកាលពីរសៀលថ្ងៃសៅរ៍ថា «ប្រទេសជប៉ុនកំពុងតែយកចិត្តទុកដាក់លើស្ថានការនេះដោយព្រួយបារម្ភ។ វាពិតជាសំខាន់ណាស់សម្រាប់សហគមន៍អន្តរជាតិក្នុងការសហការឆ្លើយតបទៅនឹងព្រឹត្តិការណ៍បែបនេះដើម្បីធានាដល់សន្តិសុខថាមពលពិភពលោក»។ ដើម្បីសម្រេចគោលដៅដែលមានចែងក្នុងកិច្ចព្រមព្រៀងទីក្រុងប៉ារីសឆ្នាំ ២០១៥ ដែលចែងពីគោលដៅក្នុងការដាក់កម្រិតលើកំណើនកម្តៅពិភពលោក ប្រទេសត្រូវតែបង្កើតបច្ចេកវិទ្យាថ្មីៗ។
លោក Seko បានរៀបរាប់កាលពីព្រឹកថ្ងៃសៅរ៍នេះអំពីយុទ្ធសាស្ត្ររយៈពេលវែងរបស់ប្រទេសជប៉ុនក្នុងការកាត់បន្ថយការបញ្ចេញឧស្ម័នកាបូនិចប្រមាណ ៨០%ក្នុងឆ្នាំ ២០៥០ និងចូលរួមក្នុងការសម្រេចគោលដៅដែលចែងក្នុងកិច្ចព្រមព្រៀង។ ដើម្បីសម្រេចគោលដៅនេះ ជប៉ុនកំពុងតែលើកស្ទួយឲ្យមានការប្រើប្រាស់ថាមពលអ៊ីដ្រូសែន និងស្រូបឧស្ម័នកាបូនិច ព្រមទាំងប្រើបច្ចេកវិទ្យាថ្មីៗផងដែរ។
សម្ពាធលើកិច្ចប្រជុំ G20 ឲ្យបញ្ឈប់ការប្រើប្រាស់ធ្យូងថ្មកំពុងតែមានកាន់តែខ្លាំងឡើង ហើយកំពុងតែបង្កផលប៉ះពាល់ដល់ការវិនិយោគលើបច្ចកវិទ្យាថ្មីៗដើម្បីស្រូបឧស្ម័នកាបូនិច។ ប៉ុន្តែការព្រមានក្នុងពេលថ្មីៗដោយសហគមន៍អ្នកវិទ្យាសាស្ត្របានបង្ហាញថា ប្រទេសជុំវិញពិភពលោកត្រូវតែបង្កើនសកម្មភាពកាត់បន្ថយការបញ្ចេញឧស្ម័នកាបូនិច។
កាកសំណល់ប្លាស្ទិច ជាពិសេសក្នុងសមុទ្រក៏ជាបញ្ហាដ៏ធំមួយទៀតត្រូវបានលើកឡើងនៅកិច្ចប្រជុំខាងលើដែរ។ កម្មវិធីបរិស្ថានអង្គការសហប្រជាជាតិព្យាករណ៍ថាពិភពលោកមានកាកសំណល់ប្លាស្ទិចប្រមាណ ៣០០លានតោនក្នុងមួយឆ្នាំ ដោយមាន ៨លានតោនត្រូវបានចាក់ចូលសមុទ្រ ប៉ុន្តែសមាជិក G20 ប្រៀបដូចជានៅខ្វែងគំនិតគ្នាទាក់ទិននឹងដំណោះស្រាយបញ្ហានេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ