រាជធានីភ្នំពេញ ៖ ទីបំផុតរដ្ឋសភាបានអនុម័តជាឯកច្ឆន្ទ លើសេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងជាឯកច្ឆន្ទហើយ ដោយសម្លេង១០៨ លើ១០៨ នៃចំនួន សមាជិកសភាចូលប្រជុំទាំងអស់ ។…
រាជធានីភ្នំពេញ ៖ ទីបំផុតរដ្ឋសភាបានអនុម័តជាឯកច្ឆន្ទ លើសេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងជាឯកច្ឆន្ទហើយ ដោយសម្លេង១០៨ លើ១០៨ នៃចំនួន សមាជិកសភាចូលប្រជុំទាំងអស់ ។ ការអនុម័តសេចក្តីព្រាងច្បាប់ដែលមានចំនួន៩ជំពូក និង៧២មាត្រាត្រូវបានធ្វើឡើងសម័យប្រជុំពេញអង្គលើកទី២ នីតិកាលទី៦ នៃរដ្ឋសភា ក្រោយមអធិបតីភាពសម្តេច ហេង សំរិន ប្រធានរដ្ឋសភា នាព្រឹកថ្ងៃទី១៧ ខែមិថុនា ឆ្នាំ២០១៩ ។ សេចក្តីព្រាងច្បាប់នេះដែរ ត្រូវអង្គប្រជុំសភាយកមកពិភាក្សា និងអនុម័តមួយចំនួនដោយជំពូក ម្តងៗ ។
លោកស៊ុយ សែម រដ្ឋមន្ត្រីក្រសួងរ៉ែ និងថាមពលបានលើកក្នុងអង្គប្រជុំថា សេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាត ព្រះរាជាណាចក្រកម្ពុជាបានចាប់ផ្តើមធ្វើសកម្មភាពសិក្សាស្រាវជ្រាវ និងការស្វែងរុករកធនធានប្រេងកាតដំបូងតាំងតែពីអំឡុងទសវត្សរ៍ទី៦០ នៃសតវត្សរ៍ទី២០ ដោយក្រុមអ្នកភូគព្ភសាស្ត្រចិន និងប៉ូឡូញ ដោយបានចងក្រងនូវឯកសារ និងផែនទីភូគព្ភសាស្ត្រជាមូលដ្ឋាន ។ លោកបន្តថា ក្នុងអំឡុងទសវត្សរ៍ទី៧០ ក្រុមហ៊ុនអ៊ែល និងអេសូ បានធ្វើការខួងអណ្តូងស្វែងរុករកចំនួន៣ នៅដែនសមុទ្រកម្ពុជា ប៉ុន្តែសកម្មភាពនេះត្រូវបានផ្លាស់ដោយសារតែសង្គ្រាម ។
រហូតដល់ឆ្នាំ១៩៨៧ ការសិក្សាស្រាវជ្រាវបានចាប់ផ្តើមឡើងវិញក្រោមកិច្ចសហប្រតិបត្តិការជាមួយនឹងអ្នកជំនាញប្រេងកាត អតីតសហភាពរុស្សី ហើយបានគូសផែនទីប្រេងកាតមួយដោយបែងចែកជាប្លុកស្វែងរុករកទូទាំងប្រទេសកម្ពុជា ។ ចាប់តាំងពីដើមទសវត្សរ៍ទី៩០សកម្មភាពស្វែងរុករកធនធានប្រេងកាតត្រូវបានធ្វើឡើងជាបន្តបន្ទាប់ ដោយក្រុមហ៊ុនអន្តរជាតិនានា ដែលក្នុងនោះក្រុមហ៊ុន ឈហ្វរ៉ុន បានប្រកាសរកឃើញធនធានប្រេងកាត មានលក្ខណៈពាណិជ្ជកម្មនៅក្នុងបូកអេដែនសមុទ្រកម្ពុជា នៅឆ្នាំ២០១០ ហើយបច្ចុប្បន្នប្រេងកាតនេះ គ្រប់គ្រងនឹងឈានដល់ការធ្វើផលិតកម្មដោយក្រុមហ៊ុន គ្រីសអេនើជី នាពេលឆាប់ៗខាងមុខនេះ ។
ទន្ទឹមនឹងសកម្មភាពផ្នែកអាប់ស្ទីមខាងលើនេះ សកម្មភាពផ្នែកដោនស្ទីមក៏បានចាប់ផ្តើមពីឆ្នាំ ១៩៦៩ ដែលជាឆ្នាំដាក់ឱ្យដំណើរការរោងចក្រចម្រាញ់ប្រេងកាតទី១ ក្នុងតំបន់ ប៉ុន្តែរោងចក្រនេះត្រូវបានបំផ្លាញដោយសង្គ្រាម៣ឆ្នាំក្រោយមក ។ នៅឆ្នាំ២០០៣ ក្រុមហ៊ុន តូយូ អ៊ុនជីនញារីង ធ្វើការសិក្សាសមិទ្ធិលទ្ធភាពរោងចក្រចម្រាញ់ប្រេងកាតសារជាថ្មី ។ នៅឆ្នាំ ២០១២រាជរដ្ឋាភិបាលបានចុះកិច្ចព្រមព្រៀងអាជ្ញាធរបណ្ណរោងចក្រចម្រាញ់ប្រេងកាត ដែលមានសមត្ថភាពផលិត៥លានតោនក្នុង១ឆ្នាំដល់ក្រុមហ៊ុនខេមបូឌាន ភេត្រខេមីខលខូអិលធីឌី ។
រហូតដល់បច្ចុប្បន្ននេះ ការផ្គត់ផ្គង់ផលិតផលប្រេងកាតបម្រើឱ្យសេចក្តីត្រូវការរបស់ប្រទេស ត្រូវបានធ្វើឡើងដោយក្រុមហ៊ុនជាតិ និងអន្តរជាតិនានាដោយពឹងផ្អែកលើការនាំចូលទាំង ស្រុងពីប្រទេសជិតខាង ។ ដោយយោងលើភាពចាំបាច់ ដើម្បីទាក់ទាញអ្នកវិនិយោគឱ្យចូលមកវិនិយោគលើធនធានប្រេងកាត និងដើម្បីរៀបចំការគ្រប់គ្រង និងអភិវឌ្ឍធនធានប្រេងកាតឱ្យមានប្រសិទ្ធភាព និងស្របតាមបទដ្ឋានអន្តរជាតិអតីតរដ្ឋកម្ពុជាបានអនុម័តបទប្បញ្ញត្តិប្រេងកាត ដែលជាមូលដ្ឋានគ្រឹះក្នុងការបើកផ្លូវឱ្យអ្នកវិនិយោគទុនចូលរួមធ្វើការដេញថ្ងៃជាលក្ខណៈអន្តរជាតិលើកទី១ នៅឆ្នាំ១៩៩១ ។
អាស្រ័យដោយបទប្បញ្ញត្តិប្រេងកាតឆ្នាំ១៩៩១ ពុំអាចឆ្លើយតបទៅនឹងការវិវត្តនៃវិស័យប្រេងកាលី ក្នុងបរិបទនៃការអភិវឌ្ឍសេដ្ឋកិច្ច សង្គម និងបរិស្ថានរបស់ព្រះរាជាណាចក្រកម្ពុជានាពេលបច្ចុប្បន្ន ហេតុដូច្នេះហើយទើបរាជរដ្ឋាភិបាលបានរៀបចំតាក់តែងឡើងវិញ នូវសេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាត ដើម្បីគ្រប់គ្រង និងអភិវឌ្ឍ ធនធានប្រេងកាតឱ្យមានប្រសិទ្ធភាព តម្លាភាព និងគណនេយ្យភាព ទាក់ទាញ និងផ្តល់ទំនុក ចិត្តដល់អ្នកវិនិយោគទុន និងដើម្បីជំរុញការអភិវឌ្ឍវិស័យប្រេងកាតប្រកបដោយនិរន្តរភាព និងប្រសិទ្ធភាពក្នុងការរួមចំណែក អភិវឌ្ឍសេដ្ឋកិច្ច សង្គម និងផលប្រយោជន៍យូរអង្វែងរបស់ប្រទេសជាតិ ។
សេចក្តីព្រាងច្បាប់នេះត្រូវបានតាក់តែងឡើងជាលើកដំបូងដោយក្រសួងឧស្សាហកម្ម រ៉ែ និងថាមពល ដែលជាសេនាធិការរបស់រាជរដ្ឋាភិបាលដោយមានការជួយឧបត្ថម្ភពីអ្នកជំនាញការច្បាប់នៃធនាគារអភិវឌ្ឍន៍ អាស៊ីក្នុងឆ្នាំ១៩៩៦)និងមានការពិនិត្យបន្ថែមទៀតពីអ្នកជំនាញការច្បាប់មកពីក្រុមហ៊ុនជប៉ុន អាយដឹមម៉ុត ស៊ូអ៊ុយអ៊ែនហ្គាស ។ ចាប់តាំងពីឆ្នាំ២០០៦ អតីតអាជ្ញាធរប្រេងកាតជាតិកម្ពុជាបានយកសេចក្តីព្រាងច្បាប់នេះមកកែសម្រួលឡើងវិញ ដោយមានការពិគ្រោះយោបល់ជាមួយអ្នកជំនាញបច្ចេកទេស និងអ្នកជំនាញផ្នែកច្បាប់ជាតិ និងអន្តរជាតិនានា ។
ក្រោយពីអតីតអាជ្ញាធរប្រេងកាត់ជាតិកម្ពុជា ត្រូវបានធ្វើសមាហរណកម្មមកក្រោមក្រសួងរ៉ែនិងថាមពលក្នុងឆ្នាំ២០១៣ សេចក្តីព្រាងច្បាប់នេះត្រូវបានកែសម្រួលបន្ថែមដោយបញ្ចូលបរិបទថ្មីៗ មួយចំនួនផ្អែកលើបទពិសោធន៍នៃបណ្តាប្រទេសផ្សេងៗដូចជា ប្រទេសន័រវេស អូស្ត្រាលី ជប៉ុន ឥណ្ឌូណេស៊ី ថៃ វៀតណាម ទីម័រខាងកើត ម៉ាឡេស៊ី និងប្រិយណេ ជាដើម ។ សេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាតត្រូវបានគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គគណៈរដ្ឋមន្ត្រី នាថ្ងៃទី៥ ខែមេសា ឆ្នាំ២០១៩ ដើម្បីបញ្ជូនទៅសុំ ការពិនិស្សនិងអនុម័តពីស្ថាប័នដ៏តិប្បញ្ញត្តិរួមមាន៩ជំពូក និង៧២មាត្រាដែលមានខ្លឹមសារសង្ខេបសំខាន់ៗផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ