លោក សម រង្ស៊ី មានយុទ្ធសាស្ត្រវ៉ៃលុកឬដកថយ?
- ភ្នំពេញ
ទន្ទឹមនឹងការវាយប្រហារពាក្យសម្តីខ្លាំងៗមកលើសម្តេចតេជោ ហ៊ុន សែន និងរដ្ឋាភិបាលនោះ លោកសមរង្ស៊ី លោក អេងឆៃអាង និងលោកស្រីមួរ សុខហួរ បានប្រកាសថា…
ទន្ទឹមនឹងការវាយប្រហារពាក្យសម្តីខ្លាំងៗមកលើសម្តេចតេជោ ហ៊ុន សែន និងរដ្ឋាភិបាលនោះ លោកសមរង្ស៊ី លោក អេងឆៃអាង និងលោកស្រីមួរ សុខហួរ បានប្រកាសថា…
ទន្ទឹមនឹងការវាយប្រហារពាក្យសម្តីខ្លាំងៗមកលើសម្តេចតេជោ ហ៊ុន សែន និងរដ្ឋាភិបាលនោះ លោកសម
រង្ស៊ី លោក អេងឆៃអាង និងលោកស្រីមួរ សុខហួរ បានប្រកាសថា លោកសម រង្សុី នឹងវិលត្រឡប់មកកាន់ ប្រទេសកម្ពុជាវិញ នៅក្នុងខែកញ្ញាខាងមុខនេះ ។
តើហេតុអ្វីបានលោក សម រង្ស៊ី បង្កើនការវាយលុកកាន់តែសាហាវ ប្រឆាំងសម្តេចតេជោ? តើការវាយ ប្រហារខាងពាក្យសម្តីនោះ មានជាប់ទាក់ទងនឹងផែនការវិលត្រឡប់របស់សម រង្ស៊ី មកកាន់ប្រទេសកម្ពុជា? តើសកម្មភាពទាំងនោះ អាចមានយុទ្ឋសាស្ត្រអ្វីផ្សេងទៀត បង្កប់ពីខាងក្រោយដែរឬទេ?
លោក សម រង្ស៊ី និងមេដឹកនាំ នយោបាយប្រឆាំងទាំងនេះ កាន់តែប្រកាសច្បាស់លាស់ អំពីការវិលត្រឡប់ របស់លោក សម រង្ស៊ី ដែលជាមេដឹកនាំប្រឆាំង ដែលល្បីខាងនិយាយមិនសំចៃសម្តី ។
ការប្រកាសកាន់តែច្បាស់លាស់នៃការវិលត្រឡប់របស់លោក សម រង្ស៊ី បានកើតមានទន្ទឹម ពេលដែល លោក សម រង្ស៊ី បានវាយលុកកាន់តែខ្លាំង ខាងពាក្យសម្តីប្រឆាំងសម្តេចតេជោហ៊ុន សែន និងរដ្ឋាភិបាល កម្ពុជា ។
ហេតុផលមួយចំនួន ត្រូវបានគេមើលឃើញពីការវាយប្រហាររបស់ លោក សម រង្ស៊ី មួយរយៈពេលចុង ក្រោយនេះ ។ ទីមួយ លោកមានបំណងទាក់ទាញការគាំទ្រ សម្រាប់ផែនការវិលត្រឡប់របស់លោក និងជីវិតនយោបាយវែងឆ្ងាយរបស់លោក ។ ទីពីរលោកមានចេតនាបំបែកបំបាក់ផ្ទៃក្នុងគណបក្សប្រជាជនកម្ពុជា ។
នៅពេលថ្មីៗនេះ លោកបានធ្វើការវាយប្រហារពាក្យសម្តីដ៏ខ្លាំងហួសហេតុដោយ ចោទប្រកាន់ដល់សម្តេច ស ខេង និង លោក ឌី វិជ្ជា ដែលជាកូនប្រុសរបស់ លោក ហុង ឡងឌី ថា មិនសប្បាយចិត្ត នឹងសម្តេច ហ៊ុន សែន ហើយអ្នកទាំងពីរកំពុងរកវិធីវាយបកប្រឆាំងនឹងសម្តេចតេជោហ៊ុន សែន ។ លោកក៏បានព្យាយាមដុតកំហឹងនៅក្នុងកងទ័ព ដើម្បីអោយងើបឡើងបះបោរប្រឆាំងនឹងសម្តេចតេជោហ៊ុន សែន ផងដែរ ។
លោកព្យាយាមដុតកំហឹង សម្តេចស ខេង ដោយបាននិយាយថា សម្តេចហ៊ុន សែន ព្យាយាមរកវិធីដកលោកចេញពីតំណែង ខណៈដែលលោកដុតកំហឹង លោក ឌី វិជ្ជា ដោយចោទប្រកាន់ដល់សម្តេចតេជោ ហ៊ុន សែន ថា បានជាប់ទាក់ទងនឹងការស្លាប់របស់ឪពុករបស់លោក ឌី វិជ្ជា គឺលោក ហុង ឡងឌី ដោយ សារតែឧទ្ធម្ភាគចក្ររបស់លោកបានផ្ទុះធ្លាក់ កាលពីថ្ងៃទី៩ វិច្ឆិកា ឆ្នាំ២០០៨ ដែលជាថ្ងៃបុណ្យឯករាជ្យជាតិ របស់កម្ពុជា។
ការចោទប្រកាន់ទាំងនោះ បាននាំអោយសម្តេចតេជោ ហ៊ុនសែន សម្តេចស ខេង និង លោក ឌី វិជ្ជា ឈាន ដល់ការសម្រេចចិត្តប្តឹងលោកសម រង្ស៊ី ។
ដូច្នេះ វាបានធ្វើអោយរូបលោក ជំពាក់ជំពិនកាន់តែធ្ងន់ធ្ងរទៅៗលើផ្លូវច្បាប់ ដែលលោកបានប្រឈមមុខ នឹងបណ្តឹងជាច្រើនរាប់មិនអស់ស្រាប់ទៅហើយ ។
ប៉ុន្តែការដែលលោកនៅក្រៅប្រទេសស្រាប់ លោកហាក់ដូចជាមិនខ្វល់អ្វីឡើយនឹងការប្តឹងទាំងនោះ និងទោសដែលលោកកំពុងតែប្រឈមមុខ ។ គ្រាន់តែកាលពីខែឧសភា កន្លងទៅ លោក សម រង្ស៊ី ត្រូវបាន តុលាការក្រុងភ្នំពេញរកឃើញថា មានកំហុសនៅក្នុងបណ្តឹងពីររួចទៅហើយ ដោយមួយទាក់ទងនឹងការអុជអាលកងទ័ព និងមួយទៀតទាក់ទងនឹងការប្រមាថព្រះមហាក្សត្រ ដែលត្រូវបានរដ្ឋធម្មនុញ្ញចែងថាមិនអាចរំលោភបំពានបាន។ ក្នុងករណីនីមួយៗនៃបណ្តឹងទាំងពីរ លោក សម រង្ស៊ីត្រូវផ្តន្ទាទោស អោយជាប់
ពន្ធនាគាររយៈពេលបួនឆ្នាំ ។
ចំណែកាលពីឆ្នាំមុន តុលាការក៏បានរកឃើញថា លោក សម រង្ស៊ីមានកំហុសដោយបាន ចោទប្រកាន់ សម្តេច ហ៊ុន សែន ថាបានអោយលុយ នាង ធី សុវណ្ណថា ដែលជាតារាហ្វេសប៊ុកមួយរូប ដើម្បីអោយងាក មកគាំទ្រគណបក្សប្រជាជនកម្ពុជា ហើយតុលាការបានតម្រូវអោយលោកសងជំងឺចិត្តសម្តេចតេជោ ហ៊ុន សែនមួយលានដុល្លារ ។ តុលាការក៏បានផ្តន្ទាទោស លោកសម រង្ស៊ី ថា បាន បរិហាកេរ្តិ៍សម្តេច ហេង សំរិន ផងដែរ ហើយតម្រូវអោយលោកសងជំងឺចិត្តសម្តេចហេង សំរិន ចំនួន៣៧៥០០ដុល្លារផងដែរ ។
លោក សម រង្ស៊ីបានធ្វើអោយខ្លួនគាត់រុំព័ទ្ធដោយបណ្តឹងផ្នែកច្បាប់ និងការផ្តន្ទាទោស ដោយតុលាការ។ ប៉ុន្តែលោកមិនមានការភ័យព្រួយឡើយ ដោយសារតែលោកនៅក្រៅប្រទេសស្រាប់ ។ លោកមិនខ្វល់ឡើយ ពីព្រោះកម្ពុជាមិនអាចចាប់លោក យកមកដាក់គុកតាមការផ្តន្ទាទោសបានទេ ខណៈដែលលោកស្នាក់នៅប្រទេសបារាំង ។
ផ្ទុយទៅវិញ លោកអាចធ្វើអោយសម្លេងរបស់លោកនៅតែលាន់លឺក្នុងត្រចៀកអ្នកគាំទ្ររបស់លោក។ ដូច្នេះ លោកមិនបានខាតពីការរិះគន់មិនសំចៃប្រឆាំងសម្តេចតេជោ គណបក្សកាន់អំណាច គឺ គណបក្ស ប្រជាជនកម្ពុជា និងរដ្ឋាភិបាលកម្ពុជាទេ ។
ប៉ុន្តែបណ្តឹងកាន់តែច្រើន កាន់តែផ្តល់ហេតុផលដល់លោកកាន់តែរឹងមាំ សម្រាប់ការមិនវិលត្រឡប់មកកាន់ប្រទេសកម្ពុជាវិញ ។ សម្រាប់អ្នកខ្លះ ដែលមិនគាំទ្រលោកនោះ ការបង្កើនការវាយប្រហាររបស់លោក សម រង្ស៊ី ជាយុទ្ធសាស្ត្រដកថយជាជាងយុទ្ធសាស្ត្រវាយលុក ។ ការមានទោសកាន់តែធ្ងន់វាកាន់តែផ្តល់ ហេតុផលថា លោកមិនគួរវិលត្រឡប់មកកម្ពុជាវិញ ដើម្បីជាប់ពន្ធនាគារឡើយ ។
តាមពិតទៅ ប្រវត្តិនយោបាយជិតបីទស្សវត្សរ៍មកនេះ មិនមានពេលណាមួយដែលលោក សម រង្ស៊ី ហ៊ាន ប្រថុយវិលត្រឡប់ចូលប្រទេសវិញ ដោយគ្មានការលើកលែងទោស ដោយព្រះមហាក្សត្រទេ ។
ប៉ុន្តែអ្នកនយោបាយប្រឆាំង ដែលកំពុងតែនីរទេសខ្លួននៅក្រៅប្រទេស នៅតែប្រកាសការអះអាងថា លោកសម រង្ស៊ី នឹងវិលត្រឡប់ចូលកម្ពុជាវិញ នៅខែកញ្ញាខាងមុខនេះ ហើយគេចាត់ទុកឆ្នាំ២០១៩ ជាឆ្នាំល្អ សម្រាប់ផែនការនេះ ។ ដូច្នេះ សម្រាប់អ្នកគាំទ្រ លោក សម រង្ស៊ី វិញ សកម្មភាពវាយប្រហាររបស់លោកស្ថិត នៅលើផ្លូវនយោបាយមួយ ដើម្បីទាក់ទាញការគាំទ្រទាំងក្នុងនិងក្រៅប្រទេស ដើម្បីធ្វើយ៉ាង ណាអោយការវិលត្រឡប់របស់លោកទទួលបានជោគជ័យ។
ពេលវេលានឹងបញ្ជាក់ថា ការវាយប្រហារពាក្យសម្តីគ្រប់យ៉ាងរបស់លោកសម រង្ស៊ី ជាផែនការសម្រុកចូលឬក៏ជាការដកថយប្រកដោយយុទ្ធសាស្ត្រ ៕
ចែករំលែកព័តមាននេះ