រាជធានីភ្នំពេញ៖ បន្ទាប់ពីបាត់មុខពីពិភពសិល្បៈជាច្រើនឆ្នាំ អតីតតារាកំប្លែងជួន ច័ន្ទរតនា ហៅនាងក្អយ បានធ្វើឲ្យមហាជនភ្ញាក់ផ្អើល នៅពេលនាងរៀបចំមង្គលការប្អូនថ្លៃ ដោយមានការចូលរួមពីអ្នកសិល្បៈជាច្រើននាក់ ។ មង្គលការនេះរៀបចំឡើងកាលពីថ្ងៃទី១០ ខែមិថុនា ២០១៩ ។
អ្នកនាងខាត់ សុឃីម ដែលត្រូវបានអញ្ជើញចូលរួមក្នុងពិធីមង្គលការនោះឲ្យដឹងថា ពិធីមង្គលការប្អូនអ្នកនាងក្អយបានរៀបចំយ៉ាងអធិកអធមណាស់។ អ្នកនាងបញ្ជាក់ «តាមការសង្កេតនៅក្នុងពិធីនោះគឺមានអ្នកសិល្បៈជាច្រើនបានចូលរួម បើទោះបីជាពេលនេះអ្នកនាងក្អយបានឃ្លាតឆ្ងាយពីសិល្បៈក៏ដោយ» ។
អ្នកនាងខាត់ សុឃីម លើកឡើងថា នៅក្នុងពេលដែលចូលរួមនៅក្នុងពិធីមង្គលការនោះ នាងមិនបានសួរនាំអ្វីច្រើនពាក់ព័ន្ធទៅនឹងនាងក្អយឡើយ តែគ្រាន់តែដឹងថា អតីតតារាកំប្លែងរូបនេះហាក់មានភាពហ៊ឺហាជាងមុន ខណៈពេលដែលអតីតតារារូបនេះបានមានស្វាមី និងកូន២នាក់ហើយដែរ ។ បើតាមអ្នកនាងខាត់ សុឃីម អ្នកនាងក្អយ ទំនងជាមិនមានបំណងវិលចូលប្រឡូកសិល្បៈវិញឡើយ ព្រោះពេលនេះនាងហាក់មានជីវភាពមួយសមរម្យ និងមានស្វាមី និងកូនរួចហើយដែរ ។
អ្នកនាង ជួន ចាន់រតនា ហៅក្អយ បានបាត់មុខពីពិភពសិល្បៈ បន្ទាប់ពីនាងបានរងបណ្តឹងមួយចំនួន រហូតសាលាដំបូងរាជធានីភ្នំពេញសម្រេចសាលក្រមកាលពីអំឡុងឆ្នាំ២០១៣ កាត់ទោសពីបទឆបោករថយន្តជាច្រើនគ្រឿង និងចេញមូលប្បទានបត្រអត់សាច់ប្រាក់ ឲ្យជាប់ពន្ធនាគាររយៈពេល៣ឆ្នាំកន្លះ និងបង្គាប់ឲ្យសងប្រាក់ទៅដើមបណ្តឹងវិញ ។ បន្ទាប់ពីការប្រកាសសាលក្រមនោះ អ្នកនាងក្អយ បានចេញមុខទទួលស្គាល់នូវកំហុស ដោយបានសារភាពថា នាងពិតជាបានប្រព្រឹត្តករណី ឆបោកពិតមែន ក៏ប៉ុន្តែនាងក៏ជាជនរងគ្រោះដែរ ខណៈរថយន្តដែលនាងបានជួលយកទៅនោះ មានគេជួលបន្តពីនាងទៀត គេក៏ស៊ីដាច់បោកប្រាស់បន្តពីនាង ធ្វើឲ្យនាងត្រូវវ័ណ្ឌកពីមួយទៅមួយ ។
យ៉ាងណា ក្តីនាងក្អយ បានបដិសេធថា នាងមិនបានជាប់ពាក់ព័ន្ធនឹងការលេងល្បែងស៊ីសងរហូតដល់ថ្នាក់យករថយន្តគេទៅលក់មួយគ្រឿង ហើយគ្រឿងទៀតនោះទេ ។
ពាក់ព័ន្ធជាមួយនឹងការចេញ មូលប្បទានបត្រអត់សាច់ប្រាក់ គឺដោយសារតែរូបនាងបានចាញ់កលអ្នកជួលរថយន្តបន្ត ដែលបង្ខំឲ្យនាងធ្វើបែបនេះក្នុងរូបភាពមួយឲ្យមានទំនុកចិត្ត តែទោះបីជានាងប្រាប់គេថាគ្មាន លុយតម្កល់ក្នុងធនាគារ ក៏ភាគីម្ខាងទៀតនៅតែទាមទារឲ្យនាងចេញសែកឥតសាច់ប្រាក់ ក្នុងន័យយកទៅបន្លំភ្នែកអ្នកដទៃ ។
បន្ទាប់ពីរឿងរ៉ាវទាំងអស់នេះបានស្ងប់ស្ងាត់ អ្នកនាងក្អយ បាត់មុខពីសិល្បៈឈឹង ប៉ុន្តែនាងធ្លាប់បានបង្ហាញវត្តមានម្តងទៀតកាលពីអំឡុងឆ្នាំ២០១៦ នៅក្នុងពិធីឡើងគេហដ្ឋានប្អូនស្រីរបស់នាង ដែលពេលនោះនាំឲ្យគេមានការភ្ញាក់ផ្អើលថាជាផ្ទះរបស់នាង ។ នៅក្នុងពិធីនោះនាងក៏បានហៅភ្ញៀវដែលជាអ្នកសិល្បៈស្និទ្ធស្នាលមួយចំនួនចូលរួមមកដែរ ជាមួយនឹងការប្រកាសថា នាងអាចនឹងវិលចាប់អាជីពសិល្បៈវិញនៅក្នុងអំឡុងពេល ឆាប់ៗខាងមុខនេះ។
ទោះជាយ៉ាងណាក្តីរហូតមកដល់បច្ចុប្បន្នអ្នកនាងក្អយ នៅមិនទាន់លេចមុខនៅក្នុងកម្មវិធីសិល្បៈណាមួយនៅឡើយទេ ក្នុងពេលដែលនាងកំពុងតែសាងសុភមង្គលគ្រួសារមួយយ៉ាងជាមួយនឹងជីវភាពហ៊ឺហា និងមានកូនប្រុសស្រី២នាក់ហើយនោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ