ខេត្តព្រះវិហារ ៖ ក្នុងរដូវវស្សានេះក្រៅពីការងារស្រែចម្ការកសិករនៅស្រុកគូលែនខេត្តព្រះវិហារបាឆ្លៀតពេលដើរជីកផ្សិតប៉ក់លក់ទៅឲ្យឈ្មួញដោយរកបានកម្រៃចន្លោះពី៤ទៅ៥ម៉ឺនរៀល ថ្ងៃខ្លះអាចបាន១០ម៉ឺនរៀលក្នុងម្នាក់ អាចឲ្យពួកគាត់មានប្រាក់ឲ្យកូនទៅសាលារៀន និងដោះស្រាយជីវភាពរស់នៅរបស់ពួកគាត់បានមួយកម្រិតទៀត។
អ្នកស្រី សូត យិត ជាកសិករ រស់នៅឃុំគូលែនត្បូង ស្រុកគូលែន ខេត្តព្រះវិហារបានឲ្យដឹងថា ជារៀងរាល់ថ្ងៃនៅពេលដែលអ្នកស្រី និងក្រុមគ្រួសារចេញទៅស្រែចម្ការពួកគាត់តែងតែឆ្លៀតពេលដើរជីករកផ្សិតប៉ក់ជាប្រចាំក្នុង១ថ្ងៃ មនុស្សម្នាក់អាចជីកបាន៤ទៅ៥គីឡូក្រាមយកមកលក់ឲ្យឈ្មួញ ដែលចាំទទួលទិញនៅស្រុកគូលែនបានតម្លៃក្នុង១គីឡូក្រាម១ម៉ឺនរៀលទៅ១ម៉ឺន២ពាន់រៀល ។
អ្នកស្រីបន្តថា ជាធម្មតាផ្សិតនេះចាប់ផ្តើមដុះនៅពេលមេឃធ្លាក់ភ្លៀងដើមរដូវវស្សាបានចូលមកដល់រហូតដល់ចុងខែកក្កដាទើបផ្សិតនេះលែងសូវមាន ហើយផ្សិតនេះភាគច្រើនដុះនៅតាមវាលស្រែ និងតាមព្រៃដែលមានដីជ្រាយៗនៅពេលធ្លាក់ភ្លៀងកាន់តែច្រើនផ្សិតនេះ និងលូតលាស់បានច្រើនដូចគ្នាដែរ ។
អ្នកស្រីបានបញ្ជាក់ថា នៅដើមរដូវវស្សានៅពេលរដូវផ្សិតនេះដុះដំបូងអាចលក់បានតម្លៃ៤ ទៅ៥ម៉ឺនរៀលឯណោះ ក្នុងមួយគីឡូក្រាមតែនៅពេលជិតដល់រដូវអស់ផ្សិតនេះតម្លៃក៏មានការធ្លាក់ចុះវិញដែរ តែទោះជាបែបនេះក្តីក្នុង១ថ្ងៃ អ្នកស្រីអាចរកបានប្រាក់ចំណូល៤ទៅ៥ម៉ឺនរៀលដែរ ថ្ងៃខ្លះអាចបាន១០ម៉ឺនរៀលក៏មានពីការជីកផ្សិតនេះលក់អាចឲ្យគាត់មានប្រាក់ឲ្យកូនទៅសាលារៀន និងដោះស្រាយជីវភាពរស់នៅរបស់ពួកគាត់បានមួយកម្រិតដែរ ។
ជាមួយគ្នានេះអ្នកស្រី យាន សាវៀត ជាឈ្មួញកណ្តាលលក់បន្តផ្សិតប៉ក់ឲ្យជនជាតិថៃបានលើកឡើងថា ក្នុង១ថ្ងៃគាត់អាចលក់បន្តឲ្យទៅឈ្មួញដទៃទៀតចន្លោះពី៦០គីឡូក្រាមទៅ១០០គីឡូក្រាម និងក្នុងមួយថ្ងៃពលរដ្ឋនៅស្រុកគូលែនអាចលក់ផ្សិតនេះឲ្យឈ្មួញដទៃទៀតនាំចេញទៅថៃតាមច្រកអានសេះ ខេត្តព្រះវិហារ ចន្លោះពី១តោនទៅ១,៥តោនឯណោះ ព្រោះផ្សិតប្រភេទនេះពេញនិយមណាស់ សម្រាប់ធ្វើជាម្ហូបអាហាររបស់ជនជាតិថៃ ។
អ្នកស្រីបញ្ជាក់ថា រៀងរាល់ថ្ងៃរសៀលពួកគាត់បាននាំយកផ្សិតនេះមកដាក់លក់នៅតាមផ្លូវ ដែលឈ្មួញថៃបានចូលមកទិញដល់កន្លែងតែម្តងក្នុង១ថ្ងៃគាត់លក់បន្តក៏អាចរកចំណូលបាន១០ម៉ឺនរៀលផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ