ប្រទេសអុីរ៉ង់ ៖ ពិភពលោកមានការភ្ញាក់ផ្អើលនិងព្រួយបារម្ភខ្លាំង ចំពោះការវាយប្រហារ ថ្មីកាលពីថ្ងៃទី១៣មិថុនា ប្រឆាំងនាវាដឹកប្រេង២គ្រឿងក្នុងសមុទ្រអូម៉ង់ ដែលឧប្បត្តិហេតុនោះនាំឲ្យមានការភ័យខ្លាច ចំពោះការកើនឡើងថ្មីនៃភាពតានតឹងក្នុងតំបន់ឈូងសមុទ្រពែរ្ស៍។
ការវាយប្រហារនោះបណ្ដាលឲ្យនាវាដឹកប្រេង១គ្រឿងឆេះ ហើយមានប្រតិបត្តិការជម្លៀសនាវិកជាច្រើនសិបនាក់ចេញពីនាវាទាំង២គ្រឿងនោះ ដែល១គ្រឿងរបស់ន័រវែសនិង១គ្រឿងទៀតរបស់ជប៉ុន។ នាវាទាំង២ពេលរងការវាយប្រហារកំពុងតែធ្វើដំណើរ កាត់ផ្លូវសមុទ្រយុទ្ធសាស្ត្រនេះ បណ្ដាលឲ្យតម្លៃប្រេងឡើងខ្ពស់ភ្លាមៗ។
ភាពតានតឹងមានខ្ពស់រួចហើយចាប់តាំំងពីការវាយប្រហារលើកមុន កាល១ខែកន្លងទៅប្រឆាំងនាវា៤គ្រឿងក្នុងដែនទឹកអេមីរ៉ាត់អារ៉ាប់រួម ជាអំពើដែលគេចង្អុលលើអីុរ៉ង់រួចមកហើយ។ ការវាយប្រហារថ្មីនេះប្រឆាំងនាវាដឹកប្រេង២គ្រឿង នាំឲ្យរដ្ឋការអាមេរិកបញ្ចេញប្រតិកម្មភ្លាមៗចោទអីុរ៉ង់ ដោយថាអីុរ៉ង់ជាអ្នកទទួលខុសត្រូវលើការវាយប្រហារនេះ។
ប្រមុខការទូតអាមេរិកលោកMIKE POMPEO បានចោទប្រកាន់អុីរ៉ង់ថា ចង់រារាំងដល់ការឆ្លងកាត់របស់នាវាដឹកប្រេងតាមច្រកសមុទ្រORMUZ ដើម្បីធ្វើឲ្យស្ទះដល់ទីផ្សារប្រេងពិភពលោក។ លោកបន្តថាអំពើទាំងនេះតំណាងឲ្យការគំរាមកំហែងយ៉ាងច្បាស់មួយ ចំពោះសន្តិភាពនិងសន្តិសុខអន្តរជាតិ ជាការវាយប្រហារជាក់ស្ដែងប្រឆាំងសេរីភាពនៃការធ្វើនាវាចរណ៍ និងជាការបង្កើនភាពតានតឹង មិនអាចទទួលយកបានពីសំណាក់អុីរ៉ង់។
ទោះបីយ៉ាងណាមុននេះ អុីរ៉៉ង់បានសម្ដែងការព្រួយបារម្ភ ក្រោយឧប្បត្តិហេតុគួរឲ្យសង្ស័យទាំងនេះដោយគូសបញ្ជាក់ថា បានជួយសង្គ្រោះនាវិក៤៤នាក់នៃនាវាដឹកប្រេងទាំង២ ក្រោយចេញការប្រកាសអាសន្ន។ នាវាទាំង២គ្រឿងជាគោលដៅនៃការវាយប្រហារដែលនៅមិនទាន់ដឹងប្រភពនៅឡើយ។ សមាជិកក្រុមនាវិកនៃនាវាទាំង២ បានប្រកាសពីភាពអាសន្ន ក្រោយរងការវាយប្រហារនៅសមុទ្រអូម៉ង់។
នាវាដឹកប្រេងឈ្មោះFRONT ALTAIR និងKOKULA COURAGEOUS រងការវាយប្រហារ នាព្រឹកថ្ងៃទី១៣មិថុនាក្នុងឈូងសមុទ្រអូម៉ង់ជិតច្រកសមុទ្រORMUZ។ អាជ្ញាធរន័រវែសបញ្ជាក់ថា នាវាដឹកប្រេងរបស់ខ្លួនFRONT ALTAIR ដោតទង់ជាតិប្រជុំកោះម៉ាសាល់ រងការវាយប្រហារនៅកន្លែងមួយចន្លោះ អេមីរ៉ាត់អារ៉ាប់រួមនិងអុីរ៉ង់ នាវេលាម៉ោង៦និង០៣នាទីព្រឹកថ្ងៃទី១៣មិថុនា ។ នាវាចំណុះ១១១.០០០តោននោះកំពុងមានភ្លើងឆាបឆេះ។ មានការផ្ទុះ៣លើកក្នុងនាវានោះ ហើយបណ្ដានាវិកបានឡើងលើនាវាមួយគ្រឿង ហើយពួកគេពុំមានរបួសឡើយ។
ចំណែកទីភ្នាក់ងារព័ត៌មានអុីរ៉ង់IRNAអះអាងនាគ្រាដំបូងថា នាវាFRONT ALTAIRបានលិច តែអគ្គនាយកក្រុមហ៊ុនជាម្ចាស់នាវានោះបានបដិសេធព័ត៌មាននោះ ដោយថានាវានោះពុំបានលិចឡើយ ហើយនាវិក២៣នាក់ស្តិតលើនាវាមួយគ្រឿងដោយមានសន្តិសុខគ្រប់គ្រាន់។
ចំពោះនាវាដឹកប្រេងជប៉ុន កងនាវាចរណ៍អាមេរិកនិយាយថា បានឃើញគ្រាប់បែកបុកមិនផ្ទុះមួយនៅនឹងចង្កេះនាវានោះ តែមិនអាចបញ្ជាក់ថាគ្រាប់បែកបុកនោះ ទាក់ទិននឹងអុីរ៉ង់ឡើយក្នុងដំណាក់កាលនេះ។ យោងតាមទីបញ្ជាការដ្ឋានកណ្ដាលនៃកងទ័ពអាមេរិកថា នាវាពិឃាតអាមេរិកUSS MASON បានបើកទៅកាន់នាវាជប៉ុនរងការវាយប្រហារ ដើម្បីជួយសង្គ្រោះនាវិក២១នាក់៕ (កែសម្រួលដោយ ៖ បុប្ផា) (ប្រភពវីដេអូឃ្លីប ៖ ODN &CNN Business)
ចែករំលែកព័តមាននេះ