ប្រទេសចិន ៖ ក្រុងហុងកុង កាលពីថ្ងៃទី១២ មិថុនា ធ្លាក់ក្នុងអំពើហិង្សានយោបាយធ្ងន់ធ្ងរពុំធ្លាប់មាន ចាប់តាំងពីអង់គ្លេស ប្រគល់ដែនដីនោះឲ្យចិនវិញមក ដោយប៉ូលិសបានប្រើគ្រាប់កៅស៊ូ និងឧស្ម័នបង្ហូរទឹកភ្នែក…
ប្រទេសចិន ៖ ក្រុងហុងកុង កាលពីថ្ងៃទី១២ មិថុនា ធ្លាក់ក្នុងអំពើហិង្សានយោបាយធ្ងន់ធ្ងរពុំធ្លាប់មាន ចាប់តាំងពីអង់គ្លេស ប្រគល់ដែនដីនោះឲ្យចិនវិញមក ដោយប៉ូលិសបានប្រើគ្រាប់កៅស៊ូ និងឧស្ម័នបង្ហូរទឹកភ្នែក ប្រឆាំងពួកបាតុករ ដែលលើកគ្នារាំងខ្ទប់វិថីសំខាន់ៗ ហើយប៉ុនប៉ងលុកចូលក្នុងសភា។
យោងតាមទូរទស្សន៍ហុងកុងRTHK ដែលដកស្រង់ប្រភពសុខាភិបាលថា មនុស្សជាង៧០នាក់រងរបួស។ ពួកបាតុករក្រុងហុងកុងច្រើនសិបពាន់នាក់ស្លៀកពាក់ពណ៌ខ្មៅ ភាគច្រើនជាពួកយុវជន បានលើកគ្នាធ្វើការតវ៉ាជាថ្មីដើម្បីបរិហារ គម្រោងច្បាប់របស់រដ្ឋាភិបាលដែលសំដៅអនុញ្ញាតឲ្យធ្វើបត្យាប័នទៅកាន់ចិនដីគោក។
ការប៉ះទង្គិចគ្នាផ្ទុះឡើងនៅជិតសភាជាកន្លែងដែលគម្រោងច្បាប់នោះត្រូវបន្តពិភាក្សា។ ពួកបាតុករបានលើកគ្នាទៅឡោមព័ទ្ធសភាដែលគ្របដណ្ដប់ដោយសមាជិកសភាស្និទ្ធក្រុងប៉េកាំង។ ដោយសារបាតុកម្មនោះសភាហុងកុងបានសម្រេចលើកពេលការពិភាក្សាគម្រោងច្បាប់ចម្រូងចម្រាស់នោះទៅពេលក្រោយ។
ប្រមុខរដ្ឋាភិបាលក្រុងហុងកុង លោកស្រីCARRIE LAMដែលបដិសេធមិនដកគម្រោងច្បាប់នេះចេញវិញបានបរិហារថា នោះជាការបះបោរដែលមានការរៀបចំ។ លោកស្រីថាពួកបះបោរដែលធ្វើឲ្យប៉ះពាល់ដល់សង្គមដែលមានសន្តិភាព ដោយមិនគោរពច្បាប់និងវិន័យ មិនអាចទទួលយកបានឡើយ សម្រាប់រាល់សង្គមស៊ីវិល័យ។
ចំណែកប្រធានាធិបតីអាមេរិកលោកដូណាល់ត្រាំវិញ អះអាងនាថ្ងៃទី១២មិថុនាដោយសង្ឃឹមថា ពួកបាតុករអាចស្វែងរកឃើញដំណោះស្រាយមួយជាមួយចិន។ រីឯសហភាពអឺរ៉ុបវិញបានអំពាវនាវឲ្យគោរពសិទ្ធិតវ៉ាដោយគូសបញ្ជាក់ពីការព្រួយបារម្ភនានា។
ការប៉ះទង្គិចគ្នាថ្មីៗទាំងនេះនាំឲ្យនិកឃើញ ដល់ចលនាឆ័ត្រ ដើម្បីលទ្ធិប្រជាធិបតេយ្យ កាលពីរដូវស្លឹកឈើជ្រុះឆ្នាំ២០១៤ ពេលពួកបាតុករបង្កើតការរាំងស្ទះសង្កាត់នានានៃក្រុងហុងកុងរយៈពេលដល់២ខែ និងការបង្ក្រាបរបស់ប៉ូលិស។ ប៉ុន្តែចលនានោះពុំទទួលបានការធ្វើសម្បទាននានារបស់ក្រុងប៉េកាំងឡើយ។
លើកនេះប៉ូលិសហាក់ដូចជាប្ដេជ្ញាពុំបណ្ដោយឲ្យមានការកាន់កាប់ទីលាន របស់ពួកបាតុករដូចមុនទៀតទេ។ ប៉ូលិសបានរុញច្រានពួកបាតុករដែលប៉ុនប៉ងលុកចូលសភា ដោយប្រើដំបងនិងឧស្ម័នម្រេច ហើយទីបំផុតបានបាញ់គ្រាប់កៅស៊ូ ព្រមទាំងឧស្ម័នបង្ហូរទឹកភ្នែក។ ប៉ូលិសក៏បាញ់ដែរបណ្ដាកញ្ចប់ដែលផ្ទុកដោយគ្រាប់ឃ្លីសំណ។ ពួកបាតុករបានតបតដោយគប់បណ្ដារបាំងដែកនិងដបឬដុំថ្មទៅលើប៉ូលិស។
ប្រមុខប៉ូលិសក្រុងហុងកុងលោកSTEPHEN LO ថ្លែងការពារកងកម្លាំងរបស់លោកថា ប៉ូលិសបានខិតខំអត់ធ្មត់រហូតដល់ពួកជនខិលខូចប៉ុនប៉ងលុកចូលក្នុងសភា។
អ្នកវិភាគម្នាក់លោកDIXON SINGបានធ្វើអត្ថាធិប្បាយថា បើនិយាយពីអំពើហិង្សានយោបាយ នេះជាទិវាធ្ងន់ធ្ងរបំផុតមួយចាប់តាំងពីការប្រគល់ដែនដីហុងកុងឲ្យចិនវិញពីឆ្នាំ១៩៩៧មក៕ (កែសម្រួលដោយ ៖ បុប្ផា)
ចែករំលែកព័តមាននេះ